1 Nemi limixin axap at na lavatbung menemen, mina pasa tingen mi lomomo! Mina emi asu mi ne Moroa mi livikpixan lolos! 2 Leeme Silok, ni Leeme Avolo. Dik atana lok ngangao aleng teren. Neni Loorong Silok, im gomgonga na lavatbung menemen axap. 3 Ni ga raba dik mi lolos ti sak tup mi limixin munepen minedik. Ga lox asilok nedik kusu atam gomgonga levenabung mixin petpes. 4 Neni ga lok katling ka na lenep kangka atnedik livipisik li at ne Jakop ua tana nemen teren. Ni i balamu limixin teren mo di lok momo mi lenep kangka atnedi. 5 Moroa i urut utoxun pana at loxonin orong teren. Limixin di ven i la dip kup silok aleng mi lomomo la lerengteng silok at laratu. 6 Mina vixan emi asu ri ne Moroa, mina vixan emi asu ri Loorong Silok atnedik! 7 Moroa ni Loorong Silok ti limixin axap at na lavatbung menemen. Mina emi asu min mi livikpixan!

8 Moroa it kis to at loxonin orong teren i melemelengan, la im gomgonga larabung mixin axap. 9 Luvuttadi amgomgo atdi di vot eburu mi limixin at lo Moroa at ne Abaram. Lolos teren i volo lolos atnedi axap limixin esep at na lavatbung menemen. Ni Loorong i silok aleng ti lavaorong axap.