Rabila Majjaanawa kʼIsa
Matiye
yi riiŋe
Eŋ urzi kʼono ɗoŋ kun tʼoone adda mattup ettiyo
Ette Rabila Majjaanawa kʼIsa, Matiye yi riiŋe. Matiye geŋ yoŋ wede seɗɗu jibaaye, Isa yi yʼ wiike kono yʼa tʼise sanallusizí.
Adda mattupadí ette Matiye yi kaza tʼurzi mummino an ehe Isa me, naabadí ere yʼize a siiɗo, dooyiso ere yi duuye ɗuwo wo urzi kʼuntadí ti balɗiyadí pây. Isa yʼan di gizite urzi Raa a ɗuwo ti toogo, yʼan dʼeliyo beeko a ɗoŋ kʼeeni, yi-lommite siitanɗani wo yi dʼisiyo sulɗi ɓaadaŋ ɗoŋ i-ceeriyo ekki ɗuwo.
Matiye yi riiŋe Rabila Majjaanawa ette a zemɓadí Yawudiyagi, kono yʼan di kize ki kotto Isa yoŋ Wede kʼUttiyo wede nebiyagi an ruutite ti kaaga adda mattup ki Raa. Geŋ yoŋ Almasi Raa yi biire, wo mozigo goole wede a etto.
Wo ɗe ti poone Isa yʼan tiʼn gize a ɗoŋ kʼIzirayel sulɗi ɗoŋ ki Moziko Raa me, iŋkino toŋ kane ɗoŋ dokkiyadaŋ batum an di yʼ giigira. Kane an dʼele urzi Isa an di yʼîide, wo yoŋ yʼa bilɗe ti diine ɗoŋ unto, yʼa iŋgile kʼawwa ki kandaane.
1
Ita moŋgiɗagi kʼIsa Almasi
(Lik 3.23-38)
1 Kun ollo, eŋ sumɓiyagi kʼita moŋgiɗagi kʼIsa Almasi, yoŋ ti biza bumɓu mozigo Dawut, wo yode Dawut batum ti biza bumɓu kʼIbirayim.
2 Ibirayim yʼa tʼehe Isaaka, Isaaka yʼa tʼehe Yakup, Yakup yʼa tʼehe Ziida kane ti zemɓadí. 3 Ziida yʼa tʼehe Pares ti Zara, kane geŋ meedaŋ Tamar. Pares yʼa tʼehe Eziroŋ, Eziroŋ yʼa tʼehe Araŋ. 4 Araŋ yʼa tʼehe Aminadap, Aminadap yʼa tʼehe Nasoŋ, Nasoŋ yʼa tʼehe Salmo. 5 Salmo yʼa tʼehe Booz, Booz meedí Raahap. Booz yʼa tʼehe Ibet, Ibet meedí Riit. Ibet yʼa tʼehe Zeese, 6 wo Zeese yʼa tʼehe mozigo Dawut.
Mozigo Dawut yʼa tʼehe Salamoŋ, Salamoŋ meedí ere ki Iri. 7 Salamoŋ yʼa tʼehe Robowan, Robowan yʼa tʼehe Abbiya, Abbiya yʼa tʼehe Aza. 8 Aza yʼa tʼehe Zozapat, Zozapat yʼa tʼehe Zoram, Zoram yʼa tʼehe Oziyas. 9 Oziyas yʼa tʼehe Yotam, Yotam yʼa tʼehe Akaz, Akaz yʼa tʼehe Ezekiyas. 10 Ezekiyas yʼa tʼehe Manase, Manase yʼa tʼehe Amoŋ, Amoŋ yʼa tʼehe Zoziyas. 11 Zoziyas yʼa tʼehe Yekoniyas ti zemɓadí, a ozzine geŋ ɗoŋ kʼIzirayel an tiʼn ziki ɓuliko ki siiɗo Babiloon.
12 Aame ɗoŋ kʼIzirayel an tiʼn ziki ɓuliko ki siiɗo Babiloon maŋ, Yekoniyas yʼa tʼehe Salatiyel, Salatiyel yʼa tʼehe Zorobabel. 13 Zorobabel yʼa tʼehe Abbiyut, Abbiyut yʼa tʼehe Eliyakim, Eliyakim yʼa tʼehe Azor. 14 Azor yʼa tʼehe Sadok, Sadok yʼa tʼehe Asim, Asim yʼa tʼehe Eliyut. 15 Eliyut yʼa tʼehe Eliyazar, Eliyazar yʼa tʼehe Matan, Matan yʼa tʼehe Yakup. 16 Yakup yʼa tʼehe Yusup kule ki Mariyam, tode ere tʼa ehe Isa, yoŋ an di yʼ waaku Almasi Raa yi biire.
17 Iŋkino maŋ an di gize ita moŋgiɗagi koomat makumu piɗe, iise ti Ibirayim bini Dawut. Saŋ ita moŋgiɗagi koomat makumu piɗe, iise ti Dawut bini sokiyo ɗoŋ kʼIzirayel ki siiɗo Babiloon. Saŋ ita moŋgiɗagi koomat makumu piɗe, iise ti sokiyadaŋ ki siiɗo Babiloon bini ehiyo kʼAlmasi Raa yi biire.
Ehiyo kʼIsa Almasi
18 Kun ollo tʼurzi tuuku an dʼehe Isa Almasi me. Mariyam ere tʼa yi tʼeha gette todʼ tʼibire Yusup. Wo ki poone an di koona ɓoy ɓotto geŋ, ti-ti ziiɗa mahuwe ti toogo kʼUnde Kamilen̰ ki Raa. 19 Yoŋ Yusup kule kʼebiratú geŋ yoŋ wede ki diine, yi ki dehu yʼa ki ti waare ye, iŋkino maŋ yʼa dihe yʼa tʼarga ti tuddutú kaŋ mookiko. 20 Aame yʼilke iŋkino maŋ, maaleeka ki Galmeega Raa yʼa yʼuuna kaŋ suniye wo yi di ruute, yʼede: «Kʼollo, Yusup kee wede ti biza bumɓu Dawut, kee kʼorgiɗe ye, ki ti sooɗo ere kʼebirayá Mariyam te, kono ulo wede ti tʼeha geŋ yoŋ yʼettiyo tʼurzi toogo kʼUnde Kamilen̰. 21 Todʼ tʼa tʼeha ulo wo kʼa yi waaka sundí Isa*1.21 Isa ti ono Yawudiyagi, Zozuwe, i-kaza «Raa yʼelo uttiyo.», kono yoŋ geŋ yʼa utta ɗoŋzí ti olɗikadaŋ.»
22 Sulɗi pay geŋ a iina kono a-tʼette a ono ɗoŋ Galmeega Raa yi ruute ti kaaga ti bize nebi, yʼede:
23 «Kun ollo, uto koŋso tʼa seeɗa mahuwe wo tʼa tʼeha ulo,
an di yʼ waaka sundí Emanuwel†1.23 Kun wollo adda mattup ki Ezayi 7.14..»
Suma gette i-kaza «Raa ti kine».
24 Aame Yusup yi tʼinne maŋ, yʼa tʼize munɗa wede maaleeka ki Galmeega Raa yi-ruute yʼaase, yʼa ti ziiɗa eddí Mariyam te. 25 Wo yi kʼiide tuddutú ye bini tʼa tʼehe ulo wede Yusup yʼa yi wiike sundí Isa.