Yanuya Jayikapmalu kayilapa-jananya puntu yupalpa wajarnu yiyarnu, “Kurranyiya yarra!, Yiijukarti ngayuku kurtakarti, palumili ngurrakarti. Maayilalunyurra wajalku ngayurna marlakarti yankuni.” Yanuluya wajarnu Yiijungka, kaya marlakurringu wala ngurluwinti. Jayikapju-jananya nyangu japirnu, “Nyaakunyurra ngurluwinti wala yankuni?” “Paki, warnmarlawintirni yankuni nyuntuku-ngkuya, nyuntumili kurta, Yiiju.” Ka Jayikapju kulirnu ngurlurringu, “Wanyjalarrikurna?”

Maayilalu Mama ngarnawarrapurlukangka japirnu, “Mama! Nyuntulurnin julyju wajarnu ngayunyarnin ngampurrmara kanyilkijalu, marlakurna ngurrakutu walyjakutu yankura. Yangkarnin julyju ngampurrmara kanyilpayi. Kuwarrirnin ngampurrmalku. Palunyayurukurnanta japirninpa. Kuwarri ngayuku kurta Yiijulu wajarnu miturni pungkukijalu, warnmarlawintilu. Palunyangkamarrarnanta nyuntu japirni, ngampurrju-lanyajun kanyilkura. Yangkarnin julyju wajarnu, ngampurrju-lanyajun kanyilkijalu. Palunyayurukurnanta japirni, ngampurrju-lanyajun kanyilkura, ngayumili walyjakaja, nyupakajakamu kajakajakamu yurntalpalurrju, warnmarlawintilu-lanyaju pungkujaku.”

Palujanuyila mungangka Jayikappa pakarnu puntu-jananya karlkikaja manu kujungkarnu. Puntungka karlkingka wajarnu, “Jiipu yarnnganyurra kujungkalku ka kangkuranyurra yungku, ngayuku kurtaku. Kurranyiluranyurra katiku yungku. Ka Yiijungkalunyurra wajalku jilanya, ‘Ngaakajalajunta jiipukaja yungkuninpa Jayikapmili. Palulu-lanyaju wajanu katiralajunta yungkuraku.’ ” Ka Puntungka karlki kujupangka-jananya wajarnu, “Nanikurtpa yarnnganyurra kujungkalku ka kangkuranyurra yungku, ngayuku kurtaku. Kurranyiluranyurra katiku yungku. Ka Yiijungkalunyurra wajalku jilanya, ‘Ngaakajalajunta nanikurtkaja yungkuninpa Jayikapmili. Palulu-lanyaju wajanu katiralajunta yungkuraku.’ ”

Yarrarnu-jananya puntungka karlki kujupangka wajarnu, Jayikapju, “Kamalpa yarnnganyurra kujungkalku ka kangkuranyurra yungku, ngayuku kurtaku. Kurranyiluranyurra katiku yungku. Ka Yiijungkalunyurra wajalku jilanya, ‘Ngaakajalajunta kamalkaja yungkuninpa Jayikapmili. Palulu-lanyaju wajanu katiralajunta yungkuraku.’ ” Yarrarnu-jananya puntungka kinpa karlki kujupangka wajarnu, “Tangki yarnnganyurra kujungkalku ka kangkuranyurra yungku, ngayuku kurtaku. Kurranyiluranyurra katiku yungku. Ka Yiijungkalunyurra wajalku jilanya, ‘Ngaakajalajunta tangkikaja yungkuninpa Jayikapmili. Palulu-lanyaju wajanu katiralajunta yungkuraku.’ ”

Karru Japakja wajara-jananya palukaja yiyalpayi warrkamupurluka laltu, Yiijukuraya palukaja kangkuraku, jilanya nanikurtkajakamu, jiipukajakamu, kamalkajakamu, tangkikajalurrju. Marlawanarringuyila Jayikapju-jananya tujukajakamu jijikaja mirrangu manu. Rukarringunyjangka wajarnu-jananya, “Kurranyiya yarra!, karrungka yapurrakarti majala! Marlayilarna-nyurranya ngarriku wanalku pakalku.”

Ngarringu kutuwati kanarringu, kalu Mamamili wikarru miralarringu, ka martuyururringu yikipayi. Palujanu jurtalungkupula yampura ka mankura warningkupayi, rawalu, kayilapa yungunpakarnu. Wululungkupula yampura warningkupayi, ka Jayikapju likamunu palu wikarru. Kayilapa wikarrulu Jayikappa pulyku warlangu. Ka wikarrulura wajarnu, “Mirtarnin wululu yampula!, jirntu ngaanya pakalkija.” Jayikapjura wajarnu, “Wulurnanta yampulku kanyilku, Mamajuran nyuntulu japilkura, ngampurrju-lanyaju kanyilkura, Yiijumapungkamarra.” Ka wikarrulura japirnu, “Nganan yini nyuntu?”

Maayilalu wajarnu, “Ngayurna yini Jayikappa.” Yarrarnulu wikarru palunyalu wajarnu, “Mirtan Jayikappa yini nyuntu nyinamalpa. Yini kujuparnanta wajarninpa, ‘Yijurilpa’.” Jayikapjulu japirnu, “Nganan nyuntu yini?” Palunyalu puntajilu japirnu, “Nganakurnin ngayu yiniku japirninpa?” Palujanu wajarnu wikarru palunyalu, “Yankurnalu Mamangka wajalku ngampurrmara-nyurranya kanyilkura.” Jiijanu wati palunya yanu pakirringu. Kayilapa Jayikapju purtu kulilpayi, “Julyjuya puntulu karlkilu ngarnawarrapurluka nyangu kaya miturringu. Kuwarri ngayulurna nyangu, karna wanka wulu nyininpa.” Kayilapa Jayikapju yinijunu ngaanya ngurra, “Piinyulpa”.