10
Te haka to'o 'anga na pegea haka ako
(Mark 3.13-19; 6.7-13; Luke 6.12-16; 9.1-6)
1 Ko Jesus noko ngege i tena katoa tuma'a e gua pegea haka ako o boomai kia te Ia, o haiga'a taganga kia te kigatou, ke pagepage 'atua, ma te hetauaki ba'i sa'o saga, ma ba'i masaki. 2 Konei na ingoa o te katoa tuma'a e gua pegea haka to'o:
Te pegea mu'a ko Simon, (noko mate ko Peter) ma te taina ia Andrew.
Ko James te hosa o Zebedee, ma te taina ia John.
3 Ko Philip ma Bartholomew.
Ko Thomas ma Matthew te tangata tibu takis.
Ko James te hosa o Alphaeus, ma Thaddaeus.
4 Ko Simon te ‘zealot’*10.4 te ‘zealot’, te pegea i te tu'uganga noko he'e siahahai ki Rome,
ma Judas Iscariot noko haka soko eia ia Jesus.
5 Te katoa tuma'a e gua pegea nei, noko haka to'o e Jesus, kae konei na tongitongi aki ia te kigatou, “Noka te boo ki na pegea 'aatea. Noka ma'u te boo ki he hu'ai manaha mo'ona pegea mai Samaria. 6 Kae manga boo atu ki na pegea o Israel kua boo 'aatea ia God. 7 Tautou boo 'anga, tohi'aki atu kinai i te gongo nei: ‘Te Hakahua 'anga a te 'Aitu kua hitaiaki.’ 8 Haka ma'ugi atu na pegea masasaki, ma te baa 'aga na pegea mamate, ma te haka ma'ugi na pegea kahoa ke ma'a, ma te pagepage na haagiki songo. Na taganga nei manga ga'u tausu'u e koutou, kae sui atu o hai tausu'u ki gaa pegea. 9 Noka te to'o ni golu, ma ni siliva, ma ni mane i autou oko oko. 10 *10.10 1 Cor 9.14; 1 Tim 5.18.Noka te to'o he kete i te lango 'anga nei, po he tokagua ake, po ni taka ba'e po he tokotoko, iteme'agaa te pegea hai hekau e gaoi te haiga'a kinai nia e siahai kinai.
11 “Na 'aso kago boo ai koutou ki he hu'ai manaha po he mi'i manaha, ogo ligo atu he pegea gaoi, ogo haka pata kia te ia i tena hage aano hetae te 'aso boo o 'outou i te manaha. 12 Koutou nimaa go he uguhi ki goto i he hage, ogo hai atu, ‘Te goto maagie o God ke haka pata kia te koutou.’ 13 Ka na pegea i te hage nimaa haka pogo ia te koutou, tuku atu te goto maagie o'outou ke noho kia te kigatou. 14 *10.14 Acts 13.51.Ka nimaa iai ni pegea e he'e haka pogo ia te koutou ki ogatou hage, poe he'e sia haka gongo ki autou gegea 'anga, ogo tuutuu atu na tobeabu i outou tapungao i te 'aso e boo ai koutou i te manaha. 15 *10.15 a Mt 11.24; b Gen 19.24-28.*10.15 Lk 10.4-12.Ko Au e gea maa'ogi kia te koutou: Te 'aso kago haka aba ai e te 'Aitu ia pegea, kago hua'eha te kagohia kago tuku e Ia ki na pegea i te manaha na o sigi i na pegea noko noho 'aki i Sodom ma Gomorrah.
Na hai songo 'ia 'anga
(Mark 13.9-13; Luke 21.12-17)
16 *10.16 Lk 10.3.“Koutou e haka to'o e Au nei, manga noho pe na sipisipi boo haka higo ki goto i na tokitoki 'atuahekai hai maka. Tenei te hai 'anga e hai koutou he 'igo'igo 'aki ai ke noho pe na ngata, ma te ngongoto he'e hai tau'a ke noho pe na gupe.
17 *10.17 Mk 13.9-11; Lk 12.11,12; 21.12-15.“Ka koutou na'ana'a atu kia pegea, ko kigatou kago haiga'a ia te koutou ki te puugenga ke haka aba, ma te kogu ia te koutou i na Hage hai paaunga. 18 I te ghaghinga ia te Au, koutou kago kakabe 'ia ki 'ago i na hu'ai hakahua ma na king, kego 'atigongo atu koutou i te Gongo Gaoi kia te kigatou ma na pegea 'aatea. 19 Te 'aso kago he 'osohi ai kia te koutou o kakabe ki te haka aba, ogo noka tautou maikia po nia hai koutou go gegea ai poe kohea autou to'o, na'e nia e hai koutou go gegea ai e hai ke go haiga'a kia te koutou i te 'aso na. 20 Iteme'agaa he'e ko koutou te hai ke go gegea, ka te Spirit Tapu o te Tamana o'outou, te hai ke go gea ke agatu'u ia te koutou.
21 *10.21 Mk 13.12; Lk 21.16.“Na taangata kago haka soko ogatou taina ke taa 'ia ke mamate. Te tamana kago konei na hai ma'u kia tena tama'iti'iti. Na tama giki kago haka hetata'i ki ogatou hai maatu'a, ma te kago haiga'a ia te kigatou ke taa 'ia ke mamate. 22 *10.22 a Mt 24.9; Mk 13.13; Lk 21.17; b Mt 24.13; Mk 13.13.Ko ba'i pegea kago mikau'a kia te koutou, i te ghaghi ia te Au, ka koai kago tu'u o ma'u ano hetae ki te 'otinga, tenaa ia kago ma'ugi. 23 Koutou nimaa go hai songo 'ia i he manaha, ogo he 'agiko atu ki tegaa manaha. Ko Au e gea maa'ogi kia te koutou: Koutou kago he'e 'oti i te boo ki na manaha o Israel, kae a'u te Hosa o Pegea.
24 *10.24 a Lk 6.40; b Jn 13.16; 15.20.“Te pegea koi haka ako e he'e 'igo'igo o sigi i tena ako. Te guani e he'e hua'eha o sigi i tena hakahua. 25 *10.25 Mt 9.34; 12.24; Mk 3.22; Lk 11.15.Te pegea koi haka ako manga 'aonga te noho po tena ako, te guani ma'u manga 'aonga te noho po tena hakahua. Ka te hakahua o te hage nimaa mate 'ia ko Beelzebub, te hakahua o na haagiki, kago soo atu te hai songo 'ia na pegea i tena hage.
Koai te hai ke matataku kinai
(Luke 12.2-9,51-53; Luke 14.26-27)
26 *10.26 Mk 4.22; Lk 8.17.“Kae noka te matataku kia te kigatou, na'e ko ba'i hai 'anga ngigo i na 'aso nei, e hai ke go haka 'agi ke na'a. 27 Nia e 'atigongo ai Au kia te koutou i te poo'uginga, ogo gegea atu ai koutou i he 'ao. Nia e palana ai Au ki 'outou taginga, go 'atigongo haka maa hoga atu ai i na tu'aa hage. 28 Noka te matataku ki na pegea manga taa na tino kae he'e taa na ma'ugi, kae manga matataku atu kia God e 'aonga te hai songo ngatahi e Ia na tino ma na ma'ugi i te ugaimami. 29 Te tokagua mi'i manu manga 'aonga te tau'i i he mi'i mane e tasi. Masi'igoa e konei na noho, kae kago he'e toiho ai he launatasi ki te kege i taha i te kumu o te Tamana o 'outou. 30 He'e po na gau 'ugu o 'outou manga na'a e Ia 'ona taunga. 31 Kae noka tautou matataku, na'e koutou hu'ai gaoi toto'a kia te 'Aitu o sigi i na mi'i manu e 'eha.
32 “Koai kago 'atigongo ia te Au i 'ago ia pegea, koia e hai kau go 'atigongo ai i 'ago ia Tamau e noho i te gangi. 33 *10.33 2 Tim 2.12.Ka koai kago haka si'ai ia te Au i 'ago i ba'i pegea, e hai kau go haka si'ai 'ia ia te ia i 'ago ia Tamau e noho i te gangi.
34 “Noka te tegeu'a ake e to'o mai e Au te goto maagie ki te kege nei. Ko Au he'e a'u kau to'o mai 'ia te goto maagie, ka te kiba hai tau'a. 35 *10.35 Mic 7.6.Taku a'u 'anga nei, ka baghaghi ai:
te hosa ke ngatu'a ki tena tamana,
te tama 'ahine ke ngatu'a ki tena tinana,
te tama 'ahine hungabai ke ngatu'a ki tena tinana hungabai.
36 Na makau o te pegea kago hai i na 'atima'ogi o'ona.
37 Koai e ma'ine kia te tamana po kia te tinana o sigi ia te Au, e he'e 'aonga te tata'o ia te Au; koai e ma'ine ki tena hosa po ki tena tama 'ahine o sigi ia te Au, koia e he'e 'aonga te tata'o ia te Au. 38 *10.38 Mt 16.24; Mk 8.34; Lk 9.23.Ka koai e he'e 'amo tena kros o 'agu mai ia te Au, koia e he'e 'aonga te hai ai mo'oku he pegea. 39 *10.39 Mt 16.25; Mk 8.35; Lk 9.24; 17.33; Jn 12.25.Koai manga kumu i te ma'ugi, e hai ke go he'e kitea. Ka koai e hai ti'aki te ma'ugi i te ghaghi ia te Au, e hai ke go ga'u eia te ma'ugi.
40 *10.40 a Lk 10.16; Jn 13.20; b Mk 9.37; Lk 9.48.“Koai kago haka pogo ia te koutou, e haka pogo eia ia te Au. Ka koai e haka pogo eia ia te Au, e haka pogo ia te Ia noko haka to'o mai ia te Au. 41 Ka koai e haka pogo eia he taauga, i te tegeu'a ake ia, te taauga tenei, e hai ke go ga'u eia te giu'aki o te taauga. Ka koai e haka pogo eia he pegea haka tinogaoi, i te tegeu'a ake ia, te pegea haka tinogaoi tenei, e hai ke go ga'u eia te giu'aki o te pegea haka tinogaoi. 42 Ka koai e haiga'a eia he momo bai gogohi i he kapu ki he mi'i pegea i oku pegea nei, i te tegeu'a ake ia, tenei te pegea haka ako o 'Oku, ko Au e gea maa'ogi kia te koutou, e hai ke go ga'u eia tena giu'aki.”
*10:4 10.4 te ‘zealot’, te pegea i te tu'uganga noko he'e siahahai ki Rome
*10:10 10.10 1 Cor 9.14; 1 Tim 5.18.
*10:14 10.14 Acts 13.51.
*10:15 10.15 a Mt 11.24; b Gen 19.24-28.
*10:15 10.15 Lk 10.4-12.
*10:16 10.16 Lk 10.3.
*10:17 10.17 Mk 13.9-11; Lk 12.11,12; 21.12-15.
*10:21 10.21 Mk 13.12; Lk 21.16.
*10:22 10.22 a Mt 24.9; Mk 13.13; Lk 21.17; b Mt 24.13; Mk 13.13.
*10:24 10.24 a Lk 6.40; b Jn 13.16; 15.20.
*10:25 10.25 Mt 9.34; 12.24; Mk 3.22; Lk 11.15.
*10:26 10.26 Mk 4.22; Lk 8.17.
*10:33 10.33 2 Tim 2.12.
*10:35 10.35 Mic 7.6.
*10:38 10.38 Mt 16.24; Mk 8.34; Lk 9.23.
*10:39 10.39 Mt 16.25; Mk 8.35; Lk 9.24; 17.33; Jn 12.25.
*10:40 10.40 a Lk 10.16; Jn 13.20; b Mk 9.37; Lk 9.48.