1 Te King Nebukatnesargo po te tigidali bulu tǫ pedai we bidi dabeba me, te tigidali haniba me, te tigidali haniani po wabo bidi haniba te po ola tolali. Agai po te tiwai, “Dage tigidali bugagia bidaluiąo,” walio. 2 “Megi ena dwagi yai homu eyu, tama eno dageba te Ugwadu Mu Bidibo Godigo enaba ola mani bomo yai sę dali, te bidi noma sabo genuai sę dabede po obao,” wali.

4 “Ena Nebukatnesar, eno te tigidali nai sulama, tama eno sę dabe sese te wiegi yai pedalubaso, tama ena wiegi yai pemene elama, te ena bede bidai dao. 5 Tiali goli, me sogo deli sogo hulide eno na elama, tama ena wi dwai mu yalio. Ena te eno bet saide pila mubadi, tama te eno homude suali nai dabe augwaligo ena wi dwai mu ilalio. 6 Tama tibaso, eno te tigidali Babilonde te po page koneai bidi dabe asiąo olama, enabolo te na yali page pusagasiąo po wali. 7 Tama te tobage po page koneai bidi dabe dali, te pobi wabo bage dali, te tama bidi dabe tigidali asalio. Eno augwaliba te na yali po walali, tiali goli augwaligo te na yali po page pusabo usu meni yai dao. 8 Nosali Daniel asai. Eno agaba te nogi Beltesasar polama mawai, te nogi te eno god nogi dao. Te bomai god dabego te homu kolesaga Danielba mawai baso, tama tialima, eno na yali po te agabolo walio. Eno agaba te tama po wai, 9 ‘Beltesasar, te kolesaga koneai bidi dabego tobolu bidio, eno koneani, te bomai god dabego nageba te homu kolesaga menama, tama te magi nai me deli nagede geme dualalubeo. Tialima, eno na yali po megi odama, tama nago te nade yali po page pusao,’ wali.”

10 “Eno agabolo te po wali, ‘Ena piali sogo, eno na te tiwai yali. Eno suali, te tigidali bulu tǫ tomode te bobobage ni me deli dolalubo suali. 11 Te genuai pedelama, tama te ni bobage holali tobolu te dagaluba usu nu giluainu yali, te tigidali bulu tǫ pedai bidi tigidaligo sumainu ebo tiwai yai. 12 Te nigo te wiegi yai yabe elalu, tama te nai hauwa walali, tama te tigidali bidigo, me hasa sibigo te tuabo usu elaluai. Te bulu uni hasa sibi dabe aselama, te ni dologoba toma tuagasu yagasai, tama te ba dabego aga nologode be nigali, tama te tobage tigidali nai sibigo te aga du tuagasalio. 13 Eno te na yali homu kone paludubadi, tama eno suali, te mobo bidi ensel me deli te dagaludu dulubo suai, te mobo bidi ensel dabede te nai dabe tonalubo ensel me deli dao. 14 Agai i bomonama weyu, te tiwai po wali, “Te ni degemainu, te gelao,” wali. “Tama te aga nologo dabe togwao, tama te yabe dabe selama, subigila tedela palao,” wai. “Te ni dologode bidibo kibu hasa sibi dabe sela sąyu, te ni nologode dugulalubo ba sibi dabe te sela sąyao. 15 Tiali goli, te aga page da, te nosai elalubo tǫ tomode elalumainu yao, tama te genuai ring ain me bras te me deli selama, tama te aga pageba muao. Te hulide tulubage segeni ebo te aga daiba tulalumainu elama, tama aga te kibu hasa dabego te tuabo nosai gegebo tiwai emainao. 16 Agai te bidi dabego homu kolesaga ebo tiwai ma egobeo, tiali goli aga homu kolesaga te kibu hasa sibi dabego homu kolesaga tiwai elalua pidubadi, te kibu be 7 bidaibao,” wali. 17 “Te nai dabe tonalubo mobo bidi ensel dabe, augwaligo te nai dabe pedalumainao po obaso, te tigidali bidigo konemainu yali, te Ugwadu Bidibo God Mugo te tigidali we bidi tonalubo dao. Te agai homugo digi te bidi dabe king pedalumainu sa mubo da, te genuai nogi elalubo bidi me, te olo bidi tama me, te tagalao, te agai digi sa mubo dao.” Te ensel mobo bidigo te po wai,’ eno te po Danielba wali. 18 Tama eno Danielba te tiwai po ma wali, ‘Eno nageba te eno na yali po wai dao. Megi da, Beltesasar, nago enabolo eno te na yali po page pusao, magi baso meni, te eno po page koneai bidi me deligo enabolo te po wainu ebaso, te usu ebeo. Nage naga usu da, magi baso meni, te bomai god dabego te nageba homu kolesaga mawai dao,’ eno Danielbolo te po wali,” Nebukatnesargo te po wai dao.

19 Danielgo te na page koneai, tama agai te homu si eyu, tama te kingba pusabo wiegi yai homu pemene isąwani. Tama aga te po polo wei ponebeo. Tiali goli, kingo agaba te po wai, “Beltesasar, tama nago homugo te na elalumaina homu elama, tama te na yali pagede nago haliga sęgę emainu egio,” wali. Tialima, Beltesasargo te po wai, “King o, eno homude te nade yali sę nageba pedalubo te eno hagela homu yai. Eno homugo te nago boi bidi dabe augwaliba naga pedalumainu homu yai dao. 20 Nago te genuai ni me deli suali. Te aga tobolu te dagaluba mu usu nu gulali, tama tǫde bidi tigidaligo suali. 21 Te agai yabe te wiegi yai dabe naga elaluai, tama te nigo du wai te hauwa elaluali, te tigidali bidigo me hasa dabego te tuabo usu elaluai. Te bulu uni hasa dabe te ni dologoba toma nagasali, tama te ba dabego te aga te ni nologoba be sęnama bidai dao. 22 King o, te ni da, te nage tama dao. Nago genuai nogi mu te we bidi tigidaligo gedude elalubao, tama nago bomogo te tigidali bulu tǫ habu usu nama tonalubo dao,” wali.

23 “Tama nago suali, te nai dabe tonalubo ensel mobo bidi me deli te dagaludu dulama, te po wali, ‘Te ni gelama, dolao,’ wali, ‘tiali goli, te tǫde page te nosai dabe elalubo page tomode elalumainu sula tagalao. Tama te genuai ring ain me bras deli selama, tama te aga pageba muao,’ wali. ‘Te hulide tulubage segeni ebo te aga daiba ugwadu tuluyu, tama kibu hasa dabe dali te kibu be 7 tama bidimainu ilao,’ te ensel mobo bidigo nagebolo te po wali.”

24 “King, te na yali page te tiwai. Te Ugwadu Bidibo God Mugo te nageba pedelabo naide po wali dao. 25 Nago te we bidi dabe bidibo pesage tagalama, tama nage pelama, te uni hasa dabe dali bidigi paibao. Nage te kibu bulmakau dabego nosai dabe tubo tiwai eyu, tama nage bulude piaibao, tama te hulide tulubage segeni tulubo te nageba idubadi, te kibu be 7, teba usu nigi paibao. Nage te tiwai bididubadi, te nago te tiwai te Ugwadu Mu Bidibo Godigo te tigidali we bidi tonalubo homu konebo teba usu nigi pabo teba usu naibao. Te aga homugo digi, agai te bidi dabe te king pedalumainu ebo dao. 26 Nago odali, te enselgo te ni page te tǫde elalumainao wali. Te wali po page te tiwai. Te God deligo naga te tigidali tǫde nai tonalubo da, te tama tiwai bugagia konebo sogo da, teda nage te king ma pedalaibao. 27 Tama eno homugo te megi eno nagebolo wabo po tiwai yao. Nago te sęgę munu ma sigio,” wai. “Nago te doloba pai kolesaga naga yao, tama nago te olo tau sabo wiegi yai homu te magi nai sǫą pabo we bidi dabeba yao. Dago konebeo, te nago te tama tibaso da, teda nage te bugagia bidiyu, tama nago ebo sę tigidali te wiegi yai naga pedalaibao, te nago nade suali sę nageba asogobeo,” Danielgo king bidibolo te po wai.

28 Tama nosali, te tigidali wali sę te king Nebukatnesarba te Danielgo wali tiwai gilama pedelai dao. 29 Te polua nogo si olama, sągągo si, te 12 polua silibo si da, tialima te me sogo deli sogo te king aga te be mabo nigalidu te Babilon bede te daide bidali. 30 Tama agai te tama po wali, “Iya, Babilon te genuai taun mu, tama te polalubo mu da. Te ena king bidi ede bidimainu eyu, te eno bomogo digi, eno te taun hodolali, te eno genuai bomo me genuai nogi te tigidali hani we bidiba ola mani dao,” kingo te po wai.

31 Agai te po odubadi, tama agai po me deli te dagaludu asobo odali. Te po e tiwai wali, “King Nebukatnesar, nago eno po odao. Te nago te haniani bulu tonalubo genuai bomo, megi tama te eno nago nogode sela sąwaibao. 32 Tama te augwaligo nage sela sąnama, tama nage te we bidi dabe dali munu ma bidigobeo. Te nage bulu uni hasa dabe dali naga bidaibao. Nago te kibu bulmakau dabego nai tubo tiwai ela bilidubadi, te kibu be a naga olama, me nogo badu si yaibao. Te nage te tiwai bididubadi, ‘Te Ugwadu Mu Bidibo Godigo te tigidali we bidi tonalubo da,’ te tiwai homu konebo sogo usu naibao. ‘Te God aga homugo digi, agai te bidi dabe te king pedalumainu ebo dao,’ nago te homu yaibao.” King bidigo te po wabo odali.

33 Tama polo mu te sę dabe te king Nebukatnesarba te enselgo wali po tiwai gilama pedelali. Augwaligo aga te we bidi dabe tomodu sela sąnama, tama aga te kibu bulmakau dabe tiwai gilama te nosai tuduai dao. Te hulide tulubage segeni ebo te aga tigi daiba tulali. Tama aga tobolu nisi te ba aiwai nisi bobage ebo tiwai pedelali, tama aga nogo dani bobage te bago dani bobage tiwai pedelalio.

34 “Te kibu be a naga me si wali silibo sogo da, ena Nebukatnesar, eno te dagaluba ugwa tonaluama, tama eno homu kolesaga te wiegi yai ma pedelai. Tama eno wiegi yai homu pemene te Ugwadu Bidibo Godiba mu yalio. Te sesemane bidada pidu bidibo God, tama eno aga nogi ugwaba mu siyu, kekene nanio. Tama eno te tama po wai,

36 “Eno te po wali sogo da, teda polo tama te eno homu wiegi yai ma pedelama, tama eno te ena genuai nogi ma sali, tama te polobadu eno te tonaluali bulu tǫ kantri tonaluabo bomo ma sai. Te enaba wiegi yai homu kolesaga mabo bidi dabe, me te ena genuai bidi dabe, augwali te ena dali ma bidagasalio. Tama ena te king ma bidiyu, tama ena nogi genuai mu elaluali, te eno polobadu elaluali te genuai nogi aiyaba elaluai dao. 37 Megi da, ena Nebukatnesar, eno wiegi yai homu pemene te dagalude kingba eyu, tama eno aga nogi ugwaba siyu, tama agaba genuai nogi mawai. Tigidali sę agai ebo te wiegi yai pedelama, tama doloba pai naga yali, tama agai te bidi dabego augwa nogi augwa digi ugwaba sainu ebo bidi dabe te aiyaba elalubo dao,” king Nebukatnesargo te po wali.