Apokalipse
Eŋ urzi kʼono ɗoŋ kun tʼoone adda mattup ettiyo
Ette mattup ki Zaŋ wede zina kʼIsa Almasi yi riiŋe. Sulɗi ɗoŋ pay yi riiŋe eŋ yiʼni wulle wo yiʼn illiga adda munɗa i-dʼiido aa suniye. Adda mattup ette Zaŋ yʼan dʼeele kooke a kane ɗoŋ i ziipe addaŋ a Isa, kono ti kaaga geŋ ɗuwo anʼni dibire ɓaadaŋ. Iŋkino yʼan rootiyo an aa seeɗa zakiɗi bini onniyo kʼita, wo an di zaape elkisadaŋ a Isa.
Adda mattup ette i dʼede sulɗi ede kine in diʼn suune: Ki pooneʼŋ, kane siitanɗani an naabiya adda duniya ette, iŋkino kane ɗoŋ i ziipe addaŋ a Isa geŋ an tʼoona dabar ɓaadaŋ, bini ɗoŋ oŋgoŋ ti diinayaŋ ɗuwo an tiʼn tʼîda. Ki sirweʼŋ, Isa yoŋ Galmeega, kane ɗoŋ pay i ti toogiyo kʼollige kʼono Raa geŋ yʼan diʼn ceera. Kʼaɗuweʼŋ, Raa yi yi boohiyo munɗa wede yi ruute yʼan tʼela a kane i ziipe addaŋ a Isa, wo a jiire a kane ɗoŋ ɗuwo an tiʼn îide kono yode.
Zaŋ yi wulle soŋ sulɗi ɗoŋ aana a onniyo kʼita. Isa yʼa ceera Meeda siitanɗani ti maleekiyagutú ti kane ɗoŋ pay illiga onamtú, wo yi-tiʼn sebba adda baala kʼuwwo. Aame geŋ i dʼisa kandaane aware, siiɗo aware, geeger aware wo Raa ti Galmeega Isa an di lekka adda ti kane ɗoŋ pay illiga onamaŋ.
1
Sulɗi ɗoŋ Isa Almasi yi gizite a Zaŋ
1 Mattup ette ti kaza a sulɗi ɗoŋ Isa Almasi yʼan iiɗiba ita a ɗoŋ naabadí. Raa yi dʼele ono eŋ a Isa Almasi kono yʼan tʼooɗiba ita an di suune munɗa wede aana goppoŋ. Kono kʼiŋkino Isa Almasi yʼa igibe maaleekayí ki tukki Zaŋ wede naabadí, kono munɗa eŋ yi di ti yʼ kize. 2 Maŋ Zaŋ yʼan di gizite a ɗuwo sulɗi ɗoŋ pay maaleeka yi gize, yʼede: «Ki kotto eŋ ono Raa, wo geŋ yode Isa Almasi batum yi kaza ono geŋ ɗerec.»
3 Uŋsuwo a wede i gariya wo a ɗoŋ ollige ono ɗoŋ Raa yʼigibo adda mattup ettiyo. Uŋsuwo a ɗoŋ ollige ono ɗoŋ an riiŋe en̰n̰o wo an aa seeɗu geŋ me. Geŋ kun suuno koɗuwo sulɗi eŋ peeɗadaŋ goppoŋ a tʼisa.
Toose ki Zaŋ
4 Mattup ette i raaŋiya nuŋ Zaŋ. Toose a kune ɗoŋ ogiyso ti suma kʼIsa a geegiryagi sarat ki siiɗo kʼAazi*1.4 Siiɗo kʼAazi: I-kaza siiɗo soo adda siiɗiyagi pay ti kaaga ɗoŋ Romeŋ ga-dukke, aŋken̰n̰o todʼte a kese peeɗo kʼooriyo ki siiɗo Turki.. Beeko ti toose i koona egguŋ tʼurzi Raa, yode wede tʼume duniya tʼa tʼeesa ɓotto too, bini aŋki wo bini onniyo kʼita toŋ yoŋ ede. Wo kane undiyagi ɗoŋ sarat ki Raa a ɗaana kaakido mozikadí gen̰n̰o toŋ, an un elo beeko ti toose. 5 Yode Isa Almasi wede i ziiɗa zakiɗi a urzi kazita kʼono Raa, yʼun elo beeko ti toose. Yode wede i bilɗe ki poone ti diine ɗoŋ unto, yoŋ Mozigo mozagi a siiɗo pay.
Yoŋ yʼinni giyye, yʼin diʼn uɗɗe tʼadda kʼolɗiko tʼurzi puuzadí iɓi. 6 Yoŋ mozigayiŋ wo kine ɗoŋzí, yʼin diʼn ize kine ɗoŋ seɗeke ki Meegí Raa. Iŋkino tamma ti moziko a koone a yode ki daayum. Eyye. 7 Kun wollo, yʼettiyo adda dondari. Wede tuuku toŋ yʼa yi wolla, ise ɗoŋ i yʼ girbe tʼaryagi toŋ an di yʼ wolla. Ita ɗuwo pay adda duniya an ɗillita an dʼôola kono yode. Geŋ ki kotto a tʼisa! Eyye. 8 Galmeega Raa yʼa ruute, yʼede: «Nuŋ sundó Alpa wo Omega. Nuŋ Raa toogadó tʼa jiire pay, nuŋ wede tʼume duniya tʼa tʼeesa ɓotto too, bini aŋki wo bini onniyo kʼita toŋ nuŋ ede.»
Zaŋ i-dʼiido munɗa aa suniye, yʼa wulle Isa
9 Mattup ette un raaŋiya nuŋ Zaŋ leemaguŋ, nuŋ ti kune in lekkiyo kettiyo kaŋ soo tʼIsa. Kine in dabirsa kaŋ soo wo in seeɗa zakiɗi a urzi kʼIsa me, yoŋ mozigo kine pay. Wo nuŋ an tiʼn ziɗɗe a siiɗo ere a diine kʼahu sundutú Patimos, kono anʼde nʼize ulsu ni kazita ono Raa, wo ni gizite urzi wede ɗerec Isa yʼo iiɗiba ita. 10 Onniyo soo, onniyo Dumas maŋ, Unde Raa ti-tʼûune adda kʼaddó, saŋ ki daaró nʼa illiga golla awwa ti rootiyo aa ti parre, 11 ti dʼeesiyo: «Munɗa wede ki wolliyo eŋ, ki ti yʼ raaŋa adda mattup, wo mattup gette kʼan tʼagiba a ɗoŋ ogiysito ti suma kʼIsa i lekkiyo a geegiryagi sarat: a Epez, a Simirn, a Pergam, a Tiyatir, a Sarde, a Piladelpi wo a Lahodise gen̰n̰o.»
12 Aame nʼilliga iŋkino maŋ, nʼa gilɗe daaró nʼa wolle o rootiyo wee wee. Maŋ nʼa wulle pitila sarat ki dap†1.12 Pitila ki dap: I-kaza munɗa aa gooro ki dap i-dʼede garzin̰a ti pitila eego eego.. 13 Wo a diine pitila sarat gette, ni wulle munɗa i deeƴiso aa wedusu yi tʼusso kalle sohuru i dʼargu a ɗonɗali, wo ser ki dap yʼa-ziɗɗe laŋkaƴa. 14 Ilali kʼeedí tuwarɗi kar aa kaawa, edayí i dʼomilte aa uwwo. 15 Zoŋɗí aa maala teezowo an ti tʼele adda kʼuwwo i dʼoggirso ɗoɗɗot, golladí i ɗurriyo aa ooye yʼokko. 16 A beezí kʼammade molɗali sarat, wo ti bizí i dʼaɗɗiya kasigara kesiyagutú sirwaŋ pay korɓe robboŋ. Ume kʼedayí i rala aa peeɗo ti ziiɗa.
17 Aame ni yʼ wulle maŋ, nʼa iire a zoŋɗí aa nʼinda, maŋ yʼa-ti ziipe beezí kʼammade a tuddó wo yʼo di ruute, yʼede: «Kee kʼorgiɗe ye, nuŋ wede ki poone wo kʼita toŋ nuŋ. 18 Nuŋ wede ni lekkiyo zeere, wo nuŋ wede ti kaaga nʼa inda wo nʼa bilɗe, aŋkeŋ ni lekkiyo zeere ki daayum. Nuŋ oo dʼede toogo a tukkʼunto wo a tukkʼume ki ɗoŋ i tʼinda. 19 Iŋkino maŋ munɗa wede ki wulle geŋ, pay ki ti yʼ raaŋa. Munɗa wede ki wolliyo aŋken̰n̰o wo wede aana kʼita toŋ, ki ti yʼ raaŋa pay. 20 A molɗali sarat ɗoŋ ki wolliyo a beezó kʼammade wo ti pitila sarat ki dap eŋ, kʼollo nʼa di tʼooɗo itadaŋ. Molɗali ɗoŋ sarat eŋ, i-kaza maaleekiyagi sarat ɗoŋ Raa yʼigibe ki boohiyo ɗoŋ ogiysito ti suma kʼIsa a geegiryagi sarat gen̰n̰o. Wo kane pitila sarat geŋ, i-kaza ɗoŋ ogiysito ti suma kʼIsa a geegiryagi sarat gen̰n̰o.»