PƆLU 'LƐTRƐ 'LA ꞊KPAA GALASI 'KLƐƐN 'Ɛ 'YI ZESU 'YI MU 'Ɛ NI
Pɔlu 'lɛtrɛ 'la ꞊kpaa Galasi 'klɛɛn 'ɛ 'yi Zesu 'yi mu 'ɛ ni 'bhɛ ŋgblo
Pɔlu ‑le Galasi 'klɛɛn 'ɛ 'yi Zesu 'yi mu 'ɛ ꞊kpaa 'eke‑ ta ‑lɛ ma ‑lɛ ma. Galasi 'klɛɛn 'ɛ 'yaa‑ Azi 'klɛɛn 'ɛ drɛyi' yrɛ 'la ‑o 'bhɛ sii ‑zɔn Tuuki 'klɛɛn 'bhɛɛ‑ 'le. Pɔlu ‑le Zesu Krisi a ‑Jan 'Nrale‑ 'ɛ ꞊lwa ꞊woa 'woo‑ Galasi ꞊nɔɔ mu 'ɛ ni ‑yaa' 'taa ꞊lwa mi 'ɛ ta, 'bhɛɛ‑ ‑woo ꞊kpaa Krisi 'yi.
Pɔlu 'yee‑ 'lɛtrɛ 'lɛɛ ꞊kpaa 'waati 'la ba, 'ke mɛɛ 'ke mu ‑o Galasi Zesu 'yi mu 'ɛ 'yrɛbatɛdɔ 'zi. 'Bhɛ mɛɛ mu 'ɛ 'yaa‑ ‑a zi 'bhii‑ Zuufu mu 'la ꞊wlaa Zesu 'yi 'mu laa 'ploolɛ‑ Moizi a 'toŋ mu 'ɛ 'pegee Zuufu mu 'si ta ‑za mu 'ɛ 'klɔsikunle ma. 'Bhɛɛ‑ 'mu 'yaa‑ zi 'ezin‑ 'bhii‑ Zuufu kle mu 'la ꞊wlaa Zesu 'yi 'mu Moizi a 'toŋ mu 'ɛ 'klɔsikun kpaŋma, 'bhɛ ‑o 'mu wla kpaŋma 'klɛɛn 'yi 'bhii‑ Zuufu mu 'ɛ gbɛɛn‑. 'Duŋ‑ ‑waa' mɛɛ daangbɛya 'ɛ gole ‑yaa Pɔlu Zesu Krisi a ‑Jan 'Nrale‑ 'la ꞊woa 'woo‑ Galasi Zesu 'yi 'mu 'ɛ ni bhɛ ma. 'Bhɛɛ‑ Galasi Zesu 'yi mu 'ɛ 'ke mu 'taawole ‑saan gban bi 'woo‑ mɛɛ mu 'ɛ ‑waa' daangbɛya 'ɛ 'ta. 'Bhɛla‑ ‑zayile, Pɔlu 'lɛtrɛ 'lɛɛ‑ ꞊kpaa ‑o ni 'kooko‑ ‑ya 'kpankpanyan ‑o ma dɔɔ 'kpaleya do ‑kplɛn 'kpɔ ‑la ma Krisi 'yi 'bhɛɛ‑ ‑Waanbhaa' mɛɛ ‑lɛdɔɔle ye ‑a ‑yrɛ 'yi. 'Yee‑ Pɔlu ‑yaa' 'lɛtrɛ 'ɛ 'yiciɛnna ‑lɛ ‑gbɛnɛ yaga:
‑A ‑lɛ ꞊lwa mi 'ɛ 'yi (Galasi 1-2), 'yee‑ Pɔlu, Zuufu 'kpee 'yi ‑kpɔsɔɔ 'gbu 'ɛ ꞊kla gɔnɛ‑ 'la gbɛɛn‑ Zesu a winbɔwo mi 'le Zuufu kle mu 'ɛ ba, ‑e 'bhɛ 'yipia꞊. Pɔlu 'kpee ma, ‑Waanbhaa' laa bhaaplɛŋ mu ye mɛɛ ‑lɛdɔɔle mu 'le ‑waa' Zuufu mu a 'toŋ mu ‑klɔsikunle ma, 'duŋ‑ ‑yoo ye mɛɛ ‑lɛdɔɔle mu 'le ‑waa' 'kpaleya do ‑kplɛn 'kpɔ 'ɛ 'bhɛɛ‑ ma Zesu Krisi 'yi.
‑A ‑lɛ plɛ mi 'ɛ 'yi (Galasi 3-4), Pɔlu ‑o Moizi a 'toŋ mu 'ɛ 'pegee ‑Waanbhaa' ‑liiwli' ‑za ‑glɔɔya' mu 'ɛ dan 'zi 'eke‑ ma. 'Ali‑ 'ke Moizi a 'toŋ mu 'ɛ bhɔ bhaaplɛŋ ba ‑Waanbhaa' dɔlele, 'yee‑ ‑Waanbhaa' 'a ‑zrɔnna ‑kɔɔ' ni 'bhii Abraamu 'bhɛ 'kpalawoa 'yee‑ ‑Waanbhaa' ‑liiwli' 'ɛ 'yi, 'bhɛɛ‑ ‑e 'bhɛ ꞊kwan mɛɛ ‑lɛdɔɔle 'le ‑a ‑yrɛ 'yi; 'bhɛ ꞊kla 'ke ‑yaa 'toŋ mu 'ɛ 'lɛnalɛ ‑li 'yee‑ Moizi ni.
‑A ‑lɛ yaga mi 'ɛ 'yi (Galasi 5-6), ‑Waanbhaa' bhaaplɛŋ mu ꞊bwa ‑o 'gbu ma gɔnɛ‑ 'la gbɛɛn‑ ‑o 'pegee Krisi a 'kpaledomaya 'ɛ 'yi, Pɔlu ‑o 'bhɛ 'yipe zii'. Wlan 'ɛ ni, ‑kɔɔ' ‑kɔɔ' 'kpalawoa Krisi 'yi, 'bhɛ ‑le ‑kɔɔ' ꞊bwa ‑kɔɔ' 'gbu ma. 'Duŋ‑ ‑kɔɔa' boleya 'ɛ ‑kɔɔ' 'gbu ma 'ɛ, 'bhɛ win ‑le dɔɔ 'ke ‑kɔɔ' ‑vindo' mi ‑za sɔ ‑kɔɔ' ni, 'bhɛɛ‑ 'ke ‑kɔɔ' 'bhɛ 'nrayiza klɛ. Pɔlu zruwlaa‑ Galasi Zesu 'yi mu 'ɛ 'kpee 'ke ‑ya pe 'mu ni dɔɔ 'mu 'laa 'mu 'trɔnkpalɛ bhla ma Zuufu mu daan mu 'ɛ ni, 'bhɛɛ‑ ‑yoo ‑liala 'ezin‑ dɔɔ ‑woo ‑yrɛkpa' ‑o 'gbu ba 'woo‑ bhla ma Zuufu daan mu 'ɛ ‑zayi', 'bhɛ 'pegee 'ke ‑o bo ‑waa' 'kpaleya 'ɛ Krisi 'yi 'bhɛ ta.
1
Pɔlu ‑o Galasi mu 'ɛ 'pubɔ‑ 'zi
1 'Mi Pɔlu 'la ꞊kla Zesu Krisi a winbɔwo mi 'le, mi ‑le 'lɛtrɛ 'lɛɛ‑ 'kpa zii' 'ka mu ni. 'Mi ‑o ‑yaa' winbɔwo mi 'la 'le bhe, 'bhɛ 'laa dalɛ bhaaplɛŋ ba, 'bhɛ 'pegee bhaaplɛŋ laa 'mi bɔlɛ 'bhɛ ye 'ɛ ta. 'Duŋ‑ 'bhɛ ‑daa Zesu Krisi 'gbu 'pegee ‑kɔɔ' Dɛ ‑Waanbhaa' 'la 'a ‑bwela gale 'mu ‑la ba. 2 'Mi 'pegee 'ŋ nɛɛnɛ‑ Zesu 'yi mu 'la 'kpɛn ‑o ‑gɛ, 'o mɔɔ ‑le 'lɛtrɛ 'lɛɛ 'kpa zii' Galasi 'klɛɛn 'ɛ 'yi Zesu 'yi mu 'ɛ ni. 3 Bhaa ‑kɔɔ' Dɛ ‑Waanbhaa' 'pegee Mɛɛzan Zesu Krisi ‑li 'ka ma, 'bhɛɛ‑ ‑o yilabla 'na 'ka ni. 4 Zesu Krisi ‑le ‑a 'gbu ꞊naa 'ke 'sraka 'le ‑kɔɔa' ‑za 'yɔɔ‑ mu 'ɛ ma, 'kooko‑ ‑e ‑kɔɔ' go 'drunyan 'lɛɛ‑ 'yi za ‑yɔɔ' mu 'ɛ 'yi. ‑E 'bhɛ ꞊kla 'bhɛ gbɛɛn‑ bhe, 'kooko‑ ‑e ‑kɔɔ' Dɛ ‑Waanbhaa' zru maza 'ɛ klɛ. 5 Bhaa 'tɔbhɔleya bo 'yee‑ ‑Waanbhaa' ni 'waati 'ɛ 'kpɛn ba! Amiina!
‑Jan 'Nrale‑ 'ɛ ‑yoo do 'kpɔ
6 'Ŋ nɛɛnɛ‑ mu, ‑Waanbhaa' 'la 'ka 'siila‑ Krisi a lileya 'ɛ ma, 'ka 'ka ‑zanta' 'la ‑dwa 'bhɛ ni ‑gun blaale‑ gɔnɛ‑ 'la gbɛɛn‑, 'bhɛɛ‑ 'ka 'niinaa ‑Jan 'Nrale‑ ‑bhɛɛke' zi, 'bhɛ 'mi 'liibhaala 'ŋ ma 'egbɛnɛle. 7 Wlan 'gbu 'ɛ ni, ‑Jan 'Nrale‑ 'bhɛɛke 'laa ‑o 'sekeseke Krisi a pɛ 'ɛ blaan. 'Ŋ 'yoo‑ 'bhɛ 'pe zii' 'bhɛ gbɛɛn‑ win 'la ma bhe, ‑amasrɔyi mɛɛ 'ke mu ‑o 'ka zrubatɛdɔ 'zi. 'Bhɛɛ‑ ‑wa zi 'bhii‑ ‑Jan 'Nrale‑ 'la ‑yoo Krisi ba zayi' ‑o 'bhɛ mabɔɔ. 8 'Duŋ‑ 'o ‑Jan 'Nrale‑ 'la ꞊woa 'ka ni, 'ali‑ 'kee‑ ꞊kla 'o mɔɔ 'gbu 'le oo, 'kee‑ ꞊kla ‑mlɛkɛ' do ‑la ‑le 'ke 'bhɛ ‑daa laflɛ' 'yi, 'bhɛɛ‑ 'bhɛ ꞊nwa ‑Jan 'Nrale‑ ‑bhɛɛke' do wolɛ 'ka ni 'ke 'bhɛ gole ‑o 'kɛlɛɛ‑ ma, bhaa ‑Waanbhaa' a 'daŋgan 'ɛ bala‑ 'bhɛ zan ta. 9 'O 'bhɛ ‑jan 'ɛ ꞊woa 'ka ni, 'bhɛɛ‑ 'mi ‑o bɔ 'zi ‑a ta 'ezin‑ 'ke 'an pe 'ka ni dɔɔ: 'Ka ‑Jan 'Nrale‑ 'la ꞊maa 'o 'lii, 'bhɛɛ‑ 'ka ‑dwa ‑a ‑la, 'ke mɛɛ 'oo mɛɛ 'la zan ‑Jan 'Nrale‑ ‑bhɛɛke' ꞊woa 'ka ni, 'bhɛɛ‑ 'ke 'bhɛ gole ‑o 'kɛlɛɛ‑ ma, bhaa ‑Waanbhaa' a 'daŋgan bala‑ 'bhɛ zan ta.
10 'Bhɛ ya 'ɛ 'yi 'saanibhe, 'mi ‑o bhaaplɛŋ mu ‑la zrubhɔ yrɛ ‑glin 'zi 'ŋ 'gbu ma taa‑ 'ŋ 'yoo‑ ‑Waanbhaa' ‑la zrubhɔ yrɛ ‑glin 'zi 'ŋ 'gbu ma ɛɛ? 'Duŋ‑ 'kee‑ 'kpa bi 'bhii‑ 'ŋ 'yoo‑ ‑o bhaaplɛŋ mu ‑la zrubhɔ yrɛ ‑glin 'zi 'ŋ 'gbu ma, 'naa ‑yaa nu klɛlɛ Krisi a yewonɛ 'le.
PƆLU ‑O ‑JAN 'NRALE‑ 'Ɛ TA GWLEDAN 'ZI
Waanbhaa' Pɔlu makwan‑ gɔnɛ‑ 'la gbɛɛn‑ Krisi a winbɔwo mi 'le
11 'Ŋ nɛɛnɛ‑ mu, 'ŋ 'yoo‑ ‑a zi' 'bhii‑ 'kaa 'yaango‑ 'bhii‑ 'ŋ 'yoo‑ ‑Jan 'Nrale‑ 'la 'wo zii' 'ka ni, 'bhɛ 'laa ‑o 'ke bhaaplɛŋ 'kpeejan‑ 'le. 12 'Bhɛɛ‑ 'mi 'laa 'bhɛ 'srɔɔwolɛ mɛɛ 'kedo‑ 'kpɔ 'kɔɔ, 'bhɛ 'pegee mɛɛ 'kedo‑ 'laa 'ŋ daanlɛ 'kɛle‑. 'Duŋ‑ Zesu Krisi 'gbu ‑le 'a ‑zrɔnna 'ŋ ni.
13 'Duŋ‑ 'ŋ 'yaa‑ Zuufu mu a 'seri 'ɛ 'yi 'waati 'la ba 'elwale ‑sɔ, 'bhɛɛ‑ 'ŋ 'yaa‑ 'taawo‑ gɔnɛ‑ 'la gbɛɛn‑, 'bhɛɛ‑ 'ŋ 'yaa‑ ‑yrɛnkpa' 'eyɔɔle ‑Waanbhaa' a Zesu 'yi mu ‑lɛdo' 'ɛ ta 'ke 'an kan ‑a ‑daŋ' ta, 'kooko‑ 'mi ‑o 'siɛ‑, 'ka 'gbu 'mu ꞊maa. 14 'Bhɛ 'waati 'ɛ ba, 'o 'pegee mɛɛ 'la zan mu ‑yaa 'flan ma do, 'ŋ 'yaa‑ 'kan 'mu ‑bebe ta ‑kɔɔa' Zuufu mu a 'seri ta za mu 'ɛ ‑klɔsikunza 'ɛ 'yi. 'Bhɛɛ‑ 'ŋ 'yaa‑ ‑kɔɔ' ‑gbɔɔ mu 'si ta za mu 'ɛ ‑vavadɛ 'kee‑ 'kan ‑o 'kpɛn ta.
15 'Duŋ‑ ‑e ꞊swa ‑Waanbhaa' ni 'kee‑ 'mi makun 'ŋ 'yale‑ ‑lɛɛ, 'bhɛɛ‑ ‑e ꞊lia 'mi ma 'kee‑ 'mi klɛ ‑yaa' pɛ yewonɛ 'le. 16 'Bhɛɛ‑ ‑e 'sɔlawoa ‑a ni 'ke ‑ya gbe 'ɛ zrɔn 'mi ni kpataakpa, 'kooko‑ 'ŋ 'bhɛ 'a ‑Jan 'Nrale‑ 'ɛ 'wo Zuufu kle mu 'ɛ ni, 'naa gelɛ mɛɛ 'kedo‑ 'lrɔkpalɛ 'ŋ ꞊lia zayi' 'bhɛ 'waati 'ɛ ba. 17 'Bhɛɛ‑ mɛɛ 'la zan mu ꞊kla Zesu a winbɔwo mu 'le 'mi 'lɛɛ, 'naa gelɛ Zeruzalɛmu 'mu ba 'mu 'lrɔkpa zayi'. Drɔɔn' 'ŋ ‑ja blaale 'pe Arabu 'klɛɛn 'ɛ 'yi, 'bhɛɛ‑ boolazi 'ŋ 'niinaa‑ Damasi ‑wa 'ɛ ta. 18 'Fɔ lɛɛ yaga 'kanle‑ blaan, 'bhɛɛ‑ 'ŋ ‑ja 'tɛ Zeruzalɛmu, 'kooko‑ 'mi 'pegee Piɛri 'eke‑ dɔ. 'Ŋ ‑gbɛɛyi' plɛ ‑kla ‑a ‑din 'bhɛ ꞊nɔɔ ye. 19 'Yee‑ blaan, 'naa Zesu a 'winbɔwo mi 'bhɛɛke do 'kpɔ 'yelɛ‑ 'bhɛ 'waati 'ɛ ba, 'ke yaa 'e go Mɛɛzan ‑nwagwlɛn' Zaki do ‑kplɛn ba. 20 'Ŋ 'sɔwɛɛ‑ 'gbu 'ɛ ma, ‑Waanbhaa' ‑o 'ŋ 'srɛ 'le, 'bhɛɛ‑ 'mi ‑o ‑jan 'la 'wo zii' 'ka ni 'lɛtrɛ 'lɛɛ‑ 'yi ‑gɛ, bhla laa 'ke 'bhɛ 'le.
21 'Bhɛ 'taa 'ɛ blaan, 'ŋ ‑ja Siri 'klɛɛn 'ɛ 'yi, 'ŋ gole 'bhɛ ꞊nɔɔ, 'ke 'ŋ gele‑ Silisi 'klɛɛn 'ɛ 'yi. 22 'Duŋ‑ 'bhɛ 'waati 'ɛ ba, Zesu 'yi mu ‑lɛ mu 'la 'yaa‑ Zude 'klɛɛn 'ɛ 'yi, 'mu 'laa ‑yaa 'mi dɔ 'ŋ wlɛyi' ma. 23 ‑Wa ꞊maa drɔŋ mɛɛ 'ke mu ta dɔɔ: «Mɛɛ 'la zan ‑yaa ‑yrɛnkpa' ‑kɔɔ' ta 'elwale ‑sɔ Zesu a ‑za 'ɛ 'yi, 'bhɛɛ‑ ‑e 'kee‑ ‑yaa zi' 'bhii‑ ‑e 'kpaleya Zesu 'yi 'ɛ siɛ, ‑yoo 'bhɛɛ‑ 'kpaleya ‑Jan 'Nrale‑ 'ɛ 'wo zii' ‑zɔn.» 24 'Bhɛɛ‑ 'bhɛ Zesu 'yi mu ‑lɛ mu 'ɛ 'yaa‑ ‑Waanbhaa' 'tɔbhɔ‑ zii' 'mi ba zayi'.