6
1 Kaye ay naabiya ti Raa kaŋ soo, iŋkino ay un tʼeele kookeʼŋ: beeko ere kun uune ti Raa gette, kun ti tʼise ki bita ye. 2 Ɗerec, ono eŋ Raa yi ruute ti kaaga, yʼede:
«A onniyo ere nʼa gize beekadó, nuŋ môoladá nʼa illiga,
wo a onniyo kʼuttiyo, nuŋ nʼa gi di nuuge*6.2 Kun wollo adda mattup ki Ezayi 49.8..»
Zemɓa ki nuŋ kun ollo, onniyo ere kʼuttiyo Raa yi ti ruute gette, aŋki tʼiina baa. Tode gettiŋ onniyo ere ki beeko Raa.
3 Kaye a wenɗa soo toŋ ay ki dehu ye, ay yi-di tʼise mokkolo morkiƴe a urzi Raa me, kono tʼurzi tuuku toŋ ɗuwo an ki tʼoone munɗa kʼulsuko adda naabadey ye. 4 Wo ɗe ay di dehu aame i isiyo munɗa toŋ ay kaza tuddey a ɗuwo kaye ɗoŋ naabo Raa ki kotto, ay dʼomɓin̰e ɓaadaŋ a sulɗi ɗoŋ aakede: Dabar, eedey ay ki tʼooniyo ye, wo ulbe kʼooɗiyo ɓaadaŋ geŋ me. 5 Ɗuwo an ay diʼn gussite, an ay diʼn iɓi adda daŋgay, an dʼoozige kulkuwo ki tuddey, ay dʼomɓin̰e a ormiyo naabo, wo onniyo muno moone umbo, addey guguba. 6 Ay kaza tuddey kaye ɗoŋ naabo Raa tʼurzi lekkiyadey ere kamilen̰, tʼurzi suuniyadey, tʼurzi kʼomɓin̰adey, tʼurzi beehiykadey, tʼurzi naabo kʼUnde Kamilen̰, tʼurzi geyyisadey ere tʼadde soo, 7 tʼurzi kazita kʼono ɗoŋ ɗerec wo tʼurzi toogo Raa. Kaye sulɗi kʼarkadey, lekkiyo ere ki diine a ɗaana Raa, tode gette aakede arku a bey kʼammade ki sakka wo dargine a bey geelo ki naakiwsa. 8 Ɗoŋ oŋgoŋ an ay dʼeliyo suma, ɗoŋ soŋ an ay diʼn koogire. Ɗoŋ oŋgoŋ an rootiyo sundey kʼulsuko, ɗoŋ soŋ ki beehiyko. Ɗuwo an ay diʼn wolliyo kaye aa ɗoŋ lohito kʼono, kaciŋ ay rootiyo ono ɗoŋ ɗerec. 9 An dʼisiyo aa an ay kiʼn suune ye, kaciŋ an ayni suune beehiye. An ay diʼn wolliyo kaye aa ɗoŋ unto, kaciŋ ay lekkiyo zeere. Ɗuwo an ay diʼn dabirsa, wo ɗe an ay ki tiʼn tôwwo ye. 10 An dʼisiyo ay tʼise sommagi dondoŋ, wo ɗe kaye daayum ulbey uŋse. Ɗuwo an ay diʼn wolliyo aa ay kʼede munɗa ye, kaciŋ†6.10 Kun wollo adda mattup ki 2 Korent 8.9. ɗoŋ ɓaadaŋ ay an diʼn isiyo ki laale. An elkiyo munɗa ay kʼede ye, kaciŋ sulɗi pay ay dʼede.
11 A kune zemɓadey ɗoŋ a Korent, kaye addey ay un tiʼn iiɗiba keren̰, ay unni geyyiso ɓaadaŋ. 12 Kaye ay unni giyye ɓaadaŋ, wo ɗe kune ay kiʼn giyye ye me. 13 Iŋkino maŋ ono ɗoŋ nʼun orbe eŋ aa meege yʼan orbe a in̰n̰izí, kune toŋ kun ayni geyyo aakede kaye ay unni geyyiso.
Kine ɓoy wede ki Raa zeere
14 Kune ti ɗoŋ i ki ziipe addaŋ a Isa ye geŋ, kun ti doɗɗe talgaguŋ soo ye. Munɗa ede koo a-kette kaŋ soo munɗa wede ki diine aa Raa yi dehu ti munɗa wede ulsu me? Aha, munɗa umbo! Munɗa ede koo a-kette kaŋ soo aŋ toore ti zimolo me? Aha, munɗa umbo! 15 Almasi ti Meeda siitanɗani, onamaŋ ette kaŋ soo ko? Aha, i kʼette ye! Munɗa ede ko a tʼokkiƴe wede i ziipe addí a Isa ti wede i ki ziipe addí a Isa ye me? Aha, munɗa umbo! 16 Munɗa ede ko a tʼokkiƴe Ɓoy Raa ti loŋgayi me? Aha, munɗa umbo! Ɗerec kine eŋ, kine ɓoy wede ki Raa zeere, geŋ aa ono ɗoŋ Raa yʼa ruute ti kaaga, yʼede:
«Nuŋ nʼa lekka adda diinayaŋ wo nʼa ozira ti kane,
nuŋ nʼa tʼisa Raazaŋ wo kane an tʼisa ɗoŋzó‡6.16 Kun wollo adda mattup ki Lebitik 26.12 wo Ezekiyel 37.27..»
17 Kono kamo Galmeega Raa yʼa ruute, yʼede:
«Kune ti diinayaŋ kun tʼaɗɗo kun tʼargu sigguŋ!
Munɗa wede un diʼn isa ganigi a ɗaana nuŋ Raa, kun botta ye,
wo nuŋ nʼun diʼn seeɗa bey sire§6.17 Kun wollo adda mattup ki Ezayi 52.11 wo Ezekiyel 20.34..»
18 Galmeega Raa toogo i jiire pay yʼa ruute sey, yʼede:
«Nuŋ nʼa tʼisa Meeguguŋ,
wo kune, kun tʼisa in̰n̰izó kuuli wo erayi*6.18 Kun wollo adda mattup ki Oze 2.1 wo Ezayi 43.6..»