Yiiya kujarra Juujappa wulu nyinapayi jiilja. Parna Yijipiku maajalu jumalu kapukurrilu nyangu, jilanya. Karrungka jumangka Piiru ngarapayi. Palulu nyangu pulukukajaya japan wulikaja pakarnu karrujanu, kalyujanu. Jiikajalungaya tujukajalu yukuri ngalkutima, jinyjimamakajalu. Karlkin kujupaya marlakarti pulukukaja tujukaja japan wulikaja pakarnu murrjinkaja. Murrjinkajalu-jananyaya ngalangu wiyarnu, puluku jinyjimamakaja. Jiinya jukurrpa nyangu maajalu ka kanarringu, purtu kulirnu.

Ka yarlirnu warntu ka marlaku jarrpangu ka kunyalarringu. Warntungkalu ngarringu ka yarrarnu nyangu kapukurrilu. Warta japan wulikajaya mirrkawinti pakarnu ngarapayi. Palujanu warta kujupakajaya japan wulikaja pakarnu ngarapayi, mirrka japuwintiya tikirlwintiya. Kaya warta palunyakajalu ngalangu wiyarnu, warta kujupakaja mirrkawintikaja. Maajalu jilanya jukurrju nyangu ka kanarringu. Purtu kulirnu ka marlaku kunyalarringu.

Yungunpa pakarnu nyinangu kujilpa. Jukurrpa jii puta kapukurrinu ngurrangkalu, walyjangkalu. Maajalura purtu jukurrku paluku kulilpayi. Ka-janampa mirrangu jukurrku nintikajaku. Jakurljunu-jananya jukurrpa puta nyakunyjajanulu. Purtuya kulira ngarapayi. Palunyalu maajakura wamapurlukalu wajarnu, “Julyjurnanta wajalngara, marlalurna kulirnu, kawarnkawarnarringurna. Jiiljarna nyangu warrinyji, Yipuru wangkakurlu. Palunyalurni jukurrpa nintijunu. Palunyamili wangka jungarringu.”

Maajalu jumalu wajarnu warrkamupurluka maa yiyarnu jiilkarti, Juujapkura mirraraku. Walarnuya katingu maajamilikarti, ngurrakarti. Kalu maajamililu warrkamupurlukalu yungu jawujakamu jaartakamu, ngarnkurrpintilurrju. Kangku ngarnkurrpa katupungu junu parnangka. Ka yanu ngarapayi maaja jumamilingka mayangka kaninyjarra. Maajalura Juujapku wajarnu, “Mungangkarna jukurrpa nyangu. Karna-jananya purtu japirnu, jukurrpa nintikaja. Ngayumililu wamapurlukalurni wajarnu nyuntungan jukurrku ninti.”

Juujapjura wajarnu, “Maaja nyuntun juma ngarinpa. Ngayulurnanta mirta wajalku, Mamalurni ngayumililu ngarnawarrapurlukalu nintijunku, karnanta jakurljunku.” Palunya jukurrpa kujarra Maajalu Juujapja jakurljunu. Juujapju kulirnu kara wajarnu, “Jukurrpa jii kujarrajanun wangka kuju kulilku. Mamalu ngarnawarrapurlukalunta nintijunu, ngulampa palyalkijalu. Pulukuya japan ngarapayi jinyjimamakaja. Puluku jii japanyuru yiiya japan wulikajangkaya martu yarnnga mirrka jumakurlu nyinaku. Jiiyurulurrjun nyangu warta japan wulikaja mirrkakurlu ngarapayi. Ka pulukuya murrjinkaja japan wulikaja marla pakarnu. Jiiyuruya puluku japan wulikajayuruya, yiiya japan wulikajangka martukaja mirrka japuwartawinti nyinaku. Jiiyuruya marla pakarnu warta mirrkaparni, japan wulikaja.”

Juujapju maajangka jumangka wajarnu, “Mirrkaparnikamu kalyuparnila nyinaku, yiiya japan wulikajangka. Mama ngarnawarrapurlukalunta maajalu kurranyikurlu wajarnu. Kuwarrila mirrkakurlu nyininpa. Wulula mirrkakurlu nyinaku, yiiya japan wulikajangka, kala wulu nyinaku mirrkaparni yiiya japan wulikajangka.” Juujapjura wajarnu maaja jumaku, “Jiingka yiiya japan wulikajangka mirrkaparnila nyinajaku, yirna maaja mirrkaninti nyinajula! Palunyalu-jananya wajalku warrkamupurlukangka yarnngangka, kaatanpurlukakutu-jananyaya yankura ka wangkaraku.

“Jilanya-jananyaya wajalku, ‘Mirrkaparnila ngulampa nyinajakungkamarra, wilykikajanyurra warrulku ngarranpungkuka junku, maaja jumaku. Kaya mirrka wilyki jiikaja warrulku katiku mayangka kutungka junku, ngulampaku.’ ” Juujapjura maajaku jumaku yarrarnu wajarnu, “Nyuntu-janampan mirraku jantulwintikajaku nyakulaya kanyilkuraku, maya mirrkakurlu. Yiipiya jilanyalu palyalku mirrkala palyalu ngalku, kalyu pakirrinyjangka.”

Wangka jiinya kulirnu pukurlarringu maaja juma. Palunyamili warrkamupurlukaku-janampa wajarnu, “Ngaa warrinyji ngarinpa nintipuka, ngarnawarrapurlukaku maparnwinti. Ngaa nintipukanga nintiminyirri nyinani, nintipukakajangkamarra munkarra nyinani.”

Juujapkura maajalu wajarnu, “Mama ngarnawarrapurlukalunta nintijunu. Yiltan nyuntu nintipukaminyirri ngarinpa, nintipuka kujupakajangkamarra. Kuwarrirnanta maaja juma juninpa martu yarnngakuyarraku, parna Yijipimartajiku. Maaja karlkin kujupaya nyininpa nyuntungka kaninypa. Ngayuwiyajurnangku nyuntuku maaja nyinaku. Ngaamartajiya ngayumili yarnnga, nyuntumili warrkamupurlukaya nyinaku.”

Juujappa yanu nyinapayi mayangka, maaja-janampa. Parna Yijipiwanaya maaja Juujapmapu yankupayi, tawunkarti. Maya kujupa jumaya ngapilpayi. Palujanu-jananyaya yankupayi kaatanpurlukakutu yarnngakutu. Kaya mirrka ngarranpungkula kangkura ka maya palungka junkupayi. Jantulwintikajaluya junkupayi maya palungka, mirrka kanyilkuraku. Jiiyuruya mayakaja ngapilpayi, ngurra kujupakamu ngurra kujupakajangka mirrkakajaya junkuraku. Palujanuya mirrkakaja kangkupayi kaya mayakajangka junkupayi. Maya palukajangaya mirrka majuwinti nyinapayi.

Ngulampa kalyu pakirringu, ka mirrkalurrju pakirringu. Martu yarnngaluya yanu nyangu maaja Piiru. Japirnuluya mirrkaku. Piirulu-janampa wajarnu, “Yankuranyurra Juujappa japilku.” Juujapju-jananya wajarnu, “Manirninyurra yungku mirrkaku ngaakajaku, mankurangkunyurra.” Mani-jananyaya mankupayi kangkurayilaraya maaja Piiru yungkupayi. Yarrara-jananyaya Juujapmapulu muu mirrkakajanga jalamunkupayi. Juujapku warrkamupurlukalu-jananyaya ngurra kujupangka ngurra kujupangka kangkuraya-jananya mirrka jalamunkupayi, parna Yijipiwana. Karlkiluyilaya parna tiwajanuluya kulirnu, Yijipiwanaluya mirrka jalamunkunyjanpa. Kulirnuyilaya yankupayi mirrkaku.