1 Me sogo deli te profet bidigo we me deli te Elisa pageba asai. Te we aga bidi isai, tama te we aga olo bidibo wilawe we dao. Awe, agai te Elisabolo e tiwai po tama wai, “Genuai bidi, eno bidi isai dao,” wali. “Naga koneani, aga Genuai Bidi dologode bidada pai dao. Tialima, agai bidi me delide negeli sai, tama megi eno te negeli sali nai wei begelabo mone menio. Tama tialima, te bidi aselama, te eno wai ogwa si selama, tama te ogwa sigo te bidi aga te olo sę ela mabo bidi nigimainu ebo,” wali, “magu meni, te bidigo te negeli mone begelu, te ogwa sigo te bidi aga olo sę ela momainu homu yai,” te wego te po wali.

2 Elisago te po odama, tama agai te webolo e tiwai po tama ola mani, “Tama eno nage mena tama tau saibawe? Nago magi nai nago bede munalubowe?” wali.

Tama te wego po wei ponoyu, e tiwai po tama wai, “Eno te oliv wel munalubo dwasianu sospen genage deli dao,” wali, “eno bede te gasa nai me menio. Te deli tama dao,” wali.

3 Tama te Elisa agai te we agabolo e tiwai po agabolo ola mawai, “Nage pelama, te naga abagi dabebolo hanalugi pelama, te augwaligo te nai bula tubo mouwa dage kenage sospen, nage me osogo momainao,” wali. “Tama augwaligo te olo me munalubo mouwa dage kenage augwaligo nage me mobaso da, tama nago umabo mouwa dage kenage sao. 4 Tama nago te mouwa dage kenage osogo selama, tama te naga be tomoba selasa pelama, tama te tų paliao,” wali. “Tama te nage dali, te naga wai dali si tama bidiyu, tama naga te mouwa dage kenagede munalubo wel te gasa mouwa dage kenageba te wel gelao,” wali. “Te sogo nago te mouwa kenage me deliba gelama te pągąna muai, awe, tama nago te gasa habuba me deli muao,” wai. “Nago te tama naga tidi pedubadi kęnama, tama naga te sali tigidali mouwa dage kenageba te wel gelama, te tigidali mouwa dage kenageba te pągąnoboba usu nigi pao,” wali.

5 Te wego te po odama silibo si, tama aga pelama, te aga abagi dedego mouwa dage kenage sospen dabe sigi pai, tama aga beba selasa pali. Tama aga dali, te aga ogwa dabe dali, te aga be tomoba bula selama, tama aga te be tų paliali. Tama te aga ogwa si augwaligo te mouwa dage kenage selama, te augwa idabolo magi pabo sę yali. Tama te augwa idago te mouwa dage kenage te wel gelebo sę yali. 6 Te wego te tigidali mouwa dabe kenage te welgo pągąna silali, tama te agai te aga ogwa me delibolo te e tiwai po tama wai, “Te gasa mouwa dage kenage me sela magasao,” wali.

Tama te ogwago te po wai, “Idao, te tigidali mouwa dage kenage welgo pągąna silalio,” wali. Awe, tama te sogo dolo mu, wel te wego te mouwa dage kenageba wel munu ma pedalobeo. Menio. Te wel asobo silalio. 7 Awe, tama te wego te profet Elisabolo e tiwai po tama wagi pali, “Eno te tigidali mouwa dage kenage sospen welgo pągąna silalio,” wali.

Tama Elisago agabolo e tiwai po tama wali, “Tama nago te wel selama, te we bidibolo dobolama, mone sao. Tama naga bidigo te negeli sali mone naga te welde sali monego wei begelao. Tiali goli, me badu mone te nagade munaluaibao. Tama te monego te nage dali, te naga ogwa si dali bidiyu, tama naga nai abelama tuagameo,” wali.

8 Me sogo deli Elisa te Sunem hanu taunba pai. Te hanude we me deli bidibo, tama agai te mone me, te haniani doado bage me, umabo mu munalubo we da. Tama te wego te Elisa hanalu wali, “Nage asama, eno beba nai tuagasao,” olama, hanalu wai. Tama tibaso, tigidali sogo Elisa te Sunem hanuba te we bidibo madigi peduali, tama agai te we pageba pelama, te agai bede nai tugi peduai. 9 Me sogo deli te wego aga bidibolo e tiwai po tama wali, “Eno konea palio, te bidi da dali me sogo me sogo asama, nai tuagasobo bidi, aga te dwagi yai bidi mu da, tama aga te Godigo sę ebo profet bidi mu dao,” wali. 10 “Tama teyu, eno homugo dago bede te aga piagasabo madigi te be habu badu me deli nigilama, dąį palinao,” wali, “te dago e be pedu badu nigilinao. Tama dago te be habude te piabo bet me, te tama ni name me, te tebol sai me, te lam sole me, me te dugabo ni name me, te nai dabe tigidali te dago aga pibo habu badu te nai dabe dago muguo. Tama te bidi aga asobo sogo, awe, te aga te habude bidimainao.” Awe, tialima, augwaligo te bidi piagasabo habu me deli nigibo sę yali.

11 Me sogo deli Elisa te Sunem hanu buluba ma geasa asama, tama aga te be peduba ugwaba holama, tama aga pibo habu badu te aga bet saide piali, te dwasianu toma tuyu piai. 12 Tama aga te toma tuyu, tama aga bidiyu, te Gehasibolo te po wai, aga sę bidi, e tiwai dao, “Tama nage aba dulama, te a we sugi pao, te agai eno piabo be habu nigali. Tama aga asao po wao.” Awe, Gehasigo tama tiali. Tama te we ugwaba holama, tama aga te be pibo pesage habu bulu badu dolaluali. 13 Tama Elisago Gehasibolo te po wai, “Nage pelama, te webolo e tiwai po tama hanalugi pao, ‘Nago homugo da tau siyu, te sę yali, te magi naigo nage homu pemene ilagawe, te nago da tau siyu, te moni sę dene yali magi naigo begelagawe? Nago homugo te Elisa pelama, te king sugi pomainu homu ebawe? Ma, te ami tonalubo tobolu ofisa bidi me deli tama augwali hanalugi pelama, tama augwaligo dwagi yai nai me deli nage momainuwe?’ ” Awe, tialima Gehasi pelama, te webolo hanalugi pali, tama te wego te po wei ponoyu, e tiwai po tama wali, “Ena te ena hani dali augwali tomode ena bugagia bidibo dao,” te po wali, “tama eno magi nai me deli godolo ebeo,” wali.

14 Gehasi aselama, Elisabolo te po wagasali, tama Elisago agabolo e tiwai po tama hanalu wali, “Tiali goli, te we aga da dali te dwagi yai kolesaga ebo te magi naigo wei begelaibawe?”

Tama Gehasigo te po wai, “Te we agai wai menio, tama aga bidi monu dabe mu yalio.”

15 Awe, tama te Elisago te Gehasibolo te po wai, “Te webolo olama, eba asao,” wali. Tama te Gehasi pelama, te webolo wagi pobaso, tama te we aselama, te be tųba dolagasali. 16 Tama Elisago te webolo e tiwai po tama wali, “Te nosali kibu bede, megi te polua mude, te nago ogwa me deli ame naibao, tama nago naga nogo tuaibao,” wali.

Tiali goli, te wego te po wei e tiwai po tama ponani, “Mu tama o, genuai bidio, nage Godigo po pusubo bidi dao. Nago enabolo ili po ola magio,” wali.

17 Tiali goli nosali, te we haliga yali. Tama nosali kibu bede, te polua dolo mu, te wego aga wai ogwa ame nani, te Elisago wali po tiwai gilama yali. 18 Tama te wai dwasianu genuai yali, tama nosali me badu kibu bede te waigo aga aya te gide bilibo sugi pai. Te bodolu te wit togobo sogo da, tama teyu, te aga aya te aga sę ebo bidi dabe dali te gide bidibadi. 19 Te waigo augwali sę eyu bidibadi, te augwali tonono bilali, polo tama agai aga ayabolo i weyu, e tiwai wali, “E, aya, eno tobolude dene dwai mu ebo. Dene me elalubo.” Tibaso, aga ayago te aga sę bidi me delibolo wali, “E wai aga ida pageba auwasa pao,” wali. 20 Tama aga te sę ebo bidigo te wai auwasa peyu, aga ida pageba tagaligi pali. Tama te wai aga ida sągą pagede godege pila mudubadi, te giliga dolo dolagasu, te belo waboba usu nigi pai, tama te wai aga isali. 21 Awe, tama aga idago te wai tola selama, te Elisa pibo be, te augwa be pedude, te habuba tolasa holama, te bet saiba mugiluama, tama aga ida buluba teda solama, tama tų paliali. 22 Tama aga bidi i olama asobode, tama aga bidibolo e tiwai po tama wali, “Eno homugo nage pelama, te naga sę ebo bidi me delibolo olama, te kibu donki me deli odasa, ena pageba asao,” wali. “Magi baso, eno homugo ena polo pelama, tama te profet bidi sugi paio, tama ena ma polo asaibao,” wali.

23 Tama aga bidigo te po wai, “Magi baso nago homugo nage megi tama polo paiwe? Nago homugo te Sabat bodolude sabolagasobo tonalubo meniwe, ma te gesi polua genuai bodolude pedalubo tonalubo meni da, agawe?”

Tama wego te po wali, “Tagalao, ena homugo dao. Nage dua bidao,” wego te po wali. 24 Te sę ebo bidigo te kibu donki tudide te dugabo sai yai te somo gagawai nai muani, tama we te kibu donkide duga yali. Awe, tama te wego te sę ebo bidibolo e tiwai po tama wali, “Dadi si pabo sogo, nago te kibu donki polo pomainu osalao. Tialima, eno homugo donki kibu dua pomainu da, teda eno nagebolo waibao,” tama po wali. 25 Tama te we te donki kibude dugulama, tama aga dali, te sę ebo bidi dali, te augwali te Karmel bulu duba pali, te profet Elisa sugi pai. *Te Karmel bulu du digibulu, te 40 kilomita usu te Karmel bulu du te digibulu, te Sunem taun dali pąde meni. Augwali si digibulu asobadi yaide, tama te Elisago augwali si asobo suai. Tama Elisago Gehasibolo te po wai, aga sę ebo bidibolo, e tiwai po tama wali, “Suao, te Sunem hanude bidibo we te asobao,” wali. 26 “Nage aga pageba udalama, sugi pao, aga dali te aga bidi me aga wai me bugagia bidibowe, ma meniwe?” Awe, Gehasigo te webolo hanalugi pali, tama te wego e tiwai po wei ponani, “Da bugagia bidibao,” wali.

27 Tiali goli, te we te bulu duba te Elisa bidibo madigi asama, sabalobo sogode, agai te basi gulama, tama te Elisago sągą tuali. Gehasigo te wego tama tibo sulama, tama agai homugo te we dwasianu digibulu ganama pao olama, dega palali. Tiali goli, Elisago Gehasibolo e tiwai po tama wali, “Tegio, sula tagalao,” wali, “eno koneanio, aga genuai sęgę mu ebaso ebao. Tiali goli, Genuai Bidigo agai te sęgę ebo po enabolo wabeo,” wali.

28 Tama wego e tiwai po wali, “Genuai bidi, e da naga po dao, tama tiali goli Godigo ena te wai mawai dao. Eno nagebolo hanalubeo. Tiali goli, eno nagebolo te po wai, ‘Nago ena ili po ola magio,’ te po eno nagebolo hasia wai dao.”

29 Elisago te wego wabo po odama silibo si, tama Elisago aga sę ebo bidi Gehasibolo e tiwai po tama ola mani, “Naga gudubo name ugwa dąų olama, guda selama, tama te eno tolasa bilibo dono selama, tama nage te Sunem hanuba polo pao. Tialima, tomode bidi me deli nago me subaso da, teda nago siade da po olama, nago dolalubo sesabi egio. Tialima, bidi me deligo nage dali siade da po obaso da, teda nago agai te po wei ponogio, taga pao. Nage te wego beba dolo mu pelama, tama eno tolasa bilibo dono te wai gesabidide ugwa badu te eno dono muao,” po wali.

30 Tialima te wai aga idago tama suali ma, Elisa aga dali pabo homu meni baso, tama agai Elisabolo e tiwai po tama wali, “Genuai Bidi te bidada peyu, bidada pabo dao. Te mu po naga dao. Tama te tiwai gilama, eno mu po tama obao, eno nage taga pogobeo.” Tama tialima, Elisa hodama, te we dali te Sunem hanuba pali.

31 Te Gehasi polasa pelama, tama te Elisago tolasa bilibo dono te wai gesabidi badu mugi pali, tiali goli magi nai me deli pedalobeo, mu menio. Tama tibaso, Gehasi ma begasa pali. Tama agai te augwali tųde sisinani sogo, agai te Elisabolo e tiwai po tama wai, “Eno te nago te po wali gilama yali, tiali goli te wai hodalobeo,” wali.

32 Awe, tama augwali te beba sabalobode, tama Elisa aga pibo be habu badu tųde doligi pelama, tama subadi yaide, tama te isali wai agai pibo be habu badu te agai betde munalubo suali. 33 Awe, aga te pibo be habuba tula pelama, tama tų paliali, tama aga gedu halua selama, po Genuai Bidibolo wali. 34 Tama aga te bet saiba hola solama, tama aga te wai tigi munalubo madigi aga kidu sugunama, aga tobolu te wai tigiba ugwadu daiba basi gulai, tama Elisa agai e tama tiali, agai pedauwali me, te gedu me, te nogo me, tama te waigo nogo me, pedauwali me, te gedu dabe dali ugwa badu sebedi usubo ąǫ elama, ususu si yai. Elisa agai tama tibode te wai tigi posolo dwasianu yali. 35 Tama tialima, Elisa te bet saide bidali tagalama, te be tomo habude dwasianu tama bilali. Tama aga ma pelama, te wai bau boalu kidu sugunani. Tama tibo si, te waigo asiga weyu, te nogo a olama, me badu nogo si wagi solama sogo asiga wali, tama te waigo gedu me pedali.

36 Tama Elisago te aga sę ebo bidi Gehasi i olama, tama agabolo e tiwai po tama wali, “Nage pelama, e wai aga ida asao po wagi pao,” wali. Awe, tama Gehasigo te po odama pai, tama te wego te be peduba ugwa holama, tama te Elisa pibo be habuba tula pali, tama Elisago te webolo e tiwai po tama wai, “Tama nago e wai sela pao,” wali. 37 Awe, tama te wego kidu sugunama, tama aga tobolu te Elisago sągą page pąde te tǫba te wego tobolu tǫba ponani, tama te Elisabolo genuai nogi mawainu te sę yai, tama nosali aga hodaluama, tama aga wai selasa pai.

38 Israel bulude te dwai bodolu sogo me deli pedalali. Tama te we bidi dabe augwaligo tuabo nai mu menia sali. Tama te sogo Elisa aga te Gilgal hanuba tama ma geasa pelama, bidigi pai. Me sogo bodolude deli sogo, me badu profet bidi dabe augwali te Elisa pageba asama, agade skul olama, kolesaga sali. Tama augwali dugulama, tama te Elisago po odoyu bidali. Tama Elisago aga sę ebo bidibolo e tiwai po wai, “Genuai mouwa dage kenage sospen selama, tama te profet bage tuabo nai dali, te keba me, te sup ulao,” wali. 39 Tama profet bidi me deli pelama, te sup dwanai dali ulabo keba gegegi pai. Tialima, te agai te bulu bobi sulama, agai homugo te dwagi yai tubo bobi da, homu yali. Tama tialima, agai te bulu wel bobi umabo mu sali, tama aga name ugwaba togolama muani madigi, te aga name ugwa mu pągąwai. Tama agai te beba sela asama, tama agai te hwą ge selama, te totogolama, tama te keba sup nai dali ulai. 40 Te dwanai sup yali nai dali, awe, tama augwaligo te pouba muna muna pali, te profet bidi dabe augwa tumainu. Tiali goli, augwaligo te tubode, te augwaligo pedauwalide sup dwanai ha yali, tama augwaligo Elisabolo i e tiwai tama wali, “Nage Godigo profet bidi dao, te sup dwanai ha dwai mu ebo. Dago tugobeo, da isidalio,” wali. Tama tibaso, augwaligo homugo te nai tugobeo homu yai.

41 Awe, tama Elisago te po wali, “Te wit siago nigali te o gagawai plaua selasa asao,” wai. Augwaligo selasa pelama, tama Elisago agai te mouwa dage kenageba sąyani, tama te aga sę ebo bidibolo e tiwai po tama wali, “Tama te sup dwanai augwaligo pouba ma muao, tama te profet bagego tumainao.” Tama augwaligo tuali, tama te sup dwanai te augwaligo pedauwalide megi ma ha ebe.

42 Nosali me sogo deli, bidi me deli te aga Balsalisa bulu tagalama, tama te Elisa pageba asali. Te sogo te sia gagawai wit togobo sogo, tama nedu bali du gide tau ebo sogo. Tama te hasia sogo augwaligo te nai bali du togwali, augwaligo te dwasianu bret skon nigainu. Tama tibo bodolu sogo, te bidi Elisa pageba asali, te bidi agai te me badu te sia gagawai wit selasa asai, tama te augwaligo te togwali sia gagawai nai witgo nigai bret agai te bidi sese deli tama selama, tama aga begba bulama, sela asai. Tama Elisago te aga sę ebo bidibolo e tiwai po tama wali, “Te nai te profet bidi dabe mao,” wali.

43 Tiali goli, aga sę ebo bidigo e tiwai po tama wali, “Tialima, e nai dwasianu mu dao,” wai. “Magi elama te e dwasianu naigo te bidi sese a naga, 100 bidi mena tama usu yaibawe?”

Awe, tama Elisago agai po wei ponoyu, e tama po wai, “Po menio, te nai augwali mao,” wali. “Magi basowe, Genuai Bidigo e tiwai po tama wai dao, ‘Tigidaligo te nai tuao, tama te nai me badu me munaluaibao,’ ” wali. 44 Tama te sę bidigo te agai profet bage augwali te nai mawai, tama augwaligo te nai tuali. Tama augwaligo tulama, tabi mu pągąna pali, tama me badu me munaluali, Genuai Bidigo wali poba usu nigi pali.