3
C'ajse'ex a Dios yoc'ol aj Pablojo.
1 Pues te'i. Aleebe hermanoje'ex, c'ajse'ex a Dios tiqui woc'ol ino'ono. C'aate ti'i ca' u yaanto'on ti'i ca' t'iit'ic ti jomol u pectzil a Noochtzili, y ti'i ca' c'ümbüc jabix ilic a c'ümaje'ex inche'exe. 2 C'ajse'ex a Dioso, ti'i ma' ti yajcunbul u men boonoo' a c'ac'as winiqui. Ma' tulacaloo' walacoo' u tz'ocsic a Noochtzili, 3 pero le'ec a c'u' a walac u yadic a Noochtzili, walac ilic u betic. Bel u cu yaante'ex y bel u cu cününte'ex ti'i ma' u tülique'ex a quisini.*Jn 17:15; 2 P 2:9 4 Ino'ono, ti noj-ool a Noochtzili, ti'i u yaanticale'ex inche'exe. Le'ec c'u' ti wadaj te'exe, tane'ex ilic a betic, y bel ti bele'ex ilic a ca'a a bete'. 5 Ti c'ati a Noochtzil ca' u yaante'ex a cünü' le'ec biqui ti walac u c'atiinbil a cristiano u men a Dioso, y le'ec biqui ti uchuque'ex a muc'yaj jabix ilic ti walac u muc'yaj a Cristojo.*1 Cr 29:18; Mt 22:37; 1 Jn 4:16
Yan ti betic ti meyaj.
6 Pues te'i. Aleebe hermanoje'ex, etel u muc' u yanil ti Noochil a Jesucristo tan ti wadic te'ex. P'üte'ex a beel tu tzeel a hermano a chen walac u mansic a q'uin u men u sacanili. Ma' u c'ati a cuxtal jabix ti wadaj te'exe.*Ro 16:17; 2 Jn 10; 1 Co 5:11 7 Inche'exe, a weele'ex ilic. Yane'ex a betic jabix ilic a tan ti betic ino'ono. Ino'ono, ma' sacano'on ti que'eno'on ta yaame'exe. 8 Ma' ti mataj a janal etel a ma'ax maca. Ti bo'taj u pach. Uchi ti meyaj ti chich ti q'uin ti ac'ü' ti'i ma' ti matic ma'ax c'u'i ta wetele'exe.*Hch 18:3; Hch 20:34; 1 Co 4:12 9 U paatal cuchi ti matan pero ma' ti c'atiintaj. Ti c'atiintaj ca' aj ch'a'bejaco'on te'ex le'ec biqui ca' a bense'ex a cuxtal a qui'i.*Mt 10:10; 1 Co 9:6; 1 Ta 2:6; 1 Ti 5:17; 1 P 5:3 10 Le'ec ti que'eno'on to ta yaame'exe, ti wadaj te'ex: —Wa ma' tu meyaj a maca, ma' tu janal,— co'on.*Gn 3:19; Pr 13:4; 1 Ta 4:11 11 Tan ti wadic te'ex ti baalo' u men albi to'on ti yanoo' mac ta yaame'ex a chen walacoo' u mansic a q'uin u menoo' u sacanili. Walacoo' u manül ti ch'aa' cuenta. Ma' ta'achoo' u meyaj.*Is 56:10 12 U'ye'ex ti t'an. Etel u muc' u yanil a Noochtzil a Jesucristojo, tan ti wadic ti'ijoo' a sacana. Bete'ex a meyaj yoc'lal a cuxtale'ex. Ma' a manüle'ex chi'chi'najil ti ch'aa' cuenta.*Ro 12:11; Ef 4:28
13 Pues te'i. Hermanoje'ex, ma' u tuc'ule'ex a wool a bete'ex a qui'i. 14 Wa yan mac a ma' u c'ati u tz'oques c'u' ti tz'iibtaj ichil a carta ada'a, tz'aje'ex ti cuenta maqui. Bete'ex jabix ma' a c'aj-oole'ex u wich ti'i ca' sudacac. 15 Ma' a betique'ex jabix a wettz'iiquili. Tze'ecte'ex tu qui'il jabix tane'ex a tze'ectic a sucu'un wa a witz'in.*Lv 19:17; Ga 6:1; 1 Ta 5:14
U yada' u t'an.
16 Pues te'i. Etel a Noochtzili, yan a jetz'a'an-oolili. In c'ati ilic ala'aji tulacal q'uin ca' u tz'aa' te'ex a jetz'a'an-oolil ich tulacal ca'ax tubajac. In c'ati a Noochtzil que'enaque'ex ta wetel tulacale'exe.
17 Pues te'i. Inen aj Pablo. Tan in diostac'untique'ex. Jadi' ilic ada' a tan in tz'iibtic tin c'ü'ili. Baalo' ilic ti walac in tz'iibtic in c'aba' tuwich u yada' tulacal in carta. Baalo' in tz'iib. 18 In c'ati ti Noochil a Jesucristo ca' u yaante'ex tulacale'exe. Wa'ye' jobi in t'an.