Mattup ere ki poone Pool yi riiŋe a ɗoŋ a
Korent
Eŋ urzi kʼono ɗoŋ kun tʼoone adda mattup ettiyo
Mattup ette Pool yi riiŋe a ɗoŋ i ziipe addaŋ a Isa a geeger Korent, todʼte geeger ki siiɗo Yawudiyagi ye. Pool yʼiide ki Korent a torguwadí ere ki sirwe, yʼan di gizite Rabila Majjaanawa a Yawudiyagi wo a Yawudiyagi ye. Iŋkino ɗoŋ ɓaadaŋ Yawudiyagi ye an di ziipe addaŋ a Isa.
Ki poone Pool yʼa raaŋa mattup ette, kane ɗoŋ Korent toŋ an i-riiŋe mattup te, wo adda mattup gette an di yʼ tundite a urzi sulɗi ɓaadaŋ, wo ɗe kooke wede pay Pool yʼan ele aame yʼiide di kane geŋ, ɓaadaŋ an dʼiili an ki sooru eego ye. Pool yʼa illiga rabila a urzi lekkiyo ɗoŋ Korent te, wo a yode i gi di tʼize uŋse ye. Wo yʼa dihe yʼan di-kime onamaŋ ɗoŋ anʼni riiŋe adda mattupadaŋ, wo yʼan tʼeele kooke pây.
Adda mattup ette Pool yʼan di ruutite a sulɗi ɓaadaŋ, aakede: âhuntu tudde ki ɗoŋ ogiyso ti suma kʼIsa, a urzi boliyo, a urzi seeɗu, a urzi kʼaaɗumu sey wede an eliyo seɗeke a loŋgayi, a urzi sulɗi ɗoŋ Unde Kamilen̰ tʼeliyo, wo a urzi balɗiya ki ɗoŋ i tʼinda. Wo yʼan di ruute soŋ geyyiso tudde gette, todʼte ti jiire sulɗi pay.
1
Toose ki Pool
Mattup ette i raaŋiya nuŋ Pool, nuŋ wede Raa yi ni wiike nʼa tʼize wede zina kʼIsa Almasi, aa Raa yi dehu. Ay raaŋiya ti leema Susten, a kane ɗoŋ ki Raa ogiyso ti suma kʼIsa a geeger Korent* 1.2 Korent gette geeger meeda ki siiɗo kʼAkayi, wo Akayi gette siiɗo soo todʼte adda siiɗiyagi pay ti kaaga ɗoŋ Romeŋ ga-dukke, todʼte a kese ɗanɗi ki siiɗo ere aŋken̰n̰o an ti waaku Gires., kane ɗoŋ Raa yiʼni wiike an tʼize ɗoŋzí, yʼan uuye kese a yode tʼurzi lekkiyo kettiyo kaŋ soo tʼIsa Almasi, wo ti kane ɗoŋ pay i waaku suma Galmeegiŋ Isa Almasi, a ume tuuku toŋ maŋ, yoŋ Galmeegaŋ wo Galmeegiŋ pây. Geŋ beeko ti toose ki Meegiŋ Raa ti Galmeega Isa Almasi i koona egguŋ.
Beehiyko a ɗoŋ geeger Korent
Kono kune geŋ nuŋ daa puukiyo ni rootiyo koɗuwo a Raa a urzi beeko ere yʼun ele tʼurzi kʼIsa Almasi. Ɗerec, kune kun lekkiyo kettiyo kaŋ soo tʼAlmasi geŋ, a kune Raa yʼun ele laale ki sulɗi pay, aakede urzi kazita kʼono wo ita suuniyo pay. Geŋ ki kotto, aame ay un gizite rabila ere kʼAlmasi, kun di-ziiɗa zakiɗi adda kʼadduguŋ. Iŋkino maŋ aŋken̰n̰o munɗa wede Raa yʼeliyo ti beekadíʼŋ, a kune soo toŋ un ki biite ye, kune ɗoŋ i delliyo onniyo ere Galmeegiŋ Isa Almasi yʼa kiza tuddí a ɗuwo pay geŋ me. Geŋ yode yʼun diʼn isa ɗoŋ i seeɗu zakiɗi bini ɗaŋgu. Iŋkino maŋ, a onniyo ere ki Galmeegiŋ Isa Almasi yi kimoʼŋ, wenɗa soo toŋ yi kʼaana yi ki zaapa ono egguŋ ye. Geŋ ɗerec, Raa yʼunni wiike kun di lekke kettiyo kaŋ soo ti Ulí Galmeegiŋ Isa Almasi, yoŋ yi seeɗu zakiɗi a munɗa wede yi ruute yʼaasa me.
Âhuntu tudde ki ɗoŋ ogiyso ti suma kʼIsa
10 Zemɓa ki nuŋ, en̰n̰o munɗa wede nʼun tʼeele kooke ti suma Galmeegiŋ Isa Almasi me: Kun tʼokkiƴo kaŋ soo, tudduguŋ kun ti tʼahinte ye, kun tʼiso adduguŋ soo, elkisaguŋ toŋ soo. 11 Zemɓa ki nuŋ, ni rootiyo iŋkino kono ɗuwo an iido ti daŋ Kilowe an o di ruute, kun orbite ono kʼulpi ti tudduguŋ. 12 Geŋ en̰n̰o munɗa wede ni dehu nʼa roote me: Kune ti diinaguŋ wede tuuku toŋ yi rootiyo, yi dʼeesiyo: «Nuŋ ki Pool», wede soŋ «Nuŋ ki Apolos», wede soŋ «Nuŋ ki Piyer» wo wede soŋ «Nuŋ ki Almasi». 13 Munɗa wede kun isiyo geŋ, aa Almasi tuddí dokkiɗe. Kun oo ki ti rooti ɗoo, an tiike kono kune ekkʼundumu wede zaapu tʼekki bakadí kaŋ tontilko, nuŋ Pool ko? Kunuŋ an unni zuyye batem ti suma nuŋ Pool ko?
14 Nuŋ ni rootiyo koɗuwo a Raa kono ti diinaguŋ wenɗa soo toŋ ni ki zuyye batem ye, daa ki Kirisipus ti Gayus ye maŋ. 15 Iŋkino maŋ wenɗa soo toŋ umbo aane a roote an yi zuyye batem ti suma nuŋ Pool me. 16 Wayya, nuŋ o dunɗe, ni zuyye batem soŋ Stepanas ti ɗoŋ ɓoozí, wo ni kʼelkiyo ye baa wenɗa ti doolo wede ni yʼ zuyye batem sey me. 17 Kun suune Almasi yi nʼigibo, ɗuwo nʼa kiʼn suyyite batem ye, wo ɗe nʼan di kizite Rabila Majjaanawa. Wo ni ki kazitaʼŋ ono ɗoŋ uŋse, kono ɗuwo an gi diʼn wolle nuŋ aa wede suuniyo kʼono ye, para maŋ unto ere kʼAlmasi ekkʼundumu wede zaapu tʼekki bakadí kaŋ tontilko gette, a tʼisa aa munɗa ki bita.
Almasi, toogo Raa wo suuniyo kʼono ere ki Raa
18 Ono ɗoŋ in kazita a tukkʼAlmasi yʼinda ekkʼundumu wede zaapu tʼekki bakadí kaŋ tontilko geŋ, a kane ɗoŋ i lekkiyo a urzi daggiya, ono geŋ an olligeʼŋ aa ono ɗoŋ maadagi, wo ɗe a kine ɗoŋ Raa yʼin utte, ono geŋ in diʼn ollige, kane toogo ki Raa batum. 19 Ɗerec, ono eŋ an riiŋe ti kaaga adda mattup ki Raa, anʼde:
«Kane ɗoŋ an elkiyo an dʼede suuniyo kʼono, suuniyo kʼonamaŋ gette nʼan ti dagga,
kane ɗoŋ eedaŋ soodo a elkiso, elkisadaŋ soodo gette nʼan ti tʼisa ki bita 1.19 Kun wollo adda mattup ki Ezayi 29.14.
20 Iŋkino maŋ kane ɗoŋ suuniyo kʼono eŋ, an di roote moo sey me? Ɗoŋ suuniyo kʼoogoro Muusa eŋ, an di roote moo sey me? Ɗoŋ niikiyto kʼono kʼozzinagi ɗoŋ aŋken̰n̰o eŋ, an di roote moo sey me? Ɗerec, suuniyo kʼono ere adda duniya ette, Raa yi-tʼize aa suuniyo ɗoŋ maadagi 1.20 Kun wollo adda mattup ki Ezayi 44.25..
21 Ki kotto kane ɗoŋ duniya ti suuniyo kʼono ere kʼaggadaŋ, an kʼiine an ki ti zuune ye suuniyo kʼono ere ki Raa te. Iŋkino maŋ Raa ulbí i-dʼize uŋse yʼan diʼn utte kane ɗoŋ i ziipe addaŋ a yode tʼurzi kazita kʼono ɗoŋ ɗuwo an elkiyo ono ɗoŋ maadagi geŋ me. 22 Kane Yawudiyagi an dehu an di wolle sulɗi kʼarmika a kize onamiŋ in kazita ɗerec, wo kane Girek an dehu urzi suuniyo kʼono. 23 Wo ɗe kaye ay kazita Almasi an ti yʼ tiike ekkʼundumu wede zaapu tʼekki bakadí kaŋ tontilko, wo a kane Yawudiyagi ono geŋ an tʼize aa mokkolo morkiƴe. Wo a kane ɗoŋ Yawudiyagi ye an elkiyo ono ɗoŋ maadagi. 24 Wo ɗe ki kane ɗoŋ Raa yi wiike, ise Yawudiyagi ise Yawudiyagi ye toŋ, an suune yo Almasi toogo Raa wo suuniyo kʼono ere ki Raa. 25 Munɗa wede Raa yʼisiyo wo ɗuwo an elkiyo yoŋ ki maade geŋ, maadikadí gette ti jiire suuniyo kʼono ere ki kane, wo munɗa wede ɗuwo an elkiyo Raa toogadí baata geŋ, toogadí gette ti jiire ere ki kane.
Munɗa wede Raa yi biire
26 Zemɓa ki nuŋ, kun wollo kay, ti diine kune ɗoŋ Raa yi wiikeʼŋ, a eda ɗuwo kune aŋ wee wee, ɗoŋ suuniyo kʼono baata, ɗoŋ toogo baata, wo ɗoŋ adda ɓoozaŋ sundaŋ ti môolo baata. 27 Wo ɗe Raa yi biire munɗa wede aa ki maade a eda ɗoŋ duniya, kono yʼan diʼn tʼele sukiyagi a kane ɗoŋ an elkiyo an dʼede suuniyo kʼono. Raa yi biire munɗa wede toogadí baata a eda ɗoŋ duniya, kono yʼan diʼn tʼele sukiyagi a kane ɗoŋ an elkiyo an dʼede toogo. 28 Raa yi biire munɗa wede a eda ɗoŋ duniya yoŋ ki bita, ɗuwo an di yʼ koogire wo an di yʼ wolliyo tʼumbo soo geŋ, kono yʼa latte munɗa wede ɗuwo an yi wolliyo beehiye i-dʼede suma. 29 Raa yʼize iŋkino kono wede tudde soo toŋ umbo a kili tuddí a ɗaanadí me. 30 Yoŋ yʼun tiʼn gitte kaŋ soo ti Isa Almasi. Wo yo Almasi geŋ, yʼa tʼize a kine urzi suuniyo kʼono ettiyo ti Raa. Tʼurzi kʼAlmasi Raa yʼin diʼn isiyo ɗoŋ ki diine a ɗaanadí, yʼin diʼn ooyiso kese a yode, wo yiʼn diʼn aɗɗiya tʼadda kʼolɗiko. 31 Geŋ ono eŋ an riiŋe ti kaaga adda mattup ki Raa, anʼde: «Wede yi dehu yi tʼimme tuddí maŋ, yʼamma tuddí a munɗa wede Galmeega Raa yʼize§ 1.31 Kun wollo adda mattup ki Zeremi 9.22-23.

*1:2 1.2 Korent gette geeger meeda ki siiɗo kʼAkayi, wo Akayi gette siiɗo soo todʼte adda siiɗiyagi pay ti kaaga ɗoŋ Romeŋ ga-dukke, todʼte a kese ɗanɗi ki siiɗo ere aŋken̰n̰o an ti waaku Gires.

1:19 1.19 Kun wollo adda mattup ki Ezayi 29.14.

1:20 1.20 Kun wollo adda mattup ki Ezayi 44.25.

§1:31 1.31 Kun wollo adda mattup ki Zeremi 9.22-23.