1 Jon
Lovoang Avot At Ne Jon
Levelinga Loklox Axasep
Levenmaares 90–95 A.D.
Jon neni lun pinivu at ne Iesu. I se neni gak sokso neni ga nemen to Epesas. Neni ga malagan i na lovoang tinedi limixin nunu diga nemen to Asia, mumu legepu vanga. Lara avot i lok keretna: neni ga malagan i na xusu ti lox asuvos luruturun mumu lorooro ruturun. Ni ga lok keretna, do “Ata ebalamu mila ne Moroa ni lavasuun at labalamu.” Lara mumu i lok keretna: lentaba luvuttadi babala diga vot la diga xarang taba limixin nunu mi levelinga xeretna, “Labantuxu atdik, neni lavanga ua i lok kapmek. Neni loxot tinotno at laxakapmek. Kuren la ne Iesu goxo vot mi labantuxu. Neni ga vot la neni ga milik ngan laradi ketla neni goxo ruuna labantuxu.”
Na levelinga limixin babala diga tong i la di goxopara limixin dina ruuna loklok nunuan la dina lox asuusu labalamu. La diga doma i do ne Iesu xopmen lamdak tuturun at ne Moroa. Kuren la ne Jon ga malagan i na lovoang kusu ti lok kepe i mo laxaxarang atdi.
Lengkot silok keneng at na lovoang
1:1-4 Lavasuun tinotno at na lovoang.
1:5–2:17 Langas at laxasep mi langas at lamain nedu xopmen duna epovo.
2:18-29 Jon ga vaase aronga nedi mumu limixin munepen.
3:1–4:6 Nege nedi limixin at ne Moroa la nege nedi limixin at ne Satan.
4:7–5:5 Ik mokso do limixin nunu dina ebalamu ela.
5:6-21 Lempapaase mumu lavantun lempanga i paase katling ne Iesu.
1
Lavapaase Im Taba Lorooro
1 *Jo 1:1-2,4; 1 Jo 2:13-14Nema lavaun pavang ma malagan li na levelinga mumu mo laradi ga rooro avot ti luruntudum li at na lavatbung menemen. Nema maga ronga levelinga ren la maga ven i mi levengkatli atnema. Maga reven kisip lugugu ren la maga long tu ren. Neni Lenavolo im taba lorooro la ma vavang min tinimi. 2 *Jo 1:14Mo laradi im taba lorooro ga vor asuvos, nema maga reven i la ma tong asu i rinimi. La ma vavang bok min tinimi, neni Luntoo Avolo, la neni gat kis esogo eburu mi ne Temen dik la melemu ga vor asuvos tinama. 3 Lempanga axap mo laradi ga lox i, maga ven pam i, la maga ronga vam levelinga ren. Ma vavang bok min tinemi, kusu nemi minat kis esogo eburu minema kerekngan nema mat kis esogo mi ne Temen dik la mi ne Nitna bok ne Iesu Karisito. 4 *Jo 16:24Nema ma malagan na levelinga nunuan tinimi kusu lomomo atdik naba umsu aleng.
Lavatpas Atdik Keneng At Laxasep
5 *1 Ti 6:16; Je 1:17Na levelinga nema mara ronga vam i boro at ne Nitna la ma vavang min tinemi keretna, Moroa neni Laxasep la kopmen lamain nak lok teren. 6 *1 Jo 2:4La mo do tara atdik na lok do it kis esogo mi ne Moroa, ketla lamain i umsu keneng at lorooro ren, neni laradi xaxarang la lorooro ren kopmen nak mokso la kopmen na sixit emu mi levelinga ruturun. 7 *Jo 3:21; Ais 2:5; Ib 9:14; Li 1:5; 7:14Ketla mo do nedik ta nemen at laxasep, kerekngan ne Moroa i nemen at laxasep, nedik atat kis esogo eburu. La lada at ne Iesu, nitna ne Moroa i lox adadat nedik basinge levengkakapmek axap.
8 *Sam 32:5; Ler 28:13Dola tara na lok keretna, “Kopmen taxapmek tarak,” neni i xarang axa i, la levelinga ruturun kopmen nak lok teren. 9 Ketla mo do nedik ta soxomus asu laxakapmek atnedik ti ne Moroa, ni naba doxoma xepe i la ni naba lox adadat nedik basinge leveloklok kapmek axap atdik, mila neni Laradi Ruturun la Laradi Manmanton. 10 Dola tara na lok keretna, “Nenia a goxo lok taxapmek,” neni mo laradi i lox asuusu i do ne Moroa i ngan leeme xaxarang, mila ne Moroa ga tong i do limixin axap di lok laxakapmek. La do mo laradi i paase kerepmo, levelinga at ne Moroa kopmen na nemen keneng teren.