Jayikappa ngurra Piijilnga junu yanu kakarrakartikija. Yanu uuu yanu uuu ngurra ngarringu. Palujanu wulu yanu kayila nyangu wiilpa kalyuwinti, yapu ngarripayi ngarnawarra. Jiipuku maajaluya yarnngalu yapuwintilu kalyungka palungka yangajulpayi, kujupakajaluya ngulyulu jikiljaku. Jiikajaluraya rukalu kalyu marnmara yintipayi jiipukajaku. Jiipuku maajaluya yarnngalu yurnturaya yapu ngamu junkupayi Jayikapju-jananya nyangu yupalpaya ngarapayi. Karlkikuyila-janampaya majalpayi yarnngaluyilaya yurntulkuraku.

Jayikapjuyila-jananya yanu japirnu, “Ngurra wanyjajanunyurra?” Wajarnuyilaluya, “Ngurra Yaaranjanulaju.” Maa-jananya japirnu, “Watikuranyurra Liipanku ninti?, jirlpi Niyuku kajaku?” “Yuwa, nintilajura. Niyukurnukulajura kajaku ninti.” Maayila-jananya japirnu, “Kaji Liipanpa palya nyinin?”

Wajarnuluya, “Yuwa, palya nyininpa. Paluku yurntaltu jiipu kangkura kalyu yungkuni ngaangka. Jiinyayilarni yankuni.” Nyanguyila Jayikapju nyurranya ngamurrinyja. Kayilara Jayikapju kujulu yapu yurnturnu. Palujanuyilara kalyu marnmara yintilpayi wanti jiimiliku jiipuku. Marnmara pukurlju yintilpayi kalyu. Yanuyilalu Riijilkutu pukurljuyila nyunyjurnu yulanguyilara. Wajarnura, “Nyuntungajun ngayuku yinkarni. Nyuntuku mamaju kaaka. Ripikakurnurna kaja.” Maa kulirnuyila yanu palunyakurnu mama wajarnuyilalu. Pukurljuyila kulirnu Liipanju yanuyila nyangu Jayikappa kalyungka ngarapayi. Pukurlarringuyila yampurnungkupula nyunyjurnungkupula. Walarnu mayakutu marlaku katingu.

Jiingka Jayikappa warrkamurrira Liipanku ngurrangka nyinapayi. Riijilpa nyinapayi ngumpa juri. Jayikappara nyurirripayi Riijilku. Maayila Liipanju japirnu, Jayikappa, “Julyjun nyuntu warrkamurripayi, mirtarnanta yungkupayi mani, paki. Ngayukujun warrkamurriku ngayulurnanta mani maju yungku. Kajijun warrkamurriku?” Jayikapjulu wajarnu, “Wiyarnin mani yuwa! Jamartapungkurnin ngaanya tuju Riijilpa rawayilarnangku warrkamurriku, yiiya japan wulikajangka.” Liipanjura yuwajunu, “Rawajun warrkamurriku, tujurnanta ngaanya Riijilpa yiltalu yungku.”

Jayikappa rawa warrkamurripayi tujukura ngaaku Riijilku, jamartajanuku. Mirta Riijiljura puntu kujupaku kulilpayi, paki, Jayikapkura, kujuku kulilpayi, jamartajanuku. Jayikapjulu maa wajarnu Liipanja, “Rawarnangku warrkamurringu, tujurni yuwa jamartajanu!” Liipanpayila-janampa mirrangu puntu karlkikajaku, walyjakajaku. Kujungkarringuyilaya Liipanjuyila wajarnu-jananya puntungka, “Tujurnara yungku ngaaku Jayikapku julyjurnalu jamartapungu.” Yumurringuya puntulu tujulu mirrkaya manu kujungkaluya ngalkukijalu pukurlju, jumaji palu kujarrapula marrirtirrikijalu.

Maa mungarringu ngalanguya jikirnuya. Liipanjuyila palumili yurntalpa murrkangunyawanpa yini Liiya katingu, Jayikapku ngurrakutu. Jayikappayila marlaku yanu ngurra walyjakutu. Kurrungu ngarrikijalu nyangu tuju ngarrinyjan, palunyaku warntungka. Ngarringuyilapula yungunpakarnu. Kanarringu nyangu Jayikapjunga, kangku wajarnu, “Tujungkarnalu Liiyangka ngarringu, Riijil kararnuyilarna.” Pakarnu wirrilyiwintilu yanulu Liipankutulu, wajarnuyilalu, “Pakirnin kajarnu Riijilku nyinaraliju. Liiyarnin nyaajanulu yungu? Rawarnangku warrkamurringu nyuntuku ngaangka. Nyarrurningkun paki kajarnu.”

Liipanjulu maa wajarnu, “Ngurra ngaangkalulaju tuju yungkuninpa murrkangunyajara. Ngulampayilalaju yungkuni marlawanajanu. Kurlu majala! Karrpuparakungka-lajungku pukurlju ngalku, Riijilpayilaparnanta yungku, kujarra-pulanyan kanyilku, Liiyakamu. Julyjun warrkamurringu. Paluyurun yarralku nyinaku warrkamurriku, yiiya japan wulikajangka.” Jayikapju yuujunu, “Yarralkurnangku warrkamurriku.” Mirrkakamu kukaya ngalangu, ka Liipanjura Riijilpa yungu. Ngurrakutu pukurlju katingu, kaya yupalpa nyinapayi. Mirtara Liiyaku layikamuminyirri nyinapayi, paki, Riijilkura layikamuminyirri nyinapayi. Yumurringu ka Liiya warnngilpayi. Palujanu Liipanjura tuju kujupa yungu yaalpamura Riijilku, yini Palana. Palungara warrkamupurluka nyinapayi. Yarrarnura Liiyaku yaalpamura yungu tuju yini Jilpa. Palungara Liiyaku warrkamupurluka nyinapayi.

Jayikappara rawa warrkamurripayi Liipanku. Rawapula Jayikappakamu Liiya nyinangu kajapula yarnnga kanyirnu. Yiningaraya ngaakajakunga Ruupinpa, Jimiyanpa, Lipayi, Juuta.