1 Pues te'i. Hermanoje'ex, ti'ije'ex Dios. Quet yeeta'ano'on u men a Dios ti ca'ana. Etel boon in tz'iibtaj to yoc'ol a Jesusu, tucle'ex ala'aji. Tücaa'bi u men a Dioso. Le'ec a Jesusu, le'ec u noochil u yaj mansaj t'an a cristiano ti'i a Dios ti'i boon tuulo'on a que'en ti wool tu pacha.*Mt 15:24; 1 Ti 3:15 2 Le'ec a Jesusu, u laj betaj ti chucul u meyaj a Dios a tz'abi ti'i ca' u bete'e. Baalo' ilic aj quimen Moisese, chucul a meyaj u betaj ti'ijoo' boon tuul a que'en tu cuenta a Dioso. Ala'oo'o, bete cuenta u yotoch a Dioso.*1 S 12:6; Nm 12:7 3 C'u' betic a Jesusu, mas c'abeet tuwich aj Moises jabix ilic ti mas c'abeet mac u betaj a naj abe'e. A naja, ma' top c'abeeti.*Zac 6:12; Mt 16:18 4 Tulacal a naja, yan ilic mac u betaj. C'u' betic a Dioso, u betaj tulacal a c'u' a yana.*Ef 2:10 5 Le'ec aj Moisese, top que'en u yool tu pach u meyaj a Dios tu yaamoo' a que'en tu c'ü' a Dioso. U mansaj u t'an a Dios ti'ijoo' boon a que'enoo' tu c'ü'. Ala'aji, u p'is biqui'il a udi pachili.*Dt 18:15,18,19 6 C'u' betic a Cristojo, u Mejen Dios. Ma' chen que'en tu c'ü' a Dios jabix aj meyaj jabix aj Moisese. A Cristojo, u betaj ilic u meyaj a Dios ti chucul. Ino'ono, que'eno'on tu c'ü' a Dios wa ma' ti p'ütic ala'aji. Qui'ac ilic ti wool ti que'en ti wool tu pach a Dioso.*Ef 4:12; Mt 10:22 7 Baalo' u betaj to'on a Cristojo, mentücü, yan ti tz'eec tiqui wool a t'an ada' u yadaj u Püsüc'al a Dioso: —Aleebe, le'ec ti tane'ex a wu'yic u t'an a Dioso,*2 S 23:2; Mt 22:43; Mr 12:36; Hch 1:16; Hch 28:25 8 ma' a p'ütique'ex a wu'yic jabix u betajoo' aj Israel uchiji. Ti a q'uin abe'e, que'enoo' to ichil a lu'um a p'atala. Tan ti tanoo' u betic a yan ma' yan ti'i ca' u yiloo' wa ca' tz'abücoo' ichil u sip'il u men a Dioso.*Sal 81:11; Sal 95:7; Is 55:3; Mt 17:5; Jn 5:25 9 “Le'ecoo' a uchben mamaa'a, u p'ujsajenoo' taniloo' u yaalticoo' ca' u yiloo' wa patalen te'i,” cu t'an a Dioso. “Cuarenta jaab tanoo' u p'ujsiquen ti baalo' ca'ax boon a milagro u yilajoo' in betiqui, 10 mentücü, tz'iicajeen ti'ijoo',” cu t'an a Dioso. “Chen u c'atoo' u bete' a jabix u c'atoo'o. Ma' u c'atoo' u bete' a c'u' a tan in wadiqui, queen tin bajil,” cu t'an a Dioso. 11 “Tz'iicajeen, mentücü, in tz'aj in t'an yoc'oloo' ti'i ma' tu yocoloo' tin cuenta tuba yan a jedele,” cu t'an a Dioso,— cu t'an u Püsüc'al a Dioso. 12 Hermanoje'ex, cününte'ex a bajil ti'i ma' u yantal te'ex a c'ac'as tuculu, le'ec ti ca' a p'üte'ex a tz'ocse'ex a Dios a cuxa'ana. 13 Sansamal ca' a tze'ecte'ex a bajil le'ec ti yan to u q'uinili. Le'ec ti ca' a cüxte'ex a sip'ili, le'ec ilic a sip'il abe'e, bel u cu tz'aa' te'ex ti ma' a wu'yique'ex u t'an a Dioso. Etel ti sip'ili, walac ti cho'ic ti bajil. 14 Jumbelo'on etel a Cristo wa cuchi que'en ti wool tu pach ala'aji, jabix ilic tu cajeebe, y baalo' ilic tac tu jobeebe. 15 Baala' ti tz'iiba'an to'on yoc'ol abe' ichil u ju'um a Dioso. —Aleebe, le'ec ti tane'ex a wu'yic u t'an a Dioso, ma' a p'ütique'ex a wu'yic jabix ca' u p'ütajoo' aj Israel biq'uin ado'o,— cu t'an a t'an a tz'iiba'ana. 16 Cününte'ex a bajil. Ma' a p'ütique'ex u t'an a Dioso. Le'ec a aalboo' ti'i u t'an a Dioso, y u p'ütajoo' u yubic u t'ana, le'ecoo' abe'e, le'ecoo' aj Israel a joc'saboo' tu cuenta Egipto u men aj Moisese.*Nm 14:2,4,11,24,30; Dt 1:34,36,38 17 Le'ec boon tuul u yaaltajoo' ca' u yiloo' wa patal a Dioso, le'ec boonoo' aj Israel u cüxtajoo' u sip'ili. Quimoo' ichil a lu'um a p'atala. Cuarenta jaab tanoo' u p'ujsic a Dios te'iji.*Nm 26:65 18 Le'ec a Dioso, u tz'aj u t'an ti'ijoo' boon tuul a ma' ta'achoo' u tz'ocsic u t'an. —Ma' tu yocoloo' tin cuenta tuba yan a jedele,— cu t'an a Dioso. 19 Etel a t'an abe'e, chica'an ti ma' paatajoo' u yocol tu cuenta Dios u men ma' ta'achoo' u tz'ocsic u t'an.