9
Genuai Bidigo Israel dabe po tų ilaibao
Eno suali, Genuai Bidi te aga be pąde elalubo alta pąde dolalubo suali. Te agai te tiwai po wali, “Te eno be bobobage pos dabe tobolude elao, te be mabo tigidali badu memenege yaibao. Te pos dabe gaga nigilama, te be tomode elalubo we bidi tobolu ugwadu daiba degasa dulama, te augwali ela mumainao. Te isisąwani hani bidi dabe yai baso da, teda eno te boi bidi dabe tagala palama, ela muagasomainu yaibao. Te me deli wi pelama, bugagia bidainu yabo usu me egobeo. Mu menio. Te bidi meba enade wi pelayu, te isai bidi dabego pesagede te tǫ dedage aiyaba dogobaso, te tagalao, te augwali eno pageabi yaibao. Te augwali dagaluba ugwa holainu ebaso, me tagalao, te augwali eno aiyaba kekasa dulaibao. Te augwali pelama, te Karmel bulu duba geme duala sigi pobaso da, teda eno augwali gegelama, te pageabi yaibao. Te augwali tamu wę page dologoba mu geme duala sigi pobaso da, teda eno te tamu ąįde bidibo dobo dwai hasamani kauwabidibolo walama, te augwali ela tueibao. Te boi bidi dabego augwali kalabus igi painu gasa tǫ kantriba sela pobaso da, teda eno te boi bidi dabeba walama, te augwali ela mumainu yaibao. Eno augwali mu silabo homu ebao. Eno augwali tau me sogobeo,” Genuai Bidigo te po wali.
Genuai Bidigo bomogo te we bidi dabe augwaliba dwai dene mayu, te tigidali sę yaibao
(Amo 1:2; 4:13; 5:8-9)
God, Tigidali Bomo Elalubo Genuai Bidigo,
agai nogogo te tǫ diąnubaso,
te tǫ memenege yaibao.
Tama tigidali tǫde bidalubo we bidi,
augwali te haliga sęgę elama, gela waibao.
Tigidali pedai badu tǫ te ugwaba samanu
posogą palama, te ma degasa dulaibao,
te wę asobogo te wę Nail ge bo delama,
te nosali ma keka sabo tiwai yaibao.
Genuai Bidigo aga togobili te dagalude nigilama,
tama agai dagalu te tǫ ugwadu muani,
te bagua sai be pedu nigai tiwai yalio.
Agai te tamu ąį i ola aselama,
tama agai te tǫ daiba ugwadu gelebo dao.
God deligo naga te sę dabe ebo dao,
tama agai nogi da te tiwai elalubao,
Genuai Bidi dao.
Godigo tigidali hani we bidi tonalubao
Tialima, Genuai Bidigo te tiwai po wali, “Dage Israel dabe, te Itiopia dabe me eno bugagia tonalubao, te eno dage tonalubo tiwai ebao. Awe, me eno te Filistia dabe te bulu Kritde selama, te augwali odasa asali, tama eno te Siria dabe me te tǫ kantri Kirde sela asai, te eno augwali odasa asali, te dage eno Isipde selama, odasa asali tiwai gilama yalio. Ena God, Genuai Bidigo, eno dage Israel we bidi dabego kolesaga bugagia subo sę idubao, magi baso meni, te dwai sęgę dagede mu pągąnalubao. Tama tialima, te eno dage dolama, te dage mu silaibao. Tiali goli, eno te Jekopgo hani me badu naga bidimainu sula tagalaibao. Eno augwali tigidali mu me dologobeo,” wali.
“Te eno pogo naga weyu, eno te Israel dabe augwali dagalaibao, te bidi dabego te wit ge bo hogomu te waia saide munama, dagalama, hogomu sela sąbo tiwai yaibao. Te Israel dabe bidi dwai dabe te gasa tǫ kantri tomoba tulalu, te wit dwali hogomu sela sąbo tiwai yaibao. 10 Te dwai bidi dabego megi te tama po obao, ‘Te Godigo magi nai me deligo da dolomainu me iligobeo.’ Tiali goli, nosali eno te boi bidi dabego augwali ela mumainogo ilaibao,” Genuai Bidigo te po wai dao.
Godigo te Israel tǫ kantri wiegi yai ma pedalumainu ilaibao
11 Genuai Bidigo te tama po wai, “Nosali te me sogo si pedalubaso, teda eno te Devitgo hanide king me deli hodolaibao. Megi da, te hanigo tǫ kantri te be me deli degasa pelama, dolai tiwai elalubao. Tialima, nosali eno te be ma sęnama da, teda eno te be daga dabe me dodola silama, te be polobadu elaluali tiwai ma pedelaibao. 12 Tama tilama, tama te Israel dabego boi hwįnama, te Idom tǫ kantri pedai badu elaluali tǫ tigidali ma sobadi, tama augwaligo te gasa tǫ kantri te eno augwaligo somainu dąį ilali kantri tǫ me ma sesa paibao.” Te Genuai Bidigo po dao, tama agai te aga wali po tiwai gilama yaibao. * Tpi 15:16-18
13 Genuai Bidigo te Israel we bidi dali te tiwai po wali, “Me sogo deli pedalubo si da, teda te gide bulali nai dabe polo holama, te hauwa mu walaibao, te bidi dabego tigidali sela silabo usu egobeo. Te wain ni dabe polo mu holama, te nai umabo walaibao, tama te wain wę nigibo bidi dabego te silabo sę ebo usu egobeo. Tama te we bidi augwa pusu yai wain hauwa elalu, te bulu dude wę pągąnama, te aiyaba gealubo tiwai mu yaibao. 14 Eno te ena we bidi dabe augwa page bulu muba ma odasa paibao. Tama augwa te dolali taun dabe ma geselama, nigilama, tama augwa tede ma bidalueibao. Tama augwa te wain gi ma bulama, te tuabo wain ąį ma nigaibao. Tama augwa te gi nai dabe bulama, te gi dabede nai sela tueibao. 15 Te bidigo aga gide nai bulubo tiwai eyu, eno ena we bidi dabe te eno augwaliba mani tǫde bugagia tegaluama, dugulalumainu sula tagalaibao, te mena bidi deligo augwali ma ela gudulabo usu me egobeo.” God, dagego Genuai Bidi, agai te tiwai po wai dao.

*9:12: Tpi 15:16-18