Yave, nge me vwanda kiswamunu ya beto,

bambandu na bambandu.

2 Ntete-ntete myongo kubutama,

ntete nge kuyidika ntoto mpe yinza,

mankululu na mankululu nge kele Nzambi.

3 Nge ke salaka ti bantu kuvutuka na ntoto.

Nge tubaka: «Beno bantu beno vutuka!»

4 Ya tsyelika na meso ya nge, funda mosi (1 000) ya bamvula kele mutindu kilumbu ya mazono yina me luta yimeni,

yawu kele mutindu mwa bangunga ya mpimpa.

5 Nge ke nataka bawu,

bawu kele mutindu mwa ntangu fyoti ya mpongi,

yina ke luta na suka mutindu matiti.

6 Na suka, yawu ke basisa bifulu, yawu ke kulaka,

na nkokila, ba ke zenga yawu mpe yawu ke yumaka.

7 Beto ke na kufwa samu na nkele ya nge,

beto ke na kutekita na boma,

samu na nkele ya nge ya kulutila.

8 Nge me yalumuna yimbi ya beto na ntadisi ya nge,

mansweki ya beto ke na kutalana na nsemo ya kizizi ya nge.

9 Bilumbu ya luzingu ya beto ke na kusuka samu na nkele ya nge,

bamvula ya luzingu ya beto ke manisa mutindu mwa mupepe.

10 Lutangu ya bilumbu ya luzingu ya beto kele ya makumi nsambwadi ya bamvula,

mpe bantu yina kele na ngolo mingi, luzingu ya bawu kele ya bamvula makumi nana,

kasi ndandu ya bawu ke kaka mpasi na yimbi.

Ya tsyelika, ntangu ke na kuluta na mbangu, mpe beto ke na kuzimbana.

11 Nani me zaba lulendo ya nkele ya nge?

Kuzitisa nge ni kuzaba mutindu kele nkele ya nge.

12 Longa beto mutindu ya kutanga bilumbu ya luzingu ya beto,

samu ti beto kutwadisa bantima ya beto na ndwenga.

13 Tii wapi ntangu? Yave, vutuka!

Fwila beto kyadi, beto bisyelo ya nge!

14 Na suka, fulusa beto na kukwikama ya nge,

na nsayi nyonso, beto ke looka na kyese bilumbu nyonso ya luzingu ya beto.

15 Yangidika beto na lutangu ya bilumbu yina nge talisaka beto mpasi,

Yangidika beto na lutangu ya bamvula yina beto talaka mpasi.

16 Bika ti diboko ya nge kusala na kati ya bisyelo ya nge,

mpe nkembo ya nge kuvwanda na bana ya beto.

17 Bika ti bumbote ya Yave, Nzambi ya beto kuvwanda na beto!

Kindisa kisalu ya maboko ya beto!

Ya tsyelika kindisa kisalu ya maboko ya beto!