Faulo ena leta me Efeso ʼidia
Leta ana alamani weaqina
Faulo ena leta baʼe ʼwayavia, mana nuanuana me Efeso ina alamani aqiaqiea vonigo nawale Yaubada ʼivaʼavaʼata qabudi mahalaya be wese bwaʼobwaʼoya naluveʼaidegedi, ta Keliso tauna kuyavata qabuna adi ludebana. Ta wese Faulo nuanuana navematamagilafuyedi be ina veilivu aqiaqi ʼidewani Yaubada lova tomotau venuaʼivinedi ina toatoa, ta baʼe yani nana naʼifoqe ʼeguma ina veʼaidega Keliso maega. Nugweta Faulo ena simana veʼaidega weaqina ʼinaya vonedi maʼoda Yaubada Tamada ena tomotauyavo venuaʼivina ʼaiqedi, ta wese maʼoda edi luveifayavo nuataqo ʼaiqedi be wese maʼoda ʼetoyavua niʼa iloba ʼaiqei Natuna Ieisu Keliso ʼinega. Ta wese baʼe leta nana ʼinega Faulo me Efeso veʼitedi Yaubada ena vona fofofola adi aqiaqi naʼifoqe Niboana Gwalagwalana ʼinega. Ta wese vona sesebai ʼinega nuanuana naveʼitedi ʼekalesia Keliso maega iveʼaidega, ʼinega vonedi vonigo ʼekalesia kavona ʼwafi taha, ta Keliso tauna toludebana. Ta wese ʼekalesia kavona vanue ta Keliso tauna ana ʼoqola. Ta wese ʼekalesia kavona taha vavine ta moqanena Keliso. Baʼe yani diavona kana ʼita aqiaqiedi Keliso ena veyoluba be, ena guba be, ena nuataqo be, ena nuakolokolo, ta wese ena tunutunuqa ʼidiega. Ta wese Faulo veʼiteda maʼoda ʼinega ada avia Seitani kana vewaiwai vaʼinea.
Leta gamona
1:1-2 Vematamagilafu be lukaiwa
1:3–3:21 Keliso ta ena ʼekalesia
4:1–6:9 Toa vauvauna Keliso ʼinega
6:10-20 Yaubada ena ʼebevedavi adi vefewa
6:21-24 Vona ʼebeluʼovoa ta venoqi
1
Lukaiwa
1 *Via 18:19-21; 19:1 Leta baʼe yaʼa Faulo ʼiguyega omiʼa Yaubada ena tomotauyavo ʼabaga Efeso ʼinaya otoatoa. Yaʼa Yaubada ena nuanua ʼinega yavetovaletuyana ada Toʼetoyavua Ieisu weaqina.
2 Nuanuagu omiʼa Yaubada Tamada be eda Kaiwabu Ieisu Keliso edi nuakolokolo be wese edi nuadaumwala naʼenoʼeno ʼimia.
ʼEtoyavua Keliso ʼinega
3 *Efe 2:6 Egwavo, Yaubada kana awatuboya, tauna eda Kaiwabu Ieisu Keliso Tamana. Tauna vona veyolubeda ta yani qabuna aqiaqina Niboanina Gwalagwalana ʼinega neida mahalega, mana itaʼa Keliso maega. 4 *Ion 15:16 Lova Yaubada maduvenuaʼivineda Keliso ʼinega, ta ʼabiboda bwaʼobwaʼo be yani qabuna ʼivaʼavaʼaidi. ʼInega itaʼa vonigo gwalagwalada ta gebu ada ʼebeveʼewamo ʼiawanaya. 5 *Ion 1:12 Yaubada ena veyolubega maduvenuaʼivineda sabi ʼawanatuneda Ieisu Keliso ʼinega, mana lova ʼinega ena nuanua ʼidewani, ta baʼe yani nana weaqina qaiawa gegoyo.
6 ʼInega Yaubada kana awatuboya ena nuakolokolo qiduana weaqina, ta baʼe nuakolokolo nana nei kavovoda, mana itaʼa Natu Otaqina maega. 7-8 *Efe 2:7; Kol 1:14 Ta Natuna sulalinega gubaufeda eda luveifayavo ʼidiega ta nuataqoda, mana tauna ena nuakolokolo qidua vaʼinena neida, ge ana fata be kana ʼetolivei. Ta yani baʼe viaqia ena alamani qidua vaʼinena ʼinega, mana niʼau alamani aqiaqiea toyani ada luaqiaqi. 9 *Lom 16:25 Ta Yaubada ena nuanua ʼwaiʼwaivina lova ʼinega niʼau luʼifoqeyea ʼidaya. Ena nuanua aqiaqina baʼe ʼidewani, ta yani qabuna Ieisu Keliso ʼinega viaqia. 10 *Kol 1:16,20 Ta ena nuanua nana ana alamani baʼe ʼidewani: Tuta nana Yaubada ena nuanua ʼwaiʼwaivina naluʼovoia ʼinega ena ʼivaʼavaʼata qabudi mahalaya be bwaʼobwaʼoya Ieisu Keliso ena luvine waiwaina ʼinega navaʼauqidi ʼaideganaya.
11 *Lom 8:28-29 Itaʼa Ieisu Keliso maega niʼa kaveʼaidega mana kavetumaqanea. Ta baʼe ʼinega Yaubada ʼawaʼawa natuneda, mana lova maduvenuaʼivineda ena nuanua ʼidewani. Ta baʼitaga ena nuanua ana ʼebeluʼovoa niʼa ʼifoqe, mana tauna ena nuanua nugwenugweina ge ana fata nanogei. 12 Ena nuanua baʼe mana itaʼa kamaduluʼita vane Keliso ʼinaya be kavetumaqanea, ʼinega luaqiaqieda be Yaubada Tamada simasimatala otaqina kana awatuboya.
13 Ta wese omiʼa Vale Aqiaqina ami ʼetoyavua weaqina Keliso ʼinega niʼau onoqolia. Ta tuta nana ovetumaqanea ʼinega Yaubada Niboanina Gwalagwalana neimi, tauna ami ʼebeʼinana. 14 *2Kol 1:22 Baʼe ʼebeʼina nana ʼinega kana alamania ada veʼia nawale mahalaya Yaubada ʼinega kana ʼewea lova ena vona fofofola ʼidewana. Ta wese baʼe ʼinega kana alamania itaʼa Yaubada ena tomotauyavo niʼau gubaufeda. ʼInega wese baʼe weaqina Yaubada ena aqiaqi otaqa kana awatuboya.
Faulo ena noqi
15-16 Lova yanoqolia omiʼa emi vetumaqana eda Kaiwabu Ieisu ʼinaya weaqina, ta wese emi veyoluba Yaubada ena tomotauyavo weaqidi. Ta omoʼe tuta nana ʼinega be ana laba baʼitagana ge wese eda luaʼu venoqi weaqimi. Ta egu venoqi nana ʼinaya tuta qabuna yalulukaiwa weaqimi. 17 *Kol 1:9 Ta yavevenoqi Yaubada eda Kaiwabu Ieisu Keliso Tamana simasimatalina ʼinaya be Niboanina naneimi ʼinega nuami nagiqaʼuya, be yaqisa tauna ona alamani aqiaqiea. 18 Ta wese yavevenoqi weaqimi be nuami naʼeqaʼui be yaqisa yani qabuna aqiaqidi Yaubada niʼa ʼivaʼavaʼaia weaqimi ona alamani aqiaqiea. Ta ge ona venuana magilafu yani diavona weaqina, mana ena gaba ʼimia ʼinega niʼa ʼawanatunemi. Ta wese yavevenoqi ena veyoluba qiduana ona alamania, mana veyoluba nana vona fofofolea ena tomotauyavo ʼidia. 19 *Kol 1:11 Ta wese yavevenoqi weaqimi be yaqisa Yaubada ena waiwai otaqa itaʼa ana tovetumaqanayavo weaqida ona alamani aqiaqiea. Baʼe waiwai nana ʼinega Yaubada 20 *Same 110:1; 2Kol 13:4; Kol 2:12 Keliso ʼaligega giveyaʼitoto ʼeviviea, ta mahalaya ena ʼebetoa neia ʼataqinaya. 21 *Kol 1:16; 2:10 Baʼe ʼinega Yaubada luvine be waiwai Keliso neia, be tauna Tamana ena tovaleʼewayavo be, Seitani ena tovaleʼewayavo be, niboana qabudi be, taudi adi wawa ʼenaʼenaʼidi, ta wese yani qabuna vetoluvine vaʼinedi baʼitagana ta wese tuta maimai ʼidia. 22 *Same 8:6 Vonahaqiaqi, Yaubada luvine be waiwai Keliso neia, ʼinega yani qabudi luviluvinedi, ta wese venuaʼivinea be tauna ʼekalesia ana toludebana. 23 *Efe 4:10; Lom 12:5; Kol 1:18 Ta ʼekalesia taudi Keliso duʼunavo. Ta ʼekalesia yawaina qabuna Keliso ʼinega ʼewea, mana tauna yani qabuna yawaidi adi Tonei.