1 Aleluya!

Beno kembila Yave katuka kuna na mazulu!

Beno kembila yandi na bisika ya kuzangama!

2 Beno kembila yandi, beno nyonso, bantumwa ya yandi!

Beno kembila yandi, beno binwani ya yandi nyonso.

3 Beno kembila yandi, ntangu na ngonda!

Beno kembila yandi, beno bambwetete nyonso yina ke na kulezima!

4 Beno kembila yandi, beno mazulu!

Beno kembila yandi, beno maza yina kele na zulu!

5 Bika ti bawu kembila Nkumbu ya Yave!

Ya tsyelika yandi tumisaka, mpe yawu me yilamaka.

6 Nzambi me tula yawu samu na bantangu nyonso ya mankululu,

yandi me pesa bansalulu ya misiku yina yandi lenda balula ve.

7 Beno kembila yandi katuka na ntoto,

beno bibulu ya nene ya nsisi ya mubu,

mpe nyonso yina kele na kati ya yisi ya mubu,

8 tiya, mvula ya matadi, neze mpe dibungi,

na mupepe ya ngolo, yina ke na kusadila mambu ya yandi,

9 myongo na beno myongo nyonso ya fyoti,

bayinti yina ke pesaka bambuma, mpe beno nyonso, bayinti ya sedele,

10 bibulu mpe beno nyonso, bibulu ya mfinda,

bibulu ya fyoti mpe bandeke,

11 Bantinu ya ntoto, mpe makanda nyonso,

bamfumu mpe bantwadisi nyonso ya ntoto,

12 bana ya bakento mpe ya babakala

biboba na bana ya fyoti!

13 Bika ti bawu kembila Nkumbu ya Yave!

Samu ti kaka ni Nkumbu ya yandi kele ya kuzangama,

yandi me lutila zulu na ntoto na kulezima!

14 Yave me sala ti bantu ya yandi kuvwanda na ngolo,

nzitusu samu na bantu yina kele ya kukwikama na yandi,

samu na bana ya Isayeli, samu na bantu yina kele pene-pene ya yandi.

Aleluya!