1 Zemɓa ki nuŋ, i kʼise ye ay un di raaŋe a urzi kʼonniyo, ise a urzi peeɗo ere sulɗi pay geŋ an dʼaana me. 2 Kune batum kun suune adda kʼadduguŋ: Onniyo ere ki Galmeega yʼa kimo gette, tʼaana aa wede kʼoogire yʼettiyo a diɗɗo, wenɗa soo toŋ umbo a suuna me. 3 Aame ɗuwo an iisa rootiso: «Aŋken̰n̰o kine adda toose, munɗa kʼorgiso umbo baa» maŋ, iŋkino a kaamiki geŋ miŋ dabar ɓaadaŋ tʼa ɗeega eedaŋ. Geŋ dabar gette tʼaana a kaamiki, aakede kakkisa kʼerewo addutú i tʼumɓe kʼehiyo, wenɗa soo toŋ umbo a tʼalɗa me. 4 Wo ɗe zemɓa ki nuŋ, kune adda zimolo ye kono onniyo gette tʼun diʼn kiira sutte aa wede kʼoogire me. 5 Kune ɗoŋ ki toore Raa, lekkiyaguŋ aa a on̰n̰u. Kine ki diɗɗo ye, ki zimolo ye. 6 Iŋkino maŋ in tʼudige ye aa kane ɗoŋ oŋgo me, wo ɗe in lekko zeere, tuddiŋ in ti sooɗo. 7 Kane ɗoŋ i moone geŋ an moone a diɗɗo, wo ɗoŋ i soɓo toote i ceeriyo eedaŋ geŋ an soɓo a diɗɗo*5.7 An soɓo a diɗɗo: Ti kaaga geŋ a siiɗo Gires kane ɗoŋ Yawudiyagi ye an soɓo toote a diɗɗo, wo di kine iŋkino ye, ɗoŋ an soɓo a on̰n̰u wo a diɗɗo pây. . 8 Wo ɗe kine ɗoŋ lekkiyadiŋ aa a on̰n̰u geŋ, tuddiŋ in ti sooɗo. In lekko a urzi zaapu kʼaddiŋ a Isa wo ti geyyiso tuddiŋ, kane geŋ a kine aakede asigursu yi tʼusse saapa. Wo in zaapo elkisadiŋ a Raa wede yiʼn utte kono zaapu kʼelkiso gette, todʼte aakede asigursu yi tʼusse kakkile maala.

9 Kine Raa yi dihe yʼinni wiike toc miŋ yʼa ki ɗekka booro eediŋ ye, wo ɗe yʼinni wiike kono in tʼooney uttiyo tʼurzi Galmeegiŋ Isa Almasi. 10 Isa yʼinda kono kine, iŋkino a kamadí gette ise kine in lekkiyo zeere, ise in tʼinda toŋ maŋ, in lekkiyo kettiyo kaŋ soo ti yode. 11 Iŋkino maŋ kun elo kooke wo kun noogo tudduguŋ kono kun di tʼihira a urzi zaapu kʼadduguŋ a Isa, wo ni suune naabo gette kun isiyo too.

12 Zemɓa ki nuŋ, ay un di rooteʼŋ, kun an ottilo a ɗoŋ ooɗibe yeebadaŋ a naabo ere a diinaguŋ, kane ɗoŋ Galmeega yʼan ele urzi an un diʼn dokkiyo wo an un diʼn aapuɗu geŋ me. 13 Kono naabo ere an isiyo a kune gette, kun an ottilo ɓaadaŋ wo kunʼni geyyo. Kun lekko ti toose ti tudduguŋ.

14 Zemɓa ki nuŋ, ay un tʼeele kooke, ay tʼeeseʼŋ: Ɗoŋ golguwo kun aapaŋ, ɗoŋ an dʼede orgiso addaŋ kun an eelo kooke, kun noogo ɗoŋ weedayaŋ umbo wo kun lekko tʼomɓin̰e ti ɗuwo pay. 15 Kun koona mentikagi, wenɗa soo toŋ a bakadí yi-kima ulsuko tʼulsuko ye, wo kun deho daayum isiyo beehiyko ti tudduguŋ wo ti ɗuwo pay.

16 Kun lekko daayum tʼuŋsuwo, 17 kun tondo Raa daa puukiyo, 18 aame ize munɗa tuuku toŋ maŋ, kun rooto koɗuwo a Raa. Gen̰n̰o sulɗi ɗoŋ Raa yi dehu kun dʼise a urzi lekkiyaguŋ ere kettiyo kaŋ soo tʼIsa Almasi te.

19 Kun i tʼeegire ye a naabo kʼUnde Kamilen̰ te. 20 Kunʼni kiigira ye ono ɗoŋ Raa yʼagisa zemɓa an un di rootiyo geŋ me, 21 wo ɗe ono geŋ kun tiʼn wollo pay: Ɗoŋ beehiye kun di zaapo adduguŋ, 22 wo kun ti leɗɗo tʼita sulɗi ɗoŋ ulpi tuuku toŋ maŋ.

23 Geŋ Raa wede i dʼeliyo toose geŋ, yode batum yʼun tiʼn iso ɗoŋ ooyiso kese a yode a urzi lekkiyaguŋ ere pay gette, yʼunni booho pay, yi booho tudduguŋ, unduguŋ, wo biza kʼulbuguŋ. Iŋkino maŋ a onniyo ere Galmeegiŋ Isa Almasi yi kimo gette, wenɗa yʼa ki roota kʼulsuko a tukki kune ye baa. 24 Raa wede unni waaku geŋ, yoŋ yi seeɗu zakiɗi a munɗa wede yi rootiyo yʼaasa me, geŋ yi tʼisa sulɗi geŋ me.

25 Zemɓa ki nuŋ, kun tondo Raa kay kono kaye me. 26 A zemɓa pay kun an tʼiso toose kaŋ bey sire sire aa zemɓa. 27 Wo aŋkeŋ kun ollo, nʼun di rooto ti suma Galmeega, mattup ette kun an ti-garoy a zemɓa pay. 28 Geŋ beeko ki Galmeegiŋ Isa Almasi ti koona egguŋ.