Yave, bambuka moyo na Davidi,

bambuka moyo na bampasi ya yandi nyonso!

2 Yandi kudyaka ndefi na ntadisi ya Yave,

yandi bakaka lukanu na ntadisi ya Nzambi ya Lulendo, Nzambi ya Yakobi:

3 «Mu ke kota dyaka ve na yinzo ya munu ya lele,

mu ke lala dyaka ve na mfulu ya munu.

4 Mu ke kanga dyaka meso ve samu na kulala pongi,

mu ke kanga dyaka ve kinka ya disu samu na kunongina,

5 tii ntangu yina mu ke kuzwa kisika samu na Yave,

yinzo samu na Nzambi ya Lulendo, Nzambi ya Yakobi.»

6 Ba zonzilaka beto ti Sanduku ya Ngwisani kele kuna na Efalata.

Beto kwendaka kuta yawu na mbanza ya Yaale.

7 Beto kwenda kota na Yinzo ya Yave!

Beto fukama na mantwala ya kisika yina yandi ke tulaka makulu.

8 Yave, telama, kwiza na kisika ya nge ya luvundulu,

nge na sanduku ya nge ya lulendo!

9 Bika ti banganga-Nzambi ya nge kulwata ludedomo mutindu kinkuti,

ti bantu yina kele ya kukwikama na nge kusala milolo ya nsayi!

10 Samu na Davidi kisyelo ya nge,

kubingisa ve muntu yina nge byekaka na kudukula yandi mafuta!

11 Yave salaka nsilulu ya tsyelika na Davidi,

yandi ke soba yawu ve:

«Mu ke soola mosi na kati ya bana ya nge

samu na kuyingana na kisika ya nge mutindu ntinu.

12 Kana bana ya nge bumba ngwisani ya munu,

mpe malongi yina mu ke pesa bawu,

bana ya bawu mpe ke kwiza vwanda na kiti ya nge ya kintinu.

Bantangu nyonso.»

13 Ya tsyelika, Yave soolaka Siyone,

yandi me zola na kwiza zinga kuna.

14 Yandi tubaka: «Yawu kele kisika ya munu ya luvundulu bantangu nyonso,

mu ke zinga kuna, samu ti mu me zola yawu.

15 Mu ke sakumuna ya kulutila bibumbulu ya Yelusalemi na madya,

mu ke pesa bamputu ya bawu madya yina bawu ke na yawu nsatu.

16 Mu ke lwatisa banganga-Nzambi ya bawu mpulusu mutindu kinkuti.

Bayina kele ya kukwikama ke sala milolo ya nsayi.

17 Kuna na Siyone, mu ke sala ti na dikanda ya Davidi ya vwanda na ntinu ya lulendo,

mu ke kubikila yandi muntu yina ke yingana na kisika ya muntu yina mu soolaka na kudukula yandi mafuta.

18 Mu ke fulusa bambeni ya yandi na nsoni,

kasi samu na ntinu, yimpu ya yandi ya kintinu ke lema.»