2
Bantu fwana kusoba nkadulu
1 Beno bantu yina kele ve na nsoni,
beno kukitala mbote,
mpe beno yindula,
2 ntete beno kuma
mutindu matiti ya nyanga ya kuyuma,
yina me zimbana na kilumbu mosi,
ntete nkele ya kulutila ya Yave kwizila beno,
ntete kilumbu ya nkele ya kulutila ya Yave kukumina beno.
3 Beno sosa Yave, beno nyonso bantu ya kukuluka ya yinsi,
beno nyonso yina ke tumamaka na misiku ya yandi,
beno sadila ludedomo,
beno sosa na kuvwanda bantu ya kukuluka na ntadisi ya Yave,
samu ti Yave lenda kuvuukisa beno na kilumbu ya nkele ya yandi.
Yave ke na kukebisa bantu ya bizunga ya wesete
4 Ya tsyelika, ata muntu ke bikana na mbanza Ngaza,
mbanza Asekelone ke mwangana,
ba ke bingisa bantu ya mbanza Asedode
na ntangu ya midi,
ba ke bingisa mpe bantu ya mbanza Ekelone na mbanza ya bawu.
5 Kyadi na beno bantu yina ke zingaka na bizunga yina kele pene-pene na mubu,
bantu yina katukaka na yinsi ya kisanga ya Kelete,
Yave ke na kupesa beno lufundusu yayi:
«Kaana, yinsi ya ba-Filisiti,
mu ke mwangisa nge,
mpe ata muntu ke vwanda dyaka kuna.
6 Kizunga ya nge yina kele pene-pene ya mubu
ke kuma kisika yina bibulu ke kudyaka.
Yawu ke kituka bayinzo ya mivungi
mpe mpaka ya bibulu.»
7 Bantu ya Yuda yina ke bikana na luzingu,
ke kwenda zinga na kizunga yina.
Bawu ke kwenda kudikila bibulu ya bawu kuna,
mpe na nkokila, bawu ke kwenda lala
na bayinzo yina bikaka bantu ya Asekelone.
Ya tsyelika, Yave, Nzambi ya bawu,
ke sala mambu ya mbote samu na bawu,
mpe yandi ke bongisa dyaka luzingu ya bawu.
Yave ke na kukebisa bantu ya bizunga ya esete
8 «Munu Yave, mu me kuwa mutindu,
bantu ya Mowabe mpe ya Amone, ke na kuseka,
mpe ke na kusakinina bantu ya munu.
Bawu fingaka bawu
mpe botolaka dyaka ntoto ya bawu.
9 Na yina, mutindu mu kele moyo,
munu Yave, Nzambi ya Lulendo,
Nzambi ya Isayeli, mu ke na kutuba mutindu yayi:
bambanza Mowabe mpe Amone ke nyenga
mutindu bambanza Sodome na Ngomole.
Bisika yina ke kituka ntoto ya kuyuma,
kaka ni mwa bayinti ya bansende mpe mabulu ya mungwa ke vwanda kuna.
Bantu ya munu yina ke bikana na luzingu,
ke kwiza baka bimvwama ya bawu
mpe ke kuzwa yinsi ya bawu.»
10 Yina kele ni kitumbu bawu fwana kuzwa
samu na lunangu ya bawu.
Ya tsyelika, bawu me finga bantu ya Yave, Nzambi ya Lulendo,
mpe me botola ntoto ya bawu.
11 Na nkele ya yandi, Yave ke tadila bawu kyadi ve,
samu ti yandi ke zimbisa banzambi nyonso ya bantu ya ntoto.
Na yina, bantu ya bayinsi nyonso yina kele ntama
ke sambila Yave, konso muntu na yinsi ya yandi.
Yave ke na kukebisa bantu ya bizunga ya node mpe ya sude
12 «Beno mpe bantu ya Etyopi,
mu ke sala ti ba kufwa beno na mbele ya mvita.»
13 Yave ke pesa mpe kitumbu
na sika ya bantu ya kizunga ya node,
mpe ke mwangisa yinsi ya Asili.
Yandi ke mwangisa mbanza Ninive
mpe yawu ke kuma mutindu ntoto ya kuyuma.
14 Mameme na bibulu ya nkaka ya konso mitindu ke kwiza vwanda
na kati ya mbanza ya Ninive:
Bandeke ya mpimpa mutindu kimfutu mpe mwa bibulu ya mfinda
ke banda na kwiza lala na makunzi ya bayinzo ya kumwangana.
Makelele ya bandeke ke banda na kubasikaka
na banela ya bayinzo yina.
Na bisika ya myelo, bantu ke tala bikunku ya matadi
mpe mabaya ya bayinti ya Sedele ya kumwangana.
15 Ni mutindu yina ke kuma mbanza yayi ya kyese,
kisika yina bantu ke zingaka na kubanzaka ti,
ata dyambu ya yimbi ke kumina bawu,
mpe ti mbanza ya bawu me lutila bambanza nyonso.
Ya tsyelika, yawu me mwangana,
mpe yawu me kuma kisika ya bibulu ya mfinda.
Bantu nyonso yina ke luta kuna,
ke yituka mpe ke seka mbanza yina.