1 Beno kembila Yave samu ti yandi kele mbote,

samu ti kukwikama ya yandi ke zingilaka bantangu nyonso!

2 Bika ti Isayeli kutuba dyaka yawu:

Samu ti, kukwikama ya yandi ke zingilaka bantangu nyonso.

3 Bika ti bana ya Aloni kutuba yawu:

Samu ti, kukwikama ya yandi ke zingilaka bantangu nyonso.

4 Bika ti bayina ke zitisaka Yave kutuba yawu:

Samu ti, kukwikama ya yandi ke zingilaka bantangu nyonso!

5 Na kati ya mpasi, mu bokilaka Yave,

Yave pesaka munu mvutu, yandi tulaka munu na kisika ya mbote.

6 Yave kele na lweka ya munu, mu ke na boma ve.

Yinki muntu lenda kusala munu?

7 Yave kele lusalusu ya munu,

mu ke na kutala kubwa ya bambeni ya munu.

8 Ya me lutila mbote na kuzwa kiswamunu na sika ya Yave,

kasi kutula ve kivuvu ya nge na muntu.

9 Ya me lutila mbote na kuzwa kiswamunu na sika ya Yave,

kasi kutula ve kivuvu na bantu ya mfunu.

10 Bantu ya bayinsi nyonso vwandaka zunga munu,

kasi, na Nkumbu ya Yave, mu manisaka na kusasa bawu.

11 Bawu vwandaka zunga munu, bawu vwandaka zunga munu na balweka nyonso,

kasi, na Nkumbu ya Yave, mu manisaka na kusasa bawu.

12 Bawu vwandaka zunga munu mutindu banyosi,

bawu kufwaka mutindu tiya ya matiti ya nyanga,

kasi na Nkumbu ya Yave, mu manisaka na kusasa bawu.

13 Nge vwandaka nunguna munu na ngolo samu na kubwisa munu,

kasi Yave vuukisaka munu.

14 Yave kele ngolo ya munu, mpe lulendo ya munu,

yandi ke vuukisaka munu.

15 Milolo ya nsayi mpe ya lunungu ke na kubasika na bayinzo ya lele ya bantu ya kudedama:

«Diboko ya lubakala ya Yave ke na kulakisa ngolo ya yandi.

16 Diboko ya Yave ya lubakala me nanguka,

diboko ya yandi ya lubakala ke na kulakisa ngolo ya yandi!»

17 Mu ke kufwa ve, mu ke zinga

mpe mu ke zonza mambu yina Yave me sala.

18 Yave me semba munu,

kasi yandi me yekula munu ve na lufwa.

19 Beno fungudila munu myelo ya ludedomo,

na myelo yina, mu ke kota samu na kukembila Yave!

20 Yayi ni mwelo ya Yave:

ni na yawu ke kotilaka bantu ya kudedama!

21 Mu ke kembila nge, samu ti nge me pesa munu mvutu,

samu ti nge me vuukisa munu.

22 Ditadi yina bitungi-bayinzo losaka,

me kuma ditadi ya kulutila mfunu, yina ke na kusimba yinzo.

23 Yawu me katuka na Yave,

ya kele dyambu ya ngitukulu na meso ya beto.

24 Yayi ni kilumbu yina Yave me sala:

Bika ti yawu kuvwanda kilumbu ya beto ya kyese mpe nsayi.

25 Yave, mulemvo ya nge, vuukisa beto!

Yave, mulemvo ya nge nungisa beto!

26 Bika ti Yave kusakumuna muntu yina ke na kukwiza na Nkumbu ya yandi!

Katuka na Yinzo ya Yave, beto ke na kusakumuna beno!

27 Yave kele Nzambi, yandi ke na kukyenzola beto,

na mandalala na maboko, beno sala mulonga ya bantu ya mukembo,

pene-pene ya mampoka ya kiyokolo ya minkayulu.

28 Nge kele Nzambi ya munu, mu ke kembila nge,

Nzambi ya munu, mu ke kembila bunene ya nge.

29 Beno kembila Yave, samu ti yandi kele mbote,

samu ti kukwikama ya yandi ke zingilaka bantangu nyonso!