18
2. ‑Jan plɛ mi: Babilɔni baayrɛ
1 'Bhɛ blaan, 'ke 'ŋ 'yrɛkpale ‑mlɛkɛ' 'bhɛɛke do ma 'kee‑ da laflɛ' 'yi. Faŋgan‑ ‑gbɛnɛ do ‑yaa ‑a 'kɔɔ; 'bhɛɛ‑ ‑a ‑lregbɛya ‑yrayra 'ɛ 'bhɛ 'trɛ 'ɛ 'kpɛn takaan‑ 'weŋ. 2 ‑E ‑gbekaan ‑a ‑weli' ‑glɔɔ do 'yi dɔɔ:
«‑E ‑klalaa', ‑e ‑klalaa', Babilɔni *18.2 Mɛɛ 'ke mu pe Babilɔni ꞊kla wi ‑glɔɔn 'ɛ 'kpɛn gaanyrɛ 'le. ‑wa ‑gbɛnɛ 'ɛ 'klalaa.
‑E ꞊kla 'zina mu a ‑wa 'le, 'bhɛɛ‑ ‑e ‑kla 'ke 'zina 'triŋle‑ 'ɛ 'kpɛn ‑glɔɔn gaanyrɛ 'le;
'bhɛ 'pegee maannɛ‑ 'yɔɔ‑ mu 'ɛ 'kpɛn ‑glɔɔn gaanyrɛ 'le, 'bhɛɛ‑ maannɛ‑ mu 'la 'kpɛn ‑za 'laa sɔ mɛɛ ni, ‑e ‑kla 'mu 'kpɛn gaanyrɛ 'le 'ezin‑.
3 ‑Amasrɔyi, 'drunyan ta mu 'ɛ 'kpɛn ‑yanbhɔɔya ꞊kla ‑a ba, 'ali‑ ‑yaa' ‑yanbhɔɔya 'flɛn 'ɛ ‑yoo 'kpɛn ꞊dia 'bhii ‑drɔɔ a mɛɛ dɛgbɛya gbɛɛn‑.
'Trɛ ta ‑bhleŋgbe mu 'ɛ ‑yanbhɔɔya ꞊kla ‑a ba, 'bhɛɛ‑ 'plɛɛgɔn‑ mu 'ɛ ꞊kla 'ke pɛzan mu 'le ‑yaa' pɛ ‑lrele' mu ‑bebeya 'ɛ ‑zayi'.»
3. ‑Jan yaga mi: Babilɔni ta ‑yrɛn
4 'Bhɛɛ‑ 'ŋ ‑weli' ‑bhɛɛke' do ꞊maa 'ke 'bhɛ da laflɛ' 'yi, 'bhɛɛ‑ 'bhɛ 'yaa‑ pe 'zi dɔɔ:
«'Mi a pɛ mɛɛ mu, ‑ka go ‑wa 'lɛɛ‑ 'kpee, 'kooko‑ 'ka 'laa nu ‑waa' ‑za 'yɔɔ‑ mu 'ɛ 'ke klɛlɛ, 'bhɛɛ‑ 'kooko‑ ‑o ta ‑klɔlɔɔ mu 'ɛ 'ke mu laa nu 'tɛnlɛ‑ 'ka ma.
5 ‑Amasrɔyi, ‑yaa' ‑za 'yɔɔ‑ mu 'ɛ 'pa gbɛ ‑yɔɔ' 'ɛ 'kɔɔ, 'mu ‑dwa 'eke‑ ta 'bhii‑ zrɛ dɔgbɛya gbɛɛn‑ 'ke 'bhɛ ge 'tɛnlɛ‑ laflɛ' ma. 'Bhɛɛ‑ ‑a klɛza ‑yɔɔ' mu 'ɛ ‑zadwa ‑Waanbhaa' 'kpee.
6 ‑E mɛɛ ‑bhɛɛke' mu ꞊kwan 'eyɔɔle gɔnɛ‑ 'la gbɛɛn‑, ‑kaa 'kun 'bhɛɛ‑ 'kungbɛya yɛkɛ‑ do 'kpɔ 'ɛ 'yi 'ezin‑; 'bhɛɛ‑ ‑kaa klɛza ‑yɔɔ' mu 'ɛ 'mu ‑la yɛkɛ‑ 'niina‑ ‑a ma ‑glɔɔn plɛ. ‑E ‑drɔɔ pɛyan‑ do 'la ꞊naa 'ka ni, ‑drɔɔ ‑glɔɔ 'la ‑glɔɔ 'yiya‑ 'bhɛ ni ‑glɔɔn plɛ ‑ka 'bhɛɛ‑ yɛkɛ‑ pɛyan‑ do na ‑a ni.
7 ‑Ya 'gbu 'tɔbhwa‑ gɔnɛ‑ 'la gbɛɛn‑, 'kee‑ bo ‑yaa' pɛ ‑lrele' 'srɛ mu 'ɛ 'trɔnbhlele ma gɔnɛ‑ 'la gbɛɛn‑, ‑ka 'bhɛɛ‑ yɛkɛ‑ ‑yrɛn 'pegee 'trɛbhɔ 'kpa ‑a ta.
‑Amasrɔyi ‑ya pe 'zi ‑a 'gbu 'kpee dɔɔ: ‹'Ŋ 'yaale‑ ‑o 'bhii‑ ‑bhleŋgbe le do gbɛɛn‑, 'naa ‑o 'ke glaanle do 'le, 'bhɛɛ‑ bheela za laa nu 'tɛnlɛ‑ ‑titi 'ŋ ma.›
8 'Bhɛla‑ ‑zayile, ‑klɔlɔɔ' mu 'lɛɛ‑ 'mu nu baalɛ ‑a ta ‑lɛyan' do 'kpɔ: Ga 'pegee bhee la za, 'bhɛɛ‑ ‑gu.
'Bhɛɛ‑ 'tɛ nu ‑a 'kpacielɛ, ‑amasrɔyi Mɛɛzan ‑Waanbhaa' 'la 'bhɛ a ‑kpan 'a ‑balaa' 'a ta 'bhɛ ‑o 'eglɔɔle.»
9 'Ke 'bhɛ ꞊kla, 'trɛ ta ‑bhleŋgbe mu 'la 'kpɛn ‑yanbhɔɔya ꞊kla ‑a ba, 'bhɛ 'pegee 'ke ‑o ꞊bwa ‑yaa' pɛ ‑lrele' ‑trɔn 'srɛ 'ɛ 'bhlele‑ ma, 'ke ‑o ‑yrɛkpaa bhla 'la ba ‑wa 'ɛ 'kpacieyrɛ 'tɛgblɛn‑ 'ɛ ma; ‑o nu wisilɛ 'ke ‑woo ‑la ma janwo ‑a ba zayi'. 10 ‑O ‑gblaanlawo zii' ‑a ta ‑yrɛn ‑gbɛnɛ 'ɛ 'lɛɛ, ‑o nu dulalɛ 'egbɔɔnle ‑a ma, 'ke ‑wa pe dɔɔ:
«'Ee ‑klɔlɔɔ' maza! 'Ee ‑klɔlɔɔ' maza! 'Ee, 'waa‑ ‑wa ‑gbɛnɛ Babilɔni 'ɛ, faŋgan‑ ma ‑wa 'ɛ!
‑Waanbhaa' a ‑kpan 'ɛ ‑balaa' 'e ta ‑lɛyan' do 'kpɔ 'bhɛɛ‑ gbɛɛn‑ ‑gee' ɛɛ!»
11 'Trɛ ta 'plɛɛgɔn‑ mu 'ɛ 'kpɛn nu wisilɛ 'ke ‑o ‑gbekan' 'yee‑ Babilɔni ‑wa 'ɛ ‑zayi', ‑amasrɔyi mɛɛ 'kedo‑ 'kpɔ 'laa nu ‑waa' 'plɛɛ gɔnpɛ mu 'ɛ 'lɔlɛ‑ 'ezin‑ ‑titi: 12 ‑waa' ‑can oo, waa ‑gɔli' 'pu oo, waa vlɛnɛ‑ ‑za ‑glɔɔ mu oo, waa ‑gbɛɛfiŋ mu oo, waa sɔ 'plɛɛle‑ fɛɛfɛɛ oo, waa sɔ 'tɛn ‑klɛɛn' ‑klɛɛn' 'pegee ‑o sɔ 'la ꞊taan 'ke ‑wlɛnnɛ' ‑buu' mu 'le oo, 'bhɛɛ‑ waa sɔ 'tɛn 'wleŋwleŋ mu. ‑Yri mu 'la 'mu yele ‑yaa la 'mu ‑glɔɔn 'ɛ 'kpɛn oo; 'bhɛ 'pegee ‑o pɛ mu 'la 'kpɛn ꞊kla 'ke bie 'sɔnbhɛ‑ 'le oo, ‑o ‑ pɛ mu 'la 'kpɛn ꞊kla 'ke ‑yri ‑za ‑glɔɔ mu 'le oo, 'bhɛ 'pegee piibhɛ 'tɛn 'le oo, 'bhɛɛ‑ piibhɛ ‑zeze 'gbu 'le oo, 'bhɛ 'pegee vlɛnɛ‑ 'pu mu 'le. 13 'Bhɛɛ‑ ‑ziɛn ba bhoyo‑ ‑gblɛn 'nrale‑ 'ɛ ‑glɔɔn 'ke mu oo, mɛɛ 'flɛ 'lre ‑yrɔn mu oo, ansansi mu oo, 'bhɛ 'pegee ansansi ‑gblɛn 'nrale‑ ‑glɔɔn plɛ 'la ‑o 'mu do sii miri, 'bhɛɛ‑ ‑wa ‑bhɛɛke' do 'ɛ sii ansansi oo; ‑drɔɔ oo, ‑yrɔn oo, ble †18.13 Ble 'ɛ 'pwɛle‑ ‑o 'ke ‑mlɔ 'le. ‑O 'bluu klɛ 'yela‑ pii 'ɛ 'le. pii 'pegee ble bhɛ oo; 'bhɛɛ‑ dri mu 'pegee ‑bhlaa mu oo, wi ‑soo' mu 'pegee gwledan ‑mazini 'mu oo; 'ali‑ lu 'pegee gwledanyrɛ nɔɔ‑ ‑kaso 'yi mu. 14 'Woo‑ 'plɛɛgɔn‑ mu 'ɛ 'kpɛn pe Babilɔni ‑wa 'ɛ ni dɔɔ: «'Ee! Pɛ mu 'la 'lrɔ ‑yaa 'e ma, 'mu ‑jilaa, 'bhɛɛ‑ 'mu 'e pleŋgwa‑ 'e ma. 'Yaa‑ pɛ ‑lrele' mu 'ɛ 'kpɛn 'pegee 'yaa‑ ‑naflo pɛ mu 'ɛ 'kpɛn ꞊nia 'e 'kɔɔ. 'Yaa nu ‑o yelɛ ‑li ‑titi.» 15 'Plɛɛgɔn‑ mu 'la ꞊kla pɛzan mu 'le 'yee‑ Babilɔni ‑wa 'ɛ ta ‑waa' yawo 'ɛ ma, 'mu nu 'mu 'pleŋgolɛ ‑a ma 'egbɔɔnle, ‑yrɛn ‑gbɛnɛ 'la nu baalɛ ‑a ta 'bhɛ 'lɛɛ ‑gblaan 'ɛ 'kɔɔ. ‑O nu 'wisilɛ 'ke ‑o ‑gbekan' 'bhii‑ ‑woo bhee la. 16 ‑O nu ‑a pelɛ dɔɔ:
«‑Kasi' ‑klɔlɔɔ' maza! ‑Kasi' ‑klɔlɔɔ' maza! ‑Wa ‑gbɛnɛ 'la ‑baale' ‑yaa 'ke sɔ 'plɛɛle‑ fɛɛfɛɛ, 'pegee sɔ 'tɛn ‑klɛɛn' ‑klɛɛn', 'bhɛ 'pegee ‑bhleŋgbe ta sɔ 'tɛn 'wleŋwleŋ mu 'yi; 'bhɛɛ‑ ‑a ‑baale' ‑yaa' 'ezin‑ 'ke ‑can ‑baa pɛ mu 'le, 'bhɛ 'pegee vlɛnɛ‑ ‑za ‑glɔɔ mu, 'bhɛɛ‑ ‑gbɛɛfiŋ mu 'yi.
17 'Bhɛ ‑naflo ‑bebe mu 'la bhe 'mu 'kpɛn 'siɛla‑ ‑lɛyan' do 'kpɔ!»
‑Batoŋ' 'bhɔ mu 'ɛ 'kpɛn, 'bhɛ 'pegee wɛyi‑ 'taa ta ge mu 'ɛ 'kpɛn, 'bhɛɛ‑ ‑batoŋ' 'yi yewo mu 'ɛ, 'bhɛ 'pegee mɛɛ 'la zan mu 'kpɛn yewo wɛyi‑ ta; ‑o 'kpɛn ‑o pleŋgwa‑ Babilɔni ‑wa 'ɛ ma 'egbɔɔnle. 18 ‑O ‑wa 'ɛ 'kpacie 'tɛgblɛn‑ 'ɛ 'yele‑, 'ke ‑wa pele‑ 'eglɔɔle dɔɔ: «'Ee! ‑O sɔ ‑wa 'ɛ ‑dela gblaanya 'kpale Babilɔni ‑wa 'ɛ ma ɛɛ?» 19 'Bhɛɛ‑ ‑o 'trɛbwe‑ ꞊sia, 'ke ‑o 'bhɛ 'klale ‑o wiiŋ‑, 'bhɛɛ‑ 'ke ‑o wisile 'ke ‑o ‑gbekan' 'bhii ‑woo bhee ‑la, 'ke ‑wa pe dɔɔ:
«'Ee ‑klɔlɔɔ' maza! 'Ee ‑klɔlɔɔ' maza! 'Yee‑ ‑wa ‑gbɛnɛ 'lɛɛ‑ 'yela‑ ta 'bhɛɛ‑ ‑batoŋ' mu ‑o mɛɛ 'la zan mu 'kpɛn 'kɔɔ wɛyi‑ ta, 'mu ꞊kla 'ke pɛzan mu 'le.
'Duŋ‑ 'yee‑ ‑wa 'ɛ 'siɛla‑ ‑lɛyan' do 'kpɔ.»
20 'Duŋ‑ 'ka mu laflɛ' 'yi mu, 'ka zrukpaale klɛ! ‑Waanbhaa' a mɛɛ 'weŋ mu oo, Krisi a winbɔwo mu oo, 'bhɛ 'pegee ‑Waanbhaa' ‑lɛla' janwo mu, 'ka 'kpɛn zrukpaale klɛ 'ezin‑!
‑Amasrɔyi ‑Waanbhaa' a ‑kpan 'ɛ ‑balaa' Babilɔni ‑wa ‑gbɛnɛ 'ɛ ta, ‑e ‑za 'yɔɔ‑ mu 'la ꞊kla 'ka ni 'mu ‑zayi'!
4. ‑Jan yiziɛ mi: Babilɔni 'siɛyrɛ‑
21 'Bhɛ klɛle 'tɛ, 'ke ‑mlɛkɛ' ‑glɔɔ do vlɛ ‑kpuŋ ‑gbɛnɛ do 'sile, 'bhɛ 'yaa‑ 'bhii‑ pɛbhɛ zɔn ‑wee ‑gbɛnɛ do gbɛɛn‑. ‑E 'bhɛ vlɛ ‑kpuŋ ‑gbɛnɛ 'ɛ 'silawoa, 'kee‑ 'bhɛ blinle‑ wɛyi‑ 'ɛ ba 'ke ‑ya pele‑ dɔɔ:
«‑O nu Babilɔni ‑wa ‑gbɛnɛ 'ɛ 'klaalɛ‑ ‑lɛyan' do 'kpɔ faŋgan‑ ma gɔnɛ‑ 'lɛɛ‑ 'bhɛɛ‑ gbɛɛn‑ ‑gee' ‑a ma, 'bhɛɛ‑ waa nu ‑a yelɛ ‑li 'sekeseke.
22 Waa nu ‑gitari ‑glɔɔn gwe dɛ wli mu malɛ ‑li ‑titi 'bhi ba, waa nu 'srokpawli mu malɛ ‑li ‑titi; 'bhɛɛ‑ waa nu ‑klɛloŋ' 'pɛnwli‑ mu, 'pegee ‑gofɛn' 'pɛnwli‑ mu malɛ ‑li 'ezin‑ ‑titi.
'Bhɛɛ‑ waa nu gbɛ ma yewo mu 'kedo‑ 'kpɔ 'yelɛ‑ 'ezin‑ ‑li ‑titi, 'bhɛ 'pegee waa nu pɛbhɛ zɔnwli mu malɛ ‑li ‑wee 'yi 'e ba ‑gɛ ‑li ‑titi.
23 Waa nu ‑laŋbha 'bhile‑ yelɛ 'e ba ‑gɛ ‑li.
'Bhɛɛ‑ waa nu le drɛɛ 'pegee ‑a ‑nɔɔ 'weli‑ malɛ 'e ba ‑gɛ ‑li.
‑Amasrɔyi 'yaa‑ 'plɛɛgɔn‑ mu 'ɛ 'mu ‑le ‑yaa mɛɛ gblaan mu 'le 'trɛ ta. 'E 'si mu 'ɛ 'kpɛn 'yinia‑ ‑yaa' 'srɔn maza mu 'ɛ 'le.»
24 'Bhɛ trala 'ezin‑, ‑amasrɔyi ‑o ‑Waanbhaa' ‑lɛla' janwo mu, 'pegee ‑o ‑yaa' mɛɛ 'weŋ mu 'la ꞊dia, ‑o mɛɛ 'la zan mu 'kpɛn ꞊dia 'trɛ ta, 'mu 'kpɛn yiɛn 'ɛ ‑klalaa' 'trɛ ma 'bhi ‑la ba.