ZESU ‑ZA MU 'LA ‑ZRƆNNA ZAAN NI, 'BHƐƐ‑ ‑YOO YƆƆNDIA‑ 'MU ‑LE ‑GƐ
‑Yrɛ zi yele 'sɛwɛ 'ɛ ŋgblo
Zesu Krisi a *winbɔwo mi Zaan ‑le 'lɛtrɛ 'lɛɛ‑ ꞊dia, 'bhɛɛ‑ ‑ya ‑kpaa Zesu 'yi mu ‑lɛ 'srwaplɛ 'la 'yaa‑ Azi 'klɛɛn 'ɛ drɛyi' yrɛ 'la ‑o 'bhɛ sii ‑zɔn Tuuki 'bhɛ ꞊nɔɔ 'mu ni. 'Bhɛ 'waati 'ɛ ba, Romɛ mu a ‑bhleŋgbe ‑gbɛnɛ 'ɛ 'yaa‑ ‑yrɛnkpa' zii' Zesu 'yi mu 'ɛ ta. ‑O 'yee‑ Zaan 'gbu ꞊kwan, 'bhɛɛ‑ ‑wa ꞊kla 'ke ‑kaso 'yi mi 'le, 'bhɛɛ‑ ‑o ‑ja 'kɛle‑ wɛyi‑ 'mliŋgole ‑yaa 'klɛɛn gbɛ do 'la zi 'bhɛ ꞊nɔɔ; ‑o ‑yaa 'bhɛ 'klɛɛn gbɛ do 'ɛ sii Patimɔsi. Zaan ‑yaa 'bhɛ yrɛ 'ɛ ꞊nɔɔ 'waati 'la ba, 'ke Mɛɛzan Zesu Krisi 'pwɛle ‑a ba ‑yrɛ zi yele do 'yi. 'Bhɛɛ‑ 'bhɛ 'a ꞊pia ‑a ni dɔɔ ‑e ‑za 'la ꞊ya ‑e 'bhɛ ‑yɔɔndɛ. 'Lɛtrɛ 'ɛ 'yi, Zaan 'a ꞊pia Zesu 'yi mu 'ɛ ni dɔɔ Zesu 'laa nu ‑a tadɔlɛ nule ma ‑li. 'Bhɛɛ‑ ‑yoo zan nulɛ ‑a ‑nɛ mu 'ɛ golɛ 'kiti 'la 'bhɛ ‑o zan baalɛ mɛɛ wlan mu 'pegee mɛɛ ‑yɔɔ' mu ta 'bhɛ 'yi, 'bhɛ 'kiti 'ɛ 'bhɛ ‑le 'kiti ‑daŋ' ma pɛ 'la ‑yoo ‑Setran' 'pegee ‑yaa' pɛ mu 'ɛ 'kpɛn ma 'bhɛ 'le. Zesu nu nulɛ pɛ 'tɔle‑ pɛ 'ke 'bhɛ ‑gaale' laa ‑o laanima ‑Bhleŋgbeya ‑wa 'ɛ ba 'bhɛ 'siɛlɛ‑.
'Yee‑ 'lɛtrɛ 'lɛ ꞊lwa mi 'ɛ 'yi, Mɛɛzan Zesu 'pwɛla‑ yee‑ Zaan ba gɔnɛ‑ 'la gbɛɛn‑, ‑e 'bhɛ 'yigɔɔnna.
Zaan ‑yaa' 'lɛtrɛ 'ɛ 'yiciɛnna ‑lɛ 'srwaplɛ‑. 'Bhɛɛ‑ ‑e 'bhɛ 'lɛ 'srwaplɛ‑ 'ɛ 'kpɛn do do ‑yiciɛnna ‑lɛ 'srwaplɛ‑ 'ezin‑. 'Woo‑ ‑lɛ 'srwaplɛ‑ 'ɛ 'wole‑ ‑gɛ:
1. 'Lɛtrɛ 'srwaplɛ‑ 'la Zaan 'mu ꞊kpaa Azi 'klɛɛn 'ɛ 'yi Zesu 'yi mu ‑lɛ 'srwaplɛ‑ 'ɛ ni (‑A ‑lɛ 2-3)
2. 'Sɛwɛ kpo 'ɛ blɔɔyrɛ 'srwaplɛ‑ (‑A ‑lɛ 4.1–8.6)
3. ‑Klɛloŋ' 'srwaplɛ‑ (‑A ‑lɛ 8.7–11.19)
4. ‑Tɔɔmasie ‑gbɛnɛ 'srwaplɛ‑ (‑A ‑lɛ 12.1–15.8)
5. ‑Waanbhaa' a yran pɛyan‑ 'srwaplɛ‑ (‑A ‑lɛ 16.1-20)
6. Babilɔni ma ‑jan 'srwaplɛ‑ (‑A ‑lɛ 17.1–19.10)
7. ‑Yrɛ zi yele ‑daŋ' ma pɛ 'srwaplɛ‑ 'drunyan 'lɛyan bhla 'ɛ ba zayi' (‑A ‑lɛ 19.11–22.5).
'Sɛwɛ 'ɛ 'lɛyanyrɛ 'ɛ ꞊nɔɔ, Zesu 'a 'liiwli‑ ꞊naa ‑a nuza 'ɛ ta dɔɔ: «‑A ‑vinbwa sa 'bhɛɛ‑ 'ŋ 'nu gbɛ drɛɛwo!» Zesu 'yi mu 'ɛ 'kpɛn 'a pe 'eke‑ zi dɔɔ: «Mɛɛzan nu!»
1
‑Jan 'ɛ zisanyrɛ
1 Gaanyiza mu 'la 'yaa‑ zan bhɔlɛ, 'ke Waanbhaa' 'mu tapwɛla Zesu Krisi ni 'kaa ‑yoo zrɔn ‑yaa' yewonɛ 'ɛ ni 'mu ‑le ‑gɛ. Zesu ‑yaa' ‑mlɛkɛ' 'ɛ winbwa‑ ‑yaa' yewonɛ Zaan ba dɔɔ 'bhɛ 'nu 'woo‑ ‑za mu 'ɛ zrɔn 'yee‑ Zaan ni. 2 'Mi Zaan ‑za 'oo ‑za mu 'la 'kpɛn ꞊ya, 'ŋ 'mu 'kpɛn ꞊woa. 'Bhɛ ‑za mu 'ɛ 'mu ‑le ‑Waanbhaa' ‑jan 'la ꞊klaa 'mi 'kɔɔ, 'bhɛ 'pegee Zesu Krisi wlan 'la ‑zrɔnna 'mi ni, 'mu 'le. 3 'Ke mɛɛ 'la zan ‑jan mu 'la ‑daa ‑Waanbhaa a 'Sɛwɛ 'ɛ 'yi 'mu tape mɛɛ mu ni, 'bhɛ zan a pɛ ‑yinra'! 'Bhɛɛ‑ 'ke mɛɛ 'la zan mu ‑o 'trɔnkpaa‑ 'woo‑ ‑jan mu 'ɛ ꞊la, 'bhɛɛ‑ 'ke ‑woo ‑klɔsikwan, 'bhɛ zan mu a pɛ ‑yinra' 'ezin‑! ‑Amasrɔyi 'woo‑ ‑za mu 'ɛ klɛ yi 'la dɔle ‑o, 'bhɛ ꞊bhwa gban ‑wa ‑din.
Zaan ‑o Zesu 'yi mu ‑lɛ 'srwaplɛ‑ 'ɛ 'pubɔ‑ 'zi
4 'Mi Zaan ‑le 'lɛtrɛ 'lɛɛ‑ 'kpa zii' *Azi 'klɛɛn 'ɛ 'yi Zesu 'yi mu ‑lɛ 'srwaplɛ‑ 'ɛ ni. 'Mi 'ka 'pubwa‑ ‑Waanbhaa' 'tɔ 'yi; 'yee‑ 'la ‑ya ‑yrɛ ma yikpɛnsee ta, ‑e ‑yaa 'elwaleta ‑sɔ, 'bhɛɛ‑ ‑yoo zan nulɛ, bhaa ‑e ‑li 'ka ma, 'bhɛɛ‑ ‑e yilabla 'na 'ka ni! 'Bhɛɛ‑ lii 'srwaplɛ‑ 'la dulale ‑o ‑yaa' ‑bhleŋgbe 'yaakpe‑ 'ɛ 'lɛ ma, bhaa 'mu 'li 'ka ma, 'bhɛɛ‑ 'mu yilabla na 'ka ni 'ezin‑. * 1.4 Lii 'srwaplɛ‑ 'ɛ 'mu ‑o ‑we 'zi 'ke Lii 'Weŋ 'ɛ 'bhɛɛ‑ 'le. 5 Bhaa Zesu Krisi ‑li 'ka ma, 'bhɛ 'pegee ‑e yilabla 'na 'ka ni. 'Yele‑ 'ke ‑Waanbhaa' 'srɛ 'ɛ 'le, 'bhɛɛ‑ ‑a zru ‑o do 'bhɛ ni; 'bhɛɛ‑ 'yela‑ ‑lwa ‑bwela gale ba. 'Yele‑ 'ke 'trɛ ta ‑bhleŋgbe mu 'ɛ 'kpɛn a ‑Bhleŋgbe 'le. ‑Kɔɔ' ‑za sɔ 'yela‑ ni, 'bhɛɛ‑ 'yele‑ ‑kɔɔ' ‑gwa ‑kɔɔa' ‑za 'yɔɔ‑ mu 'ɛ 'yi a yiɛn 'la 'klalaa‑ a gayrɛ 'ɛ ꞊nɔɔ 'bhɛ 'le. 6 'Bhɛɛ‑ 'yele‑ ‑kɔɔ' ꞊kla 'ke *'sraka 'lɛna mu 'pegee ‑Waanbhaa' a ‑bhleŋgbeya ‑wa 'ɛ ta mu 'le; 'kooko‑ ‑kɔɔa' Dɛ ‑Waanbhaa' gba. Bhaa 'tɔbhɔleya 'pegee ‑glɔɔya' bo Zesu Krisi ni ‑zɔn 'pegee yikpɛnsee ta! Amiina!
7 ‑Ka 'ka 'yrɛkpa doo, ‑e nu nulɛ laflɛ' ‑gblɛn mu 'ɛ 'yi! Mɛɛ 'tɔle‑ mɛɛ 'bhɛ nu ‑a yelɛ, 'ali‑ 'kee‑ kpa mɛɛ 'la zan mu 'kpɛn 'a ꞊pwan ‑a 'siɛn 'yi 'ke ‑dibhɛ' 'le bhe 'mu 'kpɛn ta.
'Trɛ ta ‑gbaa mu 'ɛ 'kpɛn nu wisilɛ ‑zadɔwɛɛ 'kɔɔ ‑a ba ‑zayi'. ‑E nu klɛlɛ 'bhɛɛ‑ gbɛɛn‑ ‑gee' 'tɛ!
Amiina!
8 Mɛɛzan ‑Waanbhaa' 'Seŋkpɛnzan pe dɔɔ: «'Mi ‑le Alifa 'pegee Omega 'le», 'bhɛ 'yi ‑le dɔɔ ‹‑za zisanyrɛ, 'pegee ‑za 'lɛyanyrɛ›. † 1.8 Alifa 'pegee Omega ‑o 'ke Grɛki mu a 'sɛwɛbhɛ ‑lwa 'pegee waa 'sɛwɛbhɛ ‑daŋ' ma pɛ 'ɛ 'mu ‑la ‑le. ‑Ya ‑yrɛ ma ‑zɔn, 'bhɛ 'pegee ‑e ‑yaa ‑a ‑yrɛ ma 'elwaleta ‑sɔ, 'bhɛɛ‑ ‑yoo zan nulɛ!
Zaan Krisi ꞊ya ‑yrɛ zi yele do 'yi
9 'Mi Zaan ‑o 'ke 'ka nɛɛnɛ‑ 'le. 'Mi 'pegee 'ka mu nii‑ 'ɛ 'kpale‑ ‑o do ma Zesu a ‑yrɛnbhlele ma, 'bhɛ 'pegee ‑yaa' ‑bhleŋgbeya 'ɛ 'yi, 'bhɛɛ‑ ‑yaa' ‑yrɛn 'yikunle 'ɛ 'yi. ‑Woo 'ŋ ꞊kwan 'bhii‑ ‑kaso 'yi mi do, 'bhɛɛ‑ ‑o ‑ja 'ŋ 'le Patimɔsi 'klɛɛn 'ɛ 'yi: wɛyi‑ 'mliŋgole ‑yaa 'bhɛ 'klɛɛn 'ɛ zi. 'Ŋ 'kun win 'ɛ 'bhɛ ‑le ‑yaa 'kaa 'ŋ ‑Waanbhaa' a ‑jan 'ɛ꞊woa mɛɛ mu ni, 'bhɛ 'pegee 'ŋ Zesu 'srɛya‑ ꞊kla. 10 Mɛɛzan gba yi 'ɛ 'le, Lii 'Weŋ 'ɛ ‑zinaa' 'ŋ ta, 'bhɛɛ‑ 'ŋ ‑weli' do ‑maa 'ŋ ‑zanta' 'eglɔɔle, 'bhɛɛ‑ 'bhɛ 'yaa‑ ‑we zii' 'bhii‑ ‑klɛloŋ' 'pɛnwli‑ gbɛɛn‑. 11 'Bhɛ ‑weli' 'ɛ 'yaa‑ pe 'zi 'ŋ ni dɔɔ: «'E pɛ 'la 'yele‑ 'bhɛ yɔɔndɛ 'sɛwɛ do 'yi, 'bhɛɛ‑ ‑ya kpa Zesu 'yi mu ‑lɛ 'srwaplɛ‑ 'la ‑woo *Azi 'klɛɛn 'ɛ 'yi 'mu ni: 'kɛ mu 'la ‑woo Efɛzi ‑wa 'ɛ ta oo, Simiini oo, Pɛɛgamu oo, Tiatiri oo, Saadɛsi oo, Filadɛlifi oo, 'bhɛɛ‑ Laodise.»
12 'Mi 'ŋ 'yrɛ 'mliŋgole 'ŋ zi, 'kooko‑ mɛɛ 'la zan ‑yaa ‑janwo' zii' 'ŋ ni 'ŋ 'bhɛ 'ye. 'Ŋ 'bhɛ klɛle 'tɛ, 'ke 'ŋ ‑can ‑laŋbha dulapɛ 'srwaplɛ‑ yele‑. 13 Mɛɛ do dulale ‑yaa 'woo‑ ‑laŋbha dulapɛ 'srwaplɛ‑ 'ɛ pleŋ‑; 'bhɛ mɛɛ 'ɛ 'pwɛle‑ ‑yaa 'ke bhaaplɛŋ gbe do 'le. Dunɛ‑ gbɔɔn do 'la 'yaa‑ ‑a ta 'bhɛ 'yaa‑ zinaa' 'fɔ ‑a gaan ma, 'bhɛɛ‑ ‑can 'sɛntru do dɔle ‑yaa ‑a ‑bu ta. 14 ‑A win 'fleele‑ ‑yaa 'epu 'peŋpeŋle 'bhii‑ 'kwlɛn‑ ‑buu' 'flee gbɛya gbɛɛn‑. 'Bhɛɛ‑ ‑a ‑yrɛbhɛ' mu 'ɛ 'yaa‑ ‑bhi 'zi 'etɛn ‑klɛɛn' ‑klɛɛnle' 'bhii‑ 'tɛ nrɛ ‑bhigbɛya gbɛɛn‑. 15 ‑A gaan mu 'ɛ 'yaa‑ 'bhii‑ piibhɛ 'tɛn gbɛɛn‑: ‑o 'tranle‑ ‑yaa 'etɛn ‑banbanle 'bhii‑ 'ke ‑o piibhɛ ꞊bwa 'tɛ 'yi ‑e tran gɔnɛ‑ 'la gbɛɛn‑. ‑A ‑weli' 'ɛ 'yaa‑ 'eglɔɔle 'bhii‑ vlɛ ‑saa ta ‑yi 'yrole‑ ‑wegbɛya gbɛɛn‑. 16 Mlɛklɛn‑ 'srwaplɛ‑ ‑yaa ‑a gbɛ ‑yiɛ' 'ɛ ‑lii, 'bhɛɛ‑ ‑gɔkuŋbhɛ do ‑lɛ plɛ 'yaa‑ da 'zi ‑a ‑lii. ‑A wlɛyi' 'ɛ 'yaa‑ ‑bhi 'zi 'peŋpeŋ 'bhii‑ ‑yrekpaa' ‑yretɛbhɛ ‑bhigbɛya gbɛɛn‑. 17 'An 'yele‑, 'ke 'ŋ baale' ‑a gaan ma 'bhii‑ 'ŋ ‑gaa. ‑Ya gbɛ ‑yiɛ' 'ɛ ꞊kpaa 'ŋ ta, 'bhɛɛ‑ 'ke ‑ya pele‑ 'ŋ ni dɔɔ: «'Yaa ‑gblaanlɛ', 'mi ‑le 'ke mɛɛ ‑lwa mi 'ɛ 'le, 'bhɛ 'pegee mɛɛ ‑daŋ' ma mi 'ɛ 'le. 18 'Ŋ 'yoo‑ 'ŋ 'yrɛ ma. 'Ŋ ‑gaa bi, 'duŋ‑ 'ŋ 'yoo‑ ‑zɔn 'ŋ 'yrɛ ma, 'bhɛɛ‑ 'ŋ nu bolɛ 'ŋ 'yrɛ ma yikpɛnsee ta. 'Ŋ 'seŋgwa‑ 'ke ga 'le, 'bhɛɛ‑ gbaa mu a ‑wa 'ɛ 'gborobhɛ 'ɛ ‑yoo 'ŋ 'kɔɔ. 19 'E 'yrɛ ‑o pɛ 'la ma bhe, 'bhɛ yɔɔndɛ: 'kɛla 'bhɛ ‑o 'saanibhe, 'bhɛ 'pegee 'kɛla 'bhɛ nu klɛlɛ boolazi, ‑o 'kpɛn yɔɔndɛ. 20 'E mlɛklɛnnɛ 'srwaplɛ‑ 'la ꞊ya 'ŋ gbɛ ‑yiɛ' 'ɛ 'lii, 'bhɛ 'pegee 'e ‑can ‑laŋbha dulapɛ 'srwaplɛ‑ 'la ꞊ya, 'bhɛ gaanyiza mu 'ɛ 'yi ‑le ‑gɛ: mlɛklɛnnɛ 'srwaplɛ‑ 'ɛ 'mu ‑le 'ke Zesu 'yi mu ‑lɛ 'srwaplɛ‑ 'ɛ ‑waa' ‑mlɛkɛ' mu 'ɛ 'le. 'Bhɛɛ‑ ‑can ‑laŋbha dulapɛ 'srwaplɛ‑ 'ɛ 'mu ‑le 'ke 'woo‑ Zesu 'yi mu ‑lɛ 'srwaplɛ‑ 'ɛ 'le.»