1 Zooroŋana ta imbotmbot la wal sananŋan lelen, ta imburumrum lae pizin mi ikamam peeze pizin.

Tanata matan imun pa Anutu, mi timoto i risa som. ✡Ro 3:18

2 Zin tipakurkur zitun.

Tana sanaana kizin, tikilaala som, mi tiur koi pa som.

3 Sua sananŋana mi sua pakaamŋana men ta iwedet pa kwon.

Mi titoto mbulu ambaiŋana mini som. Pa tipizil ndemen pa ŋgar ambaiŋana kek.

4 Lelen iur pa zaala sananŋana kek.

Tana sombe tikeene se murin, na ŋgar kizin ilala pa mbulu sananŋana men tau.

Irao tizem na som.

5 Yooba, niam amkam ŋgar pa mbulu ku na, amrao som.

Pa muŋaiŋana ku na, biibi ma biibi kat. Isala ma isala ta saamba a.

Mi mbulu ku ta toto sua ku mbukŋana na, ta kembena. Isala ma ilip pa miiri tieene. ✡Mbo 57:10, 89:1+, 108:4

6 Mbulu ku ndeeŋeŋana, ina kembei zin abal ta bibip kat.

Mi mbulu ku ta tirtiiri zin tomtom pa mbulu kizin mi urur kadoono ndeeŋeŋana pizin, ina isula kat kembei ta mozo lukutuunu a.

Mi nu mborro zin tomtom mi buzur mi uluulu zin, tanata timbotmbot ambai. ✡Mbo 145:16

7 Anutu, muŋaiŋana ku na koroŋ ŋonoono kat. Kosa sa ilip pa na som.

Tana tomtom ta boozomen tipase pu be kuubukaala zin, kembei man ikuubukaala lutuunu bizin. Wal zanŋan, mi zin sorrokŋan tomini. ✡Rut 2:12; Mbo 17:8, 57:1

8 Ruumu ku na, bok pa kini ambaimbaiŋan. Tana tomtom tikan ma tirao kat.

Mi koroŋ ku ambaimbaiŋan ilala pizin kembei yok ta irereere na ma tiwinin. Tabe ikam zin ma lelen ambai kat. ✡Mbo 65:4; Yo 4:10+

9 Nu kembei yok bukbukŋana. Pa koroŋ boozomen ta timbot matan yaryaara na, itum payaryaara zin mi kiskis zin.

Mi nu kampewe yam mi urur mat piam, tana motoyam ipeere mi ambotmbot la mat leleene. ✡Yo 1:4, 4:10+, 7:37+; 1Pe 2:9

10 Yooba, zin wal ta tiute u na, to sua ku mbukŋana mi ur lelem pizin.

Mi zin wal ta lelen ŋgeezeŋan na, zzwe mbulu ku ndeeŋeŋana pizin.

11 Tana zem zin wal zorzooroŋan ma timaŋga pio pepe.

Mi zem zin wal sananŋan ma tiser yo pepe.

12 Kere. Zin wal ta tinoknok mbulu sananŋana, ta Anutu ipalkeete zin ma titoptop su toono kek.

Ko irao timaŋga mini na som.