1 Mu ke zolaka Yave, samu ti yandi ke kuwaka ndinga ya munu,

ntangu mu ke bondilaka yandi.

2 Yandi me teka dikutu ya yandi na kuwa munu,

mu ke bokila yandi luzingu ya munu nyonso.

3 Basinga ya lufwa kangaka munu,

boma ya kulutila ya yinsi ya bantu ya kufwa simbaka munu,

mu kumaka na mpasi mpe na kyadi.

4 Kasi munu, mu bokilaka Nkumbu ya Yave:

«Mulemvo ya nge Yave, vuukisa munu!»

5 Yave ke talaka kyadi mpe yandi kele ya kudedama,

yandi kele Nzambi ya kyadi.

6 Yave ke bumbaka bantu ya mpamba,

mu vwandaka ya kulemba, yandi vuukisaka munu.

7 Bika ti mwela ya munu kuzwa luvundulu,

samu ti Yave me sadila munu mambu ya mbote.

8 Ya tsyelika, nge me kuula mwela ya munu na lufwa,

nge me kusuna mansangasa ya meso ya munu,

nge me sala ti mu kubwa ve.

9 Mu ke tambula na mantwala ya Yave,

awa na yinsi ya bantu ya moyo.

10 Mu bikaka ve na kusala kivuvu ata na ntangu yina mu tubaka ti:

«Mu kele muntu ya mpasi ya kulutila!»

11 Mu tubaka na nswalu nyonso ti:

«Bantu nyonso kele bantu ya luvunu!»

12 Wapi mutindu mu ke vutula na Yave,

mambu nyonso ya mbote yina yandi me sadila munu?

13 Mu ke nanguna mbungu ya mpulusu,

mpe mu ke bokila Nkumbu ya Yave.

14 Mu ke lungisa balukanu yina mu bakaka na ntadisi ya Yave,

mpe na mantwala ya bantu ya yandi nyonso.

15 Lufwa ya bantu ya kukwikama

kele ntalu mingi na mantwala ya Yave.

16 Yave kuwa munu, mu kele kisyelo ya nge,

kisyelo ya nge, mwana ya kisyelo ya nge ya kento,

nge me zenga basinga yina ba kangaka munu.

17 Mu ke pesa nge munkayulu ya matondo,

mu ke bokila Nkumbu ya Yave.

18 Mu ke lungisa balukanu yina mu bakaka na ntadisi ya Yave,

mpe na mantwala ya bantu ya yandi nyonso,

19 na kati ya lupangu ya Yinzo ya Yave, na kati-kati ya Yelusalemi!

Aleluya!