Jayikapmaluya nyinangu ngurraparaku ngarringu. Palunyangkalu wangkangu Mama ngarnawarrapurluka Jayikapja, “Pakala-jananya kati!, ngapikarti?, Piijilkarti. Yangkarnanta nyukurni miralangkapayi, ngurlunyngurlunyparnanta parratipayi. Yankunyurra purlikajanyurra yawulku tiipulyuru palyalku, tiipul jiingkanyurra mirtayirti kujalkura, ngayurninyurra pukurlju marninypungkuraku.”

Wangkanguyila-janampa Jayikappa palunyamilikajaku. “Yaninpalawu ngurra Piijilkutu. Ngayunpalara jiingka nyinaku, Mama ngarnawarrapurluka marninypungkuraku. Mirtala kujupa warta marninypungamalpa, paki, Mama ngarnawarrapurlukawiyaju. Wartakaja jiikajala katiku wirrupungku, kujukuminyirrilara nyinaku Mamaku, ngarnawarrapurlukaku. Jarrpakulalu jinajina kujupangka yankuyilapala jurimarta. Mama jiilurni wululu ngampurrju kanyilpayi.” Kaya pirti jawarnu, wartakajaya wirrupungkuraku. Kaya pakarnu, purlikamu, wartalurrjuya manu, kaya kangu wirrupungu. Tuunyjunuyilapaya, wartawati Jikimja ngamu. Piijilkartiya yanu Jayikapju ngapinu purlijanu tiipulyuru.

Mama ngarnawarrapurlukalura wajarnu, “Nyuntun yini Jayikappa nyinani, karnanta yini kujupa wajani, ‘Yijurilpa’. Ngayurna-nyurrampa maaja maju nyininpa. Kanyilku-jananyan nyuntulu jiji yarnnga. Palunyangkayila-jananyaya jiikajalu kanyilku jiji yarnnga. Wulungulyuya jiji yarnngarriku, nyuntumili marlajanukajaya yarnngaminyirri nyinaku. Nyuntuyilan-janampa nyamu jirlpi nyinaku. Yinta kujupangka kujupangkaya yankura yutirrimalpa. Yinta kujupangka yinta kujupangka yankuya yarnngarriku. Kuju-janampan nyamu jirlpi nyinaku. Julyjura nyinapayi ngurra ngaanya, Yipuramku. Ngayulurnara jamartapungu palumili marlajanukajaluya kanyilkuraku. Wulu-nyurrampa ngaraku ngaanga ngurra walyja. Yajikju kanyirnu ka pakirringu. Ka kuwarrirnanta nyuntu juninpa, kanyilkurakunyurra, parna ngaanya yini Kayinanpa.”

Ngurra jiiwanaya nyinapayi kayilapaya palujanu yanu, ngurra Yiparajkarti. Ngalyarlpangulyuyilapaya paljurnu, Riijilju jiji kanyirnu. Jijiwiyaju wankarringu yakupartarnu pakirringu. Jiingkangulyuyilapaluya yulangu juturnu. Jijingayilapa pukurrakurnunga, yini Pinjaminpa.

Palunyajanu Jayikapmapuya yanu ngurra kujupakarti, Mamirikarti, yirna Yajikpa nyakurakuraya. Ngurra jiinya tawunpa Yipurunja ngamu nyinapayi. Yajikpa rawa nyinangu jirlpirringu, wan yantartan yayiti yiiya. Palunyajanu jirlpi jii miturringu. Kayilapula kurtararralu katingu tuunyjunupula, Yiijulukamupula Jayikapju.