1 Jon
o
Sansandek amebta Jon mar tonta
Gamuk ameb lehaqta
Mataw asor in Yesus ago on mataw gihulosim lehim in giholbin iyim osad bilaq yaqay, I gisan ka in og kabta iyim in meqin diq haq yaqay. Nazaq iyan God Atatin mat diq asan waqeq a hi gwahtiq nagta haq yaqay. I ginad emauq haq yaqay, Yesus in God Atatin a haiq haq yaqay. Haqad in bilaq yaqay, I God ago diqta na i gimomo tuhurit haq yaqay. Huritim i ginad em hasim daq meqinta a ta emauqta haq yaqay. Haqad in Yesus ago on mataw ta asor na gihureqnan ton yaqay. Sa Yesus ago mataw na gamuk katiyta na huritim dante doqag diq in hel diqta na ago in ginadnad tiqem yaqay.
Sa mat anan Jon haqay na in Yesus ago on mataw na gilumsihid in God ago gamuk helta hurit kemeq ginad kabemmo em yaqay na hulosad in ginad amulikmo usdaq haqad in gimen sansandek ka mar tonta. In bilam, Mat i gime anonabmo ahol waqad teq i giben le in ahol wazta naqmo anan i gibilen kemauq ham. Gibilen kemid ne ginad i ginad nogmo iyid i bunmo giwastoneq Gimam God teq in Atatin Yesus-mo nenaq ginad dimniysa tuqosam ham (1 Jon 1.3).
Teq in bilam, Ne mataw katiyta na gigo nan hi huritiy ham. Mataw nazaq bilaqayta na in God ago a haiqta ham. In Krais bab ugayta ham. Helmo Yesus in mat diqmo iyim gwahtimta ham. Gwahtiqan on mataw in anan helmo haqayta naqmo in God atatniz iyim in Gimam Iyah na ago hurit kemayta ham. Ad in God anan ginad bilaqsa in on mataw ginan ginad bilaqaytamo ham. Teq in bilam, Ne gamuk ka ahol waqeq ginad em daqay, Helmo, i os dimunta kuluwa-kuluwmo osayta na tuwaqim osauq haq daqay haqad ya gamuk ka ne gimen mar tonta ham (1 Jon 5.13).
I saw anuwanib luwad i mataw romriqabta na giholibmo hiqiyid in hi kat igiy
1
Gamuk mataw giqeman kuluwa-kuluwmo osayta na ulal iy
1 Ari i God ago gamuk mataw giqeman kayeqmo osayta na anamren anan tibilaqnan. Gamuk na anamren in mebmebmo diq osta. Teq in og kab bolim ago gamuk na bilaqsa i huritad teq i gime anonabmo ahol wawta. I gamuk na anamren ahol waq hasad i giben in aholib emim asan waztamo. 2 Kayeqmo osayta anamren na ulal iyan i ahol tuwaqim i in ago gamuk na tutim ne tigibilenauq. Gamuk na anamren in mataw kayeqmo tutimmo osayta na alulinmo diq. Kwaziqmo in Amam inaq osta. Osim in ulal iyan i ahol tuwawta. 3 I in ahol waqim ago gamuk tuhuritim i ta ne gibilenauq, gibilenid ne ginad i ginad nogmo iyid i bunmo wastoneq zib alowab tuqosam haqad. I Gimam Iyahta na Atatin Yesus Krais inaq gigo hib i tisoqotim i in nenaq zib alowab tuqosauqta. 4 Ad i ne nenaq araqibmo nazaq tuqosad teq i ginad tidimniy hasdaq haqad i gamuk ka tumar ton negauq.
I saw anuwanibmo luwuq
5 Yesus Krais gamuk bilaqsa i huritta na i tutad kazaq diq ne gibilenauq. God in bilaqne saw anuwan nogta. In aholib romriq asit a hi usaqta. 6 Nazaq iyan i giqezabmo bilaqauq, I God inaq zib alowab osauq haqad teq i romriqabmo luwad na i gimileq iyad gamuk helta adan a hi muzinauqta. 7 Ari God saw anuwanib luw nogmo i luwad teq i Yesus ago on matawta na bunmo nenaq araqibmo zib alowabmo osauqta. Ossa God Atatin Yesus anedan na in i gigo daq meqinta tisuhol bugaqta.
8 Teq i bilaqauq, I daq meqinta a hi emauqta haqad na i gigem kat ugsa gamuk helta i gigemab a hi usaqta. 9 Ari i gigo daq meqinta na ulum hasid gwahtiqsa teq God bilamta nazaq in tiqemdaq. In daq titnonta emad i gigo daq meqinta na walemad i gigemab daq katiyta usaqta nagan in tisuhol bugdaq.
10 Teq i bilaqauq, I daq meqinta araq asit a hi emta haqad na i God eman in mat amileq inaqta tiqiyaq. I nazaq gihol kat ugsa God ago gamuk i gigemab a hi usaqta.