8
Isa yoŋ mozigo goole ɗoŋ seɗeke wede i jiire
1 En̰n̰o munɗa wede toc nʼun di roote eego me: Ki kotto kine in dʼede mozigo goole ɗoŋ seɗeke iŋkino. Yoŋ yi-guune a kandaane a ammade Raa toogo a jiire sulɗi pay. 2 Wo yoŋ wede naabo adda kʼume wede kamilen̰, yoŋ geŋ Ɓoy Raa ki kotto ikkima Galmeega batum wedusu ye.
3 Mozigo goole ɗoŋ seɗeke wede tuuku toŋ, Raa yi yʼ zaapu kono yi di tʼele sulɗi wo yʼaase seɗeke. Iŋkino maŋ mozigo goole ɗoŋ seɗeke wede ki kine en̰n̰o toŋ, i dehu munɗa a beezí kono yi di tʼele a Raa. 4 Aame aŋki Almasi yoŋ adda duniya maŋ, yi ki tʼise wede seɗeke ye kono ɗoŋ seɗeke a duniya ettiyo toŋ ede, kane an eliyo sulɗi a Raa ɗoŋ tode oogoro Muusa ti rootiyo. 5 Naabo ki Raa ere ɗoŋ seɗeke an isiyo a duniya ette, todʼte undiso, i deeƴiso sulɗi ɗoŋ ɗerec a kandaane. Geŋ aakede munɗa wede i iide aa suniye a Muusa, ki poone yʼa okkima Ɓoy Raa ki golmodo geŋ me. Aame geŋ Raa yi di ruute, yʼede: «Kʼollo koɗuwo, kʼodo kʼa tʼokkimoy ɓoy aa wede ki wulle nʼa-gize eego mokkolo*8.5 Kun wollo adda mattup ki Egzod 25.40..» 6 Wo ɗe aŋken̰n̰o Isa Raa yi ele naabo ere meeda a jiire ere ki ɗoŋ seɗeke pay, kono yoŋ yi konso a diine kine ɗuwo ti Raa, yi dʼamɓu attiɗi ki taasuwa ere a jiire taasuwa ere Raa yi gitte ti poone. Taasuwa ere aware gette ti konso ekki sulɗi ɗoŋ beehiye Raa yi ruute yʼan tʼela a ɗoŋzí, kane sulɗi geŋ a jiire ɗoŋ ki taasuwa ere ti poone.
7 Taasuwa ere ti poone gette tʼa ki tʼîide ye kʼisiyo munɗa wede Raa yi dehu me, iŋkino Raa yʼa ti bilke ti ere ki sirwe. 8 Wo Raa yi wulle ɗoŋzí an a ti doopiɗe a urzizí, iŋkino yiʼn aapuɗu, yʼede:
«Kun ollo, saŋ onniytagi an dʼaana, aame geŋ nuŋ Galmeega Raa nʼa-ketta taasuwa ere aware ti ɗoŋ kʼIzirayel wo ti ɗoŋ biza bumɓu Ziida.
9 Taasuwa ere aware gette ti kʼisa ye aa ere nʼa gitte ti maawaŋ ti kaaga te,
aame nʼan ziiɗo beezaŋ nʼan uɗɗo ti siiɗo Misir me.
Kane an kʼizire ki diine ye a urzi taasuwa gette.
Iŋkino maŋ nuŋ toŋ nʼan gime dar. Eŋ i rootiyo nuŋ Galmeega Raa.
10 Kun ollo, ette taasuwa ere ni ketta ti ɗoŋ kʼIzirayel,
aame onniytagi geŋ an tʼiŋgila maŋ.
Oogiradó nʼan ti raaŋa adda kʼeedaŋ wo nʼan ti zaapa adda kʼaddaŋ,
nuŋ nʼa tʼisa Raazaŋ,
wo kane an tʼisa ɗoŋzó. Eŋ i rootiyo nuŋ Galmeega Raa.
11 Wede tuuku toŋ ti diinayaŋ i kʼise ye yʼa dooya bakadí, ise leemadí toŋ maŋ,
a urzi suuniyo nuŋ Galmeega Raa me.
Ɗerec, kane pay an di nʼ suuna,
iise ti n̰eŋku a jiire bini goole a jiire.
12 Geŋ a tʼisa iŋkino kono a doopiɗadaŋ a urzizó gette nʼan tʼisa tambobino,
wo olɗikadaŋ ni ki seeɗa addó ye baa†8.12 Kun wollo adda mattup ki Zeremi 31.31-34..»
13 Raa yi rootiyo iŋkino ti taasuwa ere aware maŋ, geŋ i-kaza taasuwa ere ti poone gette i tʼize mazzini. Wo munɗa wede i tʼize mazzini wo yi gûulike geŋ, uupe goppoŋ yi-tʼeŋgila.