Te Israel me Juda Hani Sigo Tuni Bidigo Po Elalubo Buku Si
Hasia Nedebo Po
Te buku 2 Kingo te nosali pedelabo sę dabede po te buku I Kingo pusali po tiwai agai me pusalio. Hasia te buku si te buku deli naga elaluali. Te 2 King bukude te tǫ kantri si Israel king dabede po pusali, te kantri Juda, te saut badu elalu, te tǫ kantri Israel te not badu elalu yalio. Agai te sę dabe pedelama ela pidubadi, te tǫ kantri si te boi bidi dabego nogode dolali po agai pusali sogoba usu nigi palio. Te not badu bidali bidi hani dabe augwali bolo te hasia te bidi hani Asiria dabego nogode dolali, tama te saut badu bidali bidi hani dabe augwali nosali dolali, te bulu tǫ kantri Babilon king Nebukatnesar nogode dene menama, dolai dao.
E buku da, te 1 King tiwai si, tama agai te kingo dabego yali kolesaga dagalali po pusali. Augwali te God dologode bidaliwe, ma meniwe? Te e bukude ola mani genuai sę da, e tiwai dao. Te sę te Israel hani siba pedelama, tama augwali te boi bidi nogode dolali, te sę yabo page te augwade dali, te augwa king dabede dali elalualio. Te Israel king dabe me, Juda king dabe me, te augwa hani we bidi dabego dali, augwaligo te God dali hagoma mu eyu, te hauwa sogo augwaligo te bomo yai po me, agai gasa po dali, te sela sąwani. Tama tialigo te augwali genuai sęgę gegai dao.
Te we bidi dabe augwaligo homugo te tama homu elaluali, Jerusalem dali te Godigo be dali elalubaso, te genuai nai mu ola mabo tiwai, te God augwali dali bidibao homu yalio. Tama tibaso, te dwai dene mabo nai me deli augwaliba me pedalugobe da homu elaluali. Tiali goli, e bukude te Jerusalem dolama, te boi bidi dabego te Godigo be aluama, besala sąwani po pusali. Te tama tiali sęgo te Israel we bidi dabe augwaligo homu kolesaga mu dolalio. Te tama tiali sędę, tama nosali augwaligo hauwa bilibo kolesaga, me lotu wabo kolesaga me, augwali te gasagi yai tedali hasegelai dao.
Elaija dali te Elisa sabi name side po elalubo buku
1
(Dąį 1:1–8:15)
Elaijago te king Ahasia isabo po wai
1 Tama te nosali te Israel bidigo king bidi Ahap isali, te Moap bage augwaligo homugo te Israel bagego da tonalugobeo homu yai. Tama tibaso, augwaligo te Israel bage augwali sela sąyani. 2 Me sogo deli te Israel bidigo king bidi te Ahasia aga bede te ugwa badu habu badu bidibadi yaide, tama te be kąų togasa dulunama, tama aga te tǫba tulaluama, tama aga te nogo sągą me, te tigide me genuai mu tama selali. Tama tibaso, agai te me badu po sela pabo bidi dabe te Filistia bulu te moni hanu te Ekronba tagala palali, te augwaligo te Ekron hanude bidibo bidi dabego te augwa tibo god Balsebup hanalugi pao olama, tama te aga ma usu yaibawe, ma meniwe, olama hanalu wai.
3 Tiali goli, te Genuai Bidigo po sela pabo ensel bidigo te profet bidi Elaija te Tisbe taun hanude bidibadi e tiwai po wali, “Tama nage pelama, te Samaria king bidigo te taun Ekronba tagala palali bidi dabe nago augwali tiąba pelama, tama nago augwalibolo e tiwai po tama wao, ‘Magi baso te dagego homugo Ekron augwaligo tibo god Balsebup hanalugi sobawe?’ wao,” wali. “ ‘Tialima, Israel bidi dabeo, dage dali God bidibewe?’ wao,” wali, “ ‘tibaso dage sobawe?’ wao,” wali. 4 “ ‘Awe, odao, Genuai Bidi Godigo te e po te king bidi Ahasiabolo waliąo,’ ” wali, “ ‘nage ma usu egobeo. Mu menio. Nage tama pila muna muna pedubadi genama, tama isibo bodoluba usu nigi paibao,’ tama po wao,” wali. Elaijago te po odama, tama aga hodaluama peyu, te bidi dabebolo te po wagi pai.
5 Te bidi dabe augwaligo te Elaijago wabo po odama, te bage augwali te king pageba ma geasa pelama, tama te kingo augwalibolo e tiwai po hanalu wali, “Magi baso te dage polo ma begasa asaliwe?”
6 Tama augwaligo te kingo wali po wei ponoyu, te e tiwai po wali, “Bidi me deligo te da te tųba tiąba aselama, tama agai dabolo te po wai, ‘Dage me geasa pelama, te Genuai Bidigo po te king bidibolo wagi pao,’ obaso da, ma geai dao,” wali. “Te po e tiwai dao, ‘Magi baso nago te bidi dabe augwali tagala palama, te augwali pelama, te Balsebup hanalugi pa waiwe, te Ekron bidi augwaligo tibo godiba? God Mu Israel bidi dage dali meni baso, nago tama tiwai da, agawe? Mu tamao, nage munu ma gesa solama, ma usu egobeo. Mu menio. Nage tama pila muna muna pedubadi kęnama, te nage isibo bodoluba sabaligi paibao,’ agai dabolo te po wao wali,” augwaligo te king bidibolo te po wali.
7 Kingo te po odama, tama agai augwalibolo e tiwai po hanalu wali, “Te bidigo dagebolo te po ola mani, aga mena tiwai bidi dawe?”
8 Tama augwaligo te po wei begelu e tiwai po wali, “Te bidi aga te hasa nisigo nigai bulubo ugwa bulai bidi dao,” wali, “tama aga te hasa usugaligo nigai kukulu gudai bidi dao,” wali. * Mat 3:4; Mak 1:6
Kingo odama, tama agai te po wai, “Te bidi aga te Godigo po pusubo profet bidi Elaija da,” wali. 9 Awe, tama te kingo te ami tobolu bidi me deli dali, te bidi sese si olama, nogo si, 50 ami bidi dabe dali, tagala palama, tama augwali pelama, te Elaija odasa asomainu tagala palai. Augwali pelama, te Elaija aga bidibo buluba sabolali, tama te ami tobolu bidi keptengo Elaija te bulu dude dugulalubo suali. Tama te keptengo te Elaijabolo e tiwai po tama wai, “Nage Godigo po pusa mabo bidi da, kingo nage asao wali. Nage eba dulama, tama te king aga sugi pao,” wali.
10 Tialima, Elaijago e tiwai po wei ponani, “Tialima, mu tama, ena Godigo po pusa mabo bidi da wida,” Elaijago te po wali, “teda eno homugo te dagalude elalubo isi tagala palama, te nage dali, te naga te 50 ami bidi dali, isigo domainao,” wali. Tama te po wabo si, te dagalude elalubo isi polo tulaluama, tama te ami tobolu bidi kepten bidi dali, te aga te 50 ami bidi dali, isigo dela pelama, tama augwali isila pali.
11 Nosali te kingo gasa me ami kepten bidi dali, te bidi sese si selama, te nogo si, 50 ami bidi dali, te Elaija pageba ma tagala palali. Tama augwali Elaija pageba sabolama, tama kepten bidigo te Elaijabolo e tiwai po wai, “Nage Godigo po pusubo bidi da, kingo te po walio, nage polo dulama, tama nago aga suagasao po wali,” te po wai.
12 Tama Elaijago agabolo te po wei ponoyu, te po wai, “Tialima, mu tama dao, ena te Godigo po pusa mabo bidi da wida, teda eno homugo te dagalude elalubo isi polo tulaluama, tama te nage dali, te naga 50 ami bidi dali, isigo domainao,” wali. Tama te po wabo si yaide, te Godigo isi polo tagala palama, tama te kepten bidi dali, te 50 ami bidi dali, tama te augwali isigo dali, tama augwali isigo dela pelama, isali. * Luk 9:54
13 Tialima, kingo gasa kepten me dali, te 50 ami bidi dali, te Elaija pageba ma tagala palali. Tiali goli, te sela wagi siyu pali kepten, te bidi agai te e tiwai kolesaga yai, aga te Elaija bidibo bulu duba holama, tama aga te Elaija bidibo pąba sabolama, tama te kepten agai te kidu sugunama, Elaija agabolo e tiwai po olama wai, “Godigo po pusa mabo bidio.” Keptengo agai te bomai po weyu, e tiwai po wali, “Nago ena dali, te eno ami bidi dali, te nago ena dali te bugai homu pemene yao,” wai. “Tama nago da doligio,” wali. 14 “Eno koneanio, te dagalude elalubo isi tulaluama, te kepten si dali, te bidi sese a naga, 100 ami bidi dali, te augwali isigo dai dao.” Keptengo bomai po weyu, te po wai, “Eno homugo nago ena dali, te eno 50 ami bidi dali homu dene eyu, tama da doligio,” wali.
15 Keptengo po ola silali, tialima te Genuai Bidigo ensel bidigo te Elaijabolo e tiwai po tama ola mawai, “Nage dulama, te kepten bidi dali pao,” wali. “Nage aga sulama, wi egio.” Awe, Elaija hodaluama, tama aga kepten bidi dali te king pageba pai. 16 Elaija sabaligi pelama, kingbolo te po wai, “Genuai Bidigo e tiwai po tama wai. ‘Nago homugo God Israel bidi dabe dali bidibewe?’ wai, ‘tama tibaso, nago me badu bidi tagala palama, te Balsebup hanalugi pao waliwe, te Ekron dabego tibo god dao. Tama tibaso, nage munu ma usu egobeo. Mu menio. Nage tama pila muna muna pedubadi kęnama, tama nage isigi paibao,’ wali.” Elaijago kingbolo te po ola mawai.
17 Tama te nosali Ahasia isali, tama te po Elaijago pedauwalidu te Genuai Bidigo po pusali te sogo mu usu nani. Ahasia aga ogwa meni. Tama tibaso, aga ama Joramgo aga ama Ahasiago yali sę selama, te king bidiyu, Israel bidi dabe tonaluyu bidali. Te Joram king nigilama bidibadi, te kibu be si pai, te Jehoramgo, te Jehoram te Jehosafatgo ogwa, tama aga Juda bulu tǫde aga king bidi nigilama, Juda dabe tonaluyu bidai. 18 E po dabe te king Ahasiago te tigidali te gasa sę yali po, te po gasa buku elalubo, augwaligo te nogi wai, te Israel Bidi Dabe Augwaligo Kingo Yali Sę Po Elalubo Buku dao wali.