7
Augwaligo te Solomongo genuai be sę yali
Te Solomon aga obo tomode genuai bego digi sę yani, tama te sę ebo bidi dabego te be silabo sę idubadi te kibu be 13 te be dabe sę ebo sę yai dao. Te Solomongo sę bidi dabego te genuai be me deli sę yani, aga nogi te tama tiwai, te Lebanon Genuai Ni Sili Be da wai. Te bego bobage usu te 44 mita, te aga genuai usu te 22 mita, te ugwadu usu sali te 13 me hap mita usu yali. Te be tomode te ni pos te Lebanonde sali ni bǫ genuai tigi te ni hani wasilali, te me si me si tama elaluai. Augwaligo te be bobage usu nama wali peyu, te bǫ ni bobage selama, tama te pos dabe daide ugwadu te bego pedu ene sabali ni dabe muani. Tama te bego genuai usu nama wali pali te augwaligo te be pedu ene sabali ni hani sela te pos dabe ugwadu daide nani wasilai. Tama augwaligo te Lebanonde sali ni bǫ selama, te be pedu haluali. 4-5 Tama te be paiali daga e badu me u badu pedai badu te windo hani sela elaluali. Augwaligo te windo dabe dolo si bugagia wasilaligo tama te deli deli windogo te gasa pedai badu elalubo windo te dolo si ponai elaluai. Te bego sunumigo ebo sę te me si me si naga elaluai.
Tama augwaligo genuai be me deli sęnama, te nogi te tiwai polali, Te Genuai Pos Dabego Be da wali. Te bego bobage usu te 22 mita, tama te bego aga genuai usu te 13 me hap mita yai. Te bego mabo veranda me tama te veranda mabo dąų elalubo pos me elaluai.
Tama augwaligo te Sia King Be, ma te Po Tų Odobo Be, me sę yani. Te Solomongo te we bidigo po tų odabo be tama sę yani. Augwaligo te bǫ ni nami dabe selama, tama te be paiali daga dabe haluali, te aiyadu plua saide gagalasa, te be peduba usu nigi holalio. Augwaligo te Solomongo be digi sę yani, te gasa obo banis tomo badu te Po Tų Odobo Be tudi badu elaluali. Augwaligo te gasa be dabe sę yani tiwai gilama naga sę yani. Tama augwaligo te Solomongo wego be me te tiwai sę yani, te Isip king bidigo wegi dao. * 1 Kin 3:1
Augwaligo te be tigidali sę yainu te gasa sawi sawi yai sagala masigi dabe naga selama, te be sę yani, te aiyadu sabo suiyame saide gagalasa, te be peduba usu nigulali, tama te bidi dabe me deliba sisinabo pesage me te obo nigilama, bagulali. Augwa te usu selama, tama te masigi dabe togwali, tama augwa te so selama, tama te me badu pedai te bugagia dodolali. 10 Tama augwaligo te sawi sawi yai masigi dabego te moni moni bage todogo pedama, te nani wasilama, tama te daide te be ugwadu sę yainugo tiali. Te masigi mebago genuai usu te 3 me hap mita usu, te meba te 4 me hap mita dao. 11 Augwaligo te genuai moni masigi dabe nani wasila silama da, teda augwaligo te bugagia dodolali te gasa sawi yai masigi me, te bǫ tigi dabe me selama, tama augwa te be dabe sę yai dao. 12 Tama augwaligo te kompaun tigidali bagulubo obo me deli nigali. Te obo augwa te tiwai nigali. Augwa te togolama bugagia dodolai masigi hani sela te muani. Tama augwaligo te masigi dabe daide te ni bǫ hani ni tigi deli te daide muna muna pali. Augwaligo te tiwai naga ela pidubadi, te obo bagulubo sę siligi pabo siba usu nani. Augwaligo te obo nigali deli poai kolesaga elama, augwa te bidi deliba sisinibo obo bagubo sę yali, te Genuai Bidigo tempel be gesabidi badu elaluai, tama te tiwai te be habu te Genuai Bidigo tempel be gesabidi nigai elaluali.
Huram aselama, te king Solomongo sę yagasai
13-14 Te Tair hanude bidi me deli bidali, aga nogi te Huram. Te bidi aga te brasgo te nai dabe nigibo sę te mu koneai bidi mu dao. Te bidi Huramgo aya aga te Tair hanu bidi, tama agai me te brasgo te nai doado bage nigibo te mu koneai bidi me deli, tiali goli te aga isali. Te Huram aga ida te Naptali hani we me deli dao. Solomongo te Huramba po ola tolobaso, tama aga aselama, tama te tigidali nai te brasgo nigila silali, te Solomongo agabolo wali po tiwai gilama te tiwai yalio.
Huramgo te brasgo bobage pos si nigali
(2 Sto 3:15-17)
15 Te Huramgo te genuai bobage pos si te brasgo nigali. Agai te pos si te deli tobage tigi poai si tama nigali. Te pos sigo bobage usu te 8 mita, tama te pos sigo tigi genuai usu te 5 mita me 30 sentimita dao. 16 Tama agai te pos sigo tobolu me te brasgo nigai, te augwali si te bobage pos dabe daiba ugwadu muainu tialio. Te pos tobolu dabe aiyadu ugwaba gagalasa nedali usu, te 2 mita me 20 sentimita dao. 17 Tama agai te brasgo sen dabe nigilama, tama te wego nigibo wa tiwai kęnama, te pos si tobolu dagede walali, te pos si au iliyu tama tialio. Te deli deli posde te tobage au ilali te a naga nogo me si elaluali. 18 Tama agai te bras selama, tama te ni wai pomigranet piksa hauwa nigilama, tama agai te pomigranet piksa dabe te wa tiwai sen dabede walama, te pos si bagulama elaluali. Deli deli posde te au yabo pomigranet hani si elalua palio. 19 Te deli deli pos tobolude te gasa sawi yai plaua me deli te dinigalubo tiwai tonobo ąǫ yalio, tama te plauago bobage usu te 1 mita me 80 sentimita elaluai. 20 Te pos dabe tobolu te bagua sai tama Huramgo te nai dabe te wa tiwai te dwasianu ugwanu gana te bagua salide kęnama walali. Tama te daide ugwadu, agai te pomigranet piksa te hani si walali. Te deli deli posde te 200 pomigranet elalua pali. 21 Huramgo te pos dabede sę yali silibaso, tama te pos si augwaligo te Genuai Bidigo tempel be sunumi pąde te ugwaba dodolama muani. Te saut badu elaluali sunumi pedai badu dodolama muani pos, te nogi augwa te Jakin nogi yali, * Te Hibru pogo te Jakin nogi page te pąde te tiwai po wali, “Godigo pedalumainu ilali.” tama te not pedai badu muani gasa pos, te nogi augwa te Boas nogi yai dao. Te Hibru pogo te Boas nogi page te pąde te tiwai po wai, “Te Godigo bomode dao.” 22 Te pos si tobolude te nai te augwaligo gasa sawi yai plaua nigai te dinigaluali. Tama te pos dabede yali sę tigidali silai.
Huramgo te brasgo te genuai tank ąį nigai
(2 Sto 4:2-5)
23 Te Huramgo te genuai tank ąį deli te brasgo nigali. Te tank ugwadu daide usu sali, te 2 mita me 20 sentimita, tama te dedage usu sali, te 4 mita me 40 sentimita, tama aga tigi genuai yali, te 13 me hap teba usu nigi pai. 24 Te tank sese tobolu badu te agai te bobigo piksa hani si nigilama, te tank tobolu sese tigidali bagulali, tama te tigidali mita dąį tomode te nogo si piksa elaluali. Tiali goli, agai te piksa dabe nigilama, te tankde kęnebeo. Menio. Agai te tank nigali sogo, agai te piksa dabe dali nigai, tama augwali te tankde elalubo tiwai yai dao.
25 Huramgo te omai bulmakau te nogo si olama, sągągo si te brasgo nigali, tama augwaligo te nigali bulmakau tudi daide te tank ąį muani. Te bulmakau dabe tudi badu te tank ąį dologode elaluali, tama augwaligo gesabidigo te tigidali pedaiba tonalua pai. Te bulmakau selago te giliga pedaluboba tonalu, te me selago te giliga dega sabo pedai badu elalu, te me sela te not pedai badu elalu, te me sela te saut pedai badu elalu yalio. 26 Te brasgo dąį igi pali, te tank bulu badu gagalasa pali te tank tomoba usu nani, te usu sali te 8 sentimita yali. Te tank sesege badu te kap pedauwali tiwai elama, tama te gasa sawi yai plaua dinigalubo tiwai yali. Te tankde wę elaluabo usu te 40,000 lita wę elalueibao.
Huramgo te wilkar dabe te brasgo nigai
27 Huramgo nogo si wilkar te brasgo nigali, te daide ugwadu te dwasianu tank wę dabe muainu yali. Te wilkar me si me si pedai bogo badu te deli tigi tobage dąį elaluali, te 1 mita me 80 sentimita usu nama, tama augwali te daide ugwadu, te 1 mita 30 sentimita usu nama elaluai. 28-29 Agai te wilkar dabe te tiwai nigali. Hasia bolo agai te wilkar dabego dili nigilama, tama nosali agai te bras dabego te laion piksa dabe elalubo nigali, me te omai bulmakau, me ensel, te piksa dabe nigali. Agai te bras pedai dabe selama, tama te wilkar me si me si elalubo te dili dabe kęani. Tiali goli, agai te dili dabe tigidali mu me halubeo. Te wilkar dabego dili te bagua si dodo bolo pai au tiwai dabe elalualio, tama te dodo bolo pali te dologode elalubo te laion me bulmakau dabego piksade te tiwai elaluali. Tama te deli tigi poai dodo bolo pali te piksa dabede ugwadu elalualio. 30 Te deli deli wilkar dabede te me si me si wil bras, me te ba bras dabego te wil dabe dąų olama tolaluali. Te habu sugą sali me si me si ugwadu te tigidali wilkarde te bras me si me si elaluai, te tank ąį tolalubo tiwai elama, tama te pos dabede te baguasi madi au dodo bolo pai elaluai dao. 31 Te ring tiwai baguasi bras me deli elaluali, tama te pos me si me si dabego te deli ring naga dąų olama tolaluali. Tama te wę tank te ring daide ugwadu munaluali. Te wilkar dagede digi gagalasa pali, te ring sabi badu usu nigi pali te 45 sentimita. Tiali goli, te wilkar ugwadu dagede gagalasa pali, tama te ring dage ugwadu teba usu nigi pali, te 67 sentimita yai. Te ringde te windo piksa dabe elalu, te ring tigidali bagua selama, tama te haniani piksa dabe te windo dabe tomode elaluai dao. 32 Te wilkar dabego genuai wil te 67 sentimita elaluai. Tama te wil tolaluali te bras ba dabe, te Huramgo nigilama, te wilkarde me kęnebeo. Menio. Te wilkar aga tiwai tigi poaigo digi nigali. Te wil dabe te laiongo piksa dabe dologode elaluali. 33 Te wil dabe te hwįbo karis dabego wil tiwai si yali. Tiali goli, Huramgo te wil tigidali te brasgo nigali, te wil dabe tolaluabo ba dabe, tama te wil dili spok dabe tolalubo nai dabe, tama te spok dabego digi, tama te wil sesegede baguasi elaluali.
34-35 Tama te ring dabe dali, te tank wę dualabo pos dabe me, te Huramgo nigilama, tama te wilkar daide ugwadu me kęnebeo. Menio. Agai te wilkar dolo si tiwai pedaigo nigali. Te ring dabe ugwadu usu sali, te 22 sentimita usu si yai dao. 36 Huramgo te ensel dabego piksa noma, me laion, me te ni det te ni pos dabego togolama nigali, tama te nai dabe tomode te ringde windo elalubo tiwai elaluali. Mena badu te piksa asęabo elalubaso da, teda agai te piksa dabe tede asęani. Tama agai te piksa dabe baguluyu, te dodo bolo pai te au ilibo nai hauwa asęani. 37 Huramgo te nogo si wilkar nigali, te deli tigi poai si naga nigilama, tama te tigidali wilkarde nigilali nai te mak te deli tigi poai naga pedelai dao.
38 Huramgo te nogo si tank wę nigilama, te deli deli wilkarde muainu yali. Te tigidali tank węgo genuai usu selama nigali usu te 1 mita me 80 sentimita tama. Tama augwa te tank wę deli delide te wę elaluabo te 800 lita wę te tama usu nigai dao. * Sai 30:17-21 39 Huramgo te nai dabe nigila silama da, teda agai te a naga wilkar te Genuai Bidigo tempel be mesalode muyu, te saut pedai obo pąde muani, tama te gasa a naga wilkar te not pedai obo pąde te badu muani. Tama agai te genuai tank wę te be sabi badu pąde te saut badu pedai badu muani.
Te Huramgo te Genuai Bidigo tempel be sę eyu, te sę yali tigidali nai dabe po te tiwai
(2 Sto 4:11-18)
40 Huramgo te wę pauabo moni dis pou me, te dwasianu savol dabe me, te gasa dis pou dabe me nigalio. Tialima, megi da, Huramgo te king Solomongo agabolo te mani sę, te Genuai Bidigo tempel be sę yali, te sę tigidali silalio. 41 Te Huramgo nigali nai dabe te e tama dao. Te genuai bobage brasgo nigai pos si, tama te pos dabego baguasi tobolu si me, tama te pos dabe tobolu au ilibo te wa tiwai nai dabe me nigali.
42 Tama agai te 400 pomigranet piksa nigilama, te pos si tobolude bagulali te wa dabede kęnainu yali. Te deli deli posde te pomigranet hani te tobolude elalua pai. 43 Tama agai te nogo si wilkar, me te nogo si tank wę te wilkarba muabo nai dabe nigali, 44 tama te genuai tank wę me deli me, tama te omai bulmakau nogo si olama, sągągo si nigali, te bulmakau dabe daide te genuai tank wę muani. 45 Tama agai te sospen sene dabe, me te dwasianu savol dabe, me te dis dabe, tama nai nigali. Huramgo te Solomongo po wali pelama, tama te Genuai Bidigo tempel bede te tigidali nai nigila silali. Agai te nai dabe nigila silama da, tama agai augwali te dwagi yai brasgo bugagia mu nigai dao. 46 King Solomongo te Hurambolo po weyu, te nai dabe te Jordan wę odogo bulu, te hanu Sukot me te hanu Saretan si tomode nigao po wali. Tede te tobage sę yabo wiegi yai mama yai tǫ elaluai. 47 Te tigidali nai Huramgo te brasgo nigai, augwali te hauwa umabo mu tama dao. Tama tibaso, Solomongo te bidi dabe augwaliba po weyu, te brasgo sęgę dabe osola suabo po me wabe. Tama tiyu, te nai dabego sęgę te bidigo me konebeo.
Te Genuai Bidigo tempel bede muabo nai dabe augwa te nai dabe te golgo nigali
(2 Sto 4:19–5:1)
48 Solomongo te sę bidi dabebolo weyu, te Genuai Bidigo bede muabo doado bage dabe nigao po wali. Tialima, augwa te gol selama, tama te alta, me tebol te Godigo gedude maiabo nai bret muabo nai dabe nigali. * Sai 25:23-30; 30:1-3 49 Tama augwa te wiegi yai gol selama, tama te nogo si lam tolaluabo nai nigali, te Tedali Gasagi Yai Be Habu daga pąde dodolabo nai nigai. Te a naga te dolo nogo daga pąde dolaluyu, te me a naga te pobase nogo badu elalubo be daga pąde dolaluali. Tama augwaligo te gol selama, tama te plaua piksa noma dabe me, te lam, te sisis tiwai nai te sia tolalubo nai, te tama nai dabe te golgo nigai dao. * Sai 25:31-40 50 Tama augwa te wiegi yai gol selama, te ofa ebo kaneme muabo pou dis dabe, me gasa dis dabe me nigali, tama te lam sula sabo nai me, tama te denami ebo pauda ulabo plet me, te sia tolasa bilabo plet me nigali. Tama augwa te gol selama, tama te Tedali Gasagi Yai Mu Be Habu paliabo sunumi te hinsis dabe nigali, tama te tempel bego moni be habu sunumi hinsis me nigai dao.
51 Te king Solomon dali, te sę bidi dabe daligo te Genuai Bidigo tempel be sę yali tigidali silama da, teda Solomongo te tigidali silva, me gol, me te dis nai dabe te aga aya Devitgo nai dabe selama, te Genuai Bidiba dąį ilali nai dabe, tama augwa te doado bage tigidali te Genuai Bidigo be tomode elaluali bakstua be habu tomoba muanio. * 2 Sml 8:11; 1 Sto 18:11

*7:8: 1 Kin 3:1

*7:21: Te Hibru pogo te Jakin nogi page te pąde te tiwai po wali, “Godigo pedalumainu ilali.”

7:21: Te Hibru pogo te Boas nogi page te pąde te tiwai po wai, “Te Godigo bomode dao.”

*7:38: Sai 30:17-21

*7:48: Sai 25:23-30; 30:1-3

*7:49: Sai 25:31-40

*7:51: 2 Sml 8:11; 1 Sto 18:11