Mattup ere ki sirwe
Zaŋ
yi riiŋe
Eŋ urzi kʼono ɗoŋ kun tʼoone adda mattup ettiyo
Ette «mattup ere ki sirwe Zaŋ yi riiŋe». Yi riiŋe a tode «erewo ere Raa yi biire». Wo ki kotto erewo gette i-kaza kane ɗoŋ ogiysito ti suma kʼIsa. Zaŋ yi ki dihe yʼa kiʼn waakite ti sumɓiyagaŋ ye, kono deero kʼakuuma an gi diʼn dabira ye. Yʼan di ruute mummino ɗoŋ i ziipe addaŋ a Isa an di geyye tuddaŋ me. Yoŋ yʼan di ruute soŋ, an di seeɗa zakiɗi a zaapu kʼaddaŋ a Isa gette, wo an koona mentikagi ti ɗuwo ɗoŋ eliyo dooyiso ere ti doolo a ki tʼettiyo ti Rabila Majjaanawa kʼIsa ye gettiyo.
1
Toose ki Zaŋ
1 Mattup ette i raaŋiya nuŋ wede dokkiyo, a koŋ erewo ere Raa yi biire*1.1 Koŋ erewo ere Raa yi biire: I-kaza ɗoŋ ogiyso ti suma kʼIsa a ume soo wo ɗoŋtú an diʼn waaku «in̰n̰izí», umboʼŋ i-kaza kine ɗoŋ pay i ziipe addiŋ a Isa. wo soŋ a in̰n̰izí ɗoŋ ni giyye tʼaddó pay. Wo kane i ni giyye nuŋ siidó ɗaŋŋal ye, ɗoŋ pay i suune urzi wede ɗerec geŋ anʼni giyye pây, 2 kono ɗerec ki Raa gette ti lekkiyo adda kʼaddiŋ, wo to tʼa lekka ti kine ki daayum. 3 Geŋ beeko, isiyo adde koɗuwo ti toose ki Meega Raa wo ti Isa Almasi Ulo ki Meega, i koona eediŋ. Sulɗi geŋ an in diʼn tʼelo kono in di lekke ti ɗerec wo ti geyyiso.
Ɗerec ti geyyiso
4 Nuŋ ulbó uŋse ɓaadaŋ aame nʼilliga in̰n̰izí oŋgo an sooru a urzi wede ɗerec, a urzi kʼoogoro wede ki Meegiŋ Raa yʼin ruute. 5 Wo aŋkeŋ koŋ erewo no, nuŋ ni di rooto kine in di geyye tuddiŋ. Kane ono ɗoŋ ni raaŋiya eŋ urzi kʼoogoro aware ye, kane miŋ ɗoŋ kun dʼilliga tʼume kʼeesiyo gen̰n̰o†1.5 Kun wollo adda mattup ki Zaŋ 13.34; 15.12,17.. 6 Wo to geyyiso gette, ti dehu kine in di daane urziyagi kʼoogoro Raa yi rootiyo, wo urzi kʼoogoro wede kun illiga tʼume kʼeesiyo, yi rootiyoʼŋ kun di geyye daayum tudduguŋ.
Kun koona mentikagi ti ɗoŋ i ti tʼisiyo tuddaŋ aa nebiyagi
7 Nuŋ nʼun rootiyo iŋkino kono aŋken̰n̰o i uɗɗo ɗoŋ daggiya ɗuwo ɓaadaŋ adda duniya me. Kane geŋ an kʼamɓu ye Isa Almasi yʼiido duniya yʼa tʼumɓe tudde ki wedusu me. Yoŋ wede yi rootiyo iŋkino geŋ yoŋ wede daggiya ɗuwo, yoŋ wede kʼolmiɗe kʼAlmasi. 8 Iŋkino maŋ kun koona mentikagi, kono naabo ere in isiyo ette i-ki tʼeŋgila ki bita ye, wo in aa ziiɗa maŋ in di tʼooney munɗa wede Raa yi dehu yʼin tʼeley. 9 Wede tuuku yi ki lekkiyo kettiyo a dooyiso ere ki Isa Almasi gi duuye ye, wo yi tʼaɗɗiya ti paate maŋ, yoŋ geŋ ti Raa kettiyo ye. Wo wede yi lekkiyo kettiyo a dooyiso gettiyo maŋ, yoŋ geŋ kettiyo ti Meega Raa wo ti Ulí Isa Almasi. 10 Aame wede yʼiido tudduguŋ wo yi ki dooyiso aa ere ki Isa ye maŋ, wede geŋ kun yi seeɗa ye a ɓoyguŋ me, wo toose toŋ kun i ise ye. 11 Ɗerec, wede isiyo toose a yode geŋ, aakede yʼa ti gitte kaŋ soo ti yode a naabadí ere olɗo yʼisiyo gette.
Ono ɗoŋ ki ɗaŋgu
12 Nuŋ oo dʼede ono ɓaadaŋ nʼun di roote miŋ ni ki raaŋe ye, wo nuŋ nʼelkiyo di kune nʼetta wo in di rootey bize ti bize kono addiŋ a ôoney tʼuŋsuwo. 13 Iŋkino maŋ in̰n̰i teemadí ere Raa yi biire‡1.13 In̰n̰i teemadí ere Raa yi biire: I-kaza ɗuwo ɗoŋ ogiyso ti suma kʼIsa a ume wede Zaŋ ge lekkiyo gen̰n̰o. an i-tʼize toose.
*1:1 1.1 Koŋ erewo ere Raa yi biire: I-kaza ɗoŋ ogiyso ti suma kʼIsa a ume soo wo ɗoŋtú an diʼn waaku «in̰n̰izí», umboʼŋ i-kaza kine ɗoŋ pay i ziipe addiŋ a Isa.
†1:5 1.5 Kun wollo adda mattup ki Zaŋ 13.34; 15.12,17.
‡1:13 1.13 In̰n̰i teemadí ere Raa yi biire: I-kaza ɗuwo ɗoŋ ogiyso ti suma kʼIsa a ume wede Zaŋ ge lekkiyo gen̰n̰o.