Me Ibeliu edi leta
Leta ana alamani weaqina
Leta baʼe ana toʼwayavi ge kada alamania, mana ana wawa ge daʼwayavia gamonaya. Ta toʼwayavi nana leta nana ʼwayavia me Ibeliu ʼidia, ta leta nana gamonaya tuta qabuna ʼinanedi me Diu, mana qabu ʼaidegana. Ta ena ʼwayavi ʼiuna mana tovetumaqana vaidi ivenuana magilafu edi vetumaqana Keliso ʼinaya weaqina, ta inuaia nage Ieisu tauna ge Yaubada Natuna. ʼInega toʼwayavi nana nuanuana qiduana naveʼitedi vonigo Ieisu tauna vonahaqiaqi Yaubada Natuna. Ta wese tauna Yaubada ena tovaleʼewayavo be, Mosese be, toveguba qiduqiduadi be wese tovesimasimana qabudi veqidua vaʼinedi. Ta wese veveʼitedi vonigo Ieisu vetomotau itaʼa ʼidewani, ʼinega eda toa vitana bwaʼobwaʼoya niʼa alamani aqiaqiedi. Ta baʼe leta nana ʼinaya kana ʼitea vonigo Yaubada ena vona fofofola vauvauna tomotau ʼidaya ena vona fofofola nugwenugweina veqidua vaʼinea. Ta wese vaina ʼebevetalatutula neida tovetumaqana aqiaqidi weaqidi Buki Nugwenugweina ʼinega. E leta ana alamani baʼe ʼidewana.
Leta gamona
1:1-3 Ieisu Keliso ʼinega Yaubada taunega veʼita ʼifoqeyea
1:4–2:18 Keliso Yaubada ena tovaleʼewayavo veqidua vaʼinedi
3:1–4:13 Keliso tauna Mosese be Iosua veqidua vaʼinedi
4:14–7:28 Keliso toveguba qiduqiduadi veqidua vaʼinedi
8:1–9:22 Luvine vauvauna Keliso sulalinega luvine qabudi veqidua vaʼinedi
9:23–10:39 Yaubada ena veguba Keliso ʼinega veguba qabudi veqidua vaʼinedi
11:1–12:29 Vetumaqana ʼinega Yaubada tomotau ʼawahaqiaqiedi
13:1-19 Tovetumaqana adi vebibina
13:20-25 Venoqi be vona ʼebeluʼovoa
1
Ieisu Keliso tauna Yaubada Natuna
1 Tuta lova ʼinaya Yaubada ʼeda taha taha ʼidiega ta wese yani qabudi ʼidiega ena vona tubudavo neidi ena tovesimasimanayavo ʼidiega. 2 *Ion 1:3 Ta baʼitaga tuta ʼebeluʼovoa ʼinaya Natuna ʼinega simasimana ʼidaya. Lova baʼe Natuna nana ʼinega yani qabudi mahalaya be wese bwaʼobwaʼoya ʼivaʼavaʼaidi, ʼinega venuaʼivinea be ena kuyavata qabudi naʼewedi. 3 *Ion 14:9; Kol 1:20; Ibe 8:1 Ta toyani Yaubada ʼinaya iʼenoʼeno baʼitagana wese kana ʼitea Natuna ʼinaya, mana yani qabuna aʼukamanedi ʼinaya ʼidewani ena ilivu be, ena aqiaqina be wese ena kaikaiwabu simasimatalina. Tauna wese ena vona waiwaina ʼinega kuyavata qabudi nawale ʼitaʼitamakidi ta kafikafidi. Tauna eda luveifanayavo ʼewa yavuledi ena ʼaliga ʼinega, ta ʼabibodanaya Tamana Toatoa Vanena ʼataqinaya toabui diʼwe gwalagwalana ʼinaya. 4 *Fil 2:9 Ta baʼe yani diavona ʼinega tauna Yaubada ena tovaleʼewayavo veqidua vaʼinedi, ta wese ʼidewana wawa nana Yaubada neia tovaleʼewayavo adi wawa veqidua vaʼinedi.
5 *Same 2:7; Via 13:33; 2Sam 7:14; 1Yani 17:13 Baʼe ʼiuna ʼinega Yaubada ena tovaleʼewayavo qabudi ʼidiega ge taha toga ʼinaya davonei,
“Oʼa Natugu,
baʼitaga yavetama ʼiuya.”
Ta wese Yaubada ge taha toga ʼidiega davonei,
“Yaʼa tauna tamana,
ta tauna yaʼa natugu.”
6 *Luve 32:43; Lom 8:29 Ta tuta nana Yaubada ena ʼunutau vetunei mai bwaʼobwaʼoya ʼinega vonaya,
“Yaubada ena tovaleʼewayavo qabudi
luaqiaqiedi be ina iwaʼodu
Natuna ʼinaya.”
7 *Same 104:4 Ta Yaubada ena tovaleʼewayavo weaqidi vonaya,
“Taudi egu tovaleʼewayavo
yaviaqidi kavonaya nuba,
ta egu tofewayavo
kavonaya ʼaiwe saesaelina.”
8 *Same 45:6-7 Ta Natuna weaqina vonaya,
“Oʼa Yaubada eu luvine
naʼeno vataya.
Ta eu tomotauyavo una luvinedi
luvine ʼaideganega ta tunutunuqinega.
9 Oʼa ilivu be ʼeda tunutunuqidi
uʼawahaqiaqiedi,
ta luvine qabudi adi qeu
unoga aqiaqiea.
ʼInega yaʼa Yaubada
eu Yaubada yavenuaʼivineu
ta dedeʼwa ʼebeqaiawa
ana gihiwaqa
ʼinega yagiveqaiaweu qiduana,
ta ʼabiboda emwavo.”
10 *Same 102:25-27 Ta wese vonaya,
“Kaiwabu,
oʼa tuta ana ʼebeveʼale ʼinaya
bwaʼobwaʼo uʼivaʼavaʼaia
ta wese tauʼu nimauyega mahala uviaqia.
11 Baʼe ʼivaʼavaʼata diavona ina awala,
ta oʼa una toa vataya.
Ta wese ina veyani kavokavovo
ʼidewani kaleko ʼituʼituwaidi.
12 Ta oʼa mahala be bwaʼobwaʼo
una nunumidi kavonaya
ʼafwala kuena ʼidewani,
ta ina ʼwaya ʼidewani
kaleko ʼituʼituwaidi.
Ta oʼa ge taha tuta uda vedumaduma,
ta wese yawaiu ge ena ʼebeluʼovoamo.”
13 *Same 110:1 Ge taha tuta Yaubada ena tovaleʼewayavo ʼidia davonaya,
“Utoabui ʼataqiguya ana laba
au aviayavo ena miedi
ena aʼuwebuiedi ʼaqeu ʼayanaya
ta una luvinedi.”
14 *Same 34:7; 91:11 Mana tovaleʼewa diavona taudi niboniboana ta toiula, ta Yaubada vevetunedi tomotau ʼidia sabi iuladi ʼetoyavua ana ʼewa weaqina.