1 Laxakapmek ik lox atdan laradi xapmek keneng at lebelen. Ik sok sisixe ne Moroa, la kopmen naklen loklok tik lox asuusu loklok ngangao ri ne Moroa. 2 Im doma asilox axa i, kuren la i doma i do ne Moroa ixo epovo na ven lenget ka libilinga ren la noxo vaase asi rino i. 3 Lavapaase ren i lok kapmek la i umsu mi laxaxarang. Ik sok tixirixes kepe lodoxoma avukat la leveloklok i nunuan. 4 Im doma agagas li levempanga xakapmek do ik midi ro at loora ren. Kopmen nak lok tevempanga avukat, la kopmen tinotno nak sok sisixe lempanga xapmek.

5 O Leeme Silok, labalamu lexen taram i silok aleng tinotno la i urut se rovana at laxalibet. La uk lox epovo amisik leveng kakaape ram nade xopok la i se tu at lamavangkap. 6 Loklok manmanton taram i tu tuxuruxun ngan lempatkaana. Lempapaase ramtaba ina ram i lolos aleng ngan laras i ekapus. Limixin axap mi levempanga mi lavanuet kangkedek di nemen maxopok at loklok tatao ram.

7 O Moroa, labalamu lexen taram i lox avukat tinotno! Ma ven kaka loxokok taram tinema maxopok at luvapa ram. 8 Ma anan mais avukat mi laxaluxa solo um taba nema min, la u ke nema ma ruuna ka lorooro nunuan i sesen su ram ngan ladan sen. 9 Nenu lavasuun at lorooro at lempanga axap, la mumu mun lodoxoma xasep taram, nema ma ruuna ka laxakasep.

10 Labalamu ram na tu epasum tinedi dikleklen u. La una lok luvukat tinedi di ruuna loklok in manton tino. 11 Nemen uta ke avolo limixin loklox aaso dina esep minia, kopla limixin kapmek dina lox amarar ia la ana sixiro.

12 Nema ma ven ba no loxot limixin kakapmek di saksubu e. Mo dik midi, la ixo epovo do dina xatu kaxat.