10
1 Te bolia dabe te wiegi yai denami ebo wel
elalubo botol tomoba pelama,
te augwali isibaso da, teda te wel tomode dwai
kugumini yaibao.
Te tiwai naga, te bidi me deligo
te wabo pabo homu kolesaga dwasianu ebaso da,
agai te aga wiegi yai homu kolesaga dolama,
tama aga digi genuai nogi dolaibao.
2 Te wiegi yai homu kolesaga elalubo bidi
agai wiegi yai kolesaga ebo dao.
Tialima, te wiegi yai kolesaga elalusiąbo bidi,
agai te dolo isąwai kolesaga ebo dao.
3 Te bidi te sunumidu naga bilali goli tagalao,
agai kolesaga te tiwai
gasa bidi dabeba ola mani,
aga wiegi yai homu kolesaga elalusiąbo bidi dao.
4 Te naga tobolu bidigo nageba wado po obaso da,
teda nago naga sę me tagalamuo.
Te nago sali sęgę genuai elalubadi digi, tagalao,
te nage bugagia dua digi bidibaso da,
teda agai nago sali sęgę te tagalaibao.
5 Eno suali, genuai sęgę me deli
te bidi dabe mebago yali,
te sę yabo page te tobolu bidide
naga elalubao. E tiwai dao.
6 Te tobolu bidi dabego te genuai sę
te wiegi yai homu kolesaga
elalusiąbo bidi dabeba mawai,
tama te mone hauwa elalubo bidi dabego sę sali,
te wiegi yai sę me sabeo.
7 Tama me eno suali, te olo sę ebo bidi dabe
te hos kibu daide ugadu dugulasa pabo suali,
tiali goli te genuai bidi dabe te sągągo pali,
te olo sę ebo bidi dabe pabo tiwai yali.
8 Te bidi mego genuai tǫ dedage dogobaso da,
teda aga digi te dedageba tulalueibao.
Ma, te bidigo te masigigo bagulali obo alubaso da,
teda te hasamanigo aga gąų kelaibao.* Tib 7:15; Prs 26:27
9 Ma, bidigo te be sę yabo masigi togobo sę ebaso da,
teda me sogo te masigi dabego aga tigi selaibao.
Te ni pedebo sę ebo bidi,
me sogo te nigo aga dolaibao.
10 Te bidigo puna pai sigi hwą agai
dulusiąwai yaibaso da, teda agai
te ni gelebo sinabo sę dene mu yaibao.
Me ma, te wiegi yai kolesaga elalubo bidigo da,
te agai te ni gelebo sę wiegi yai yaibao.
11 Te bidi mego te hasamani
dua digi bidimainu ebo kolesaga
elalubo bidi yaibaso, te wiegi yai da.
Tialima, te hasamanigo aga gąų kelemainu ilibo bidi
yaibaso da,
teda aga te koneani kolesagago aga
magi elama tau saibawe?
12 Te wiegi yai homu kolesaga elalubo bidigo
aga wabo pogo digi te agaba
genuai nogi mawaibao.
Tialima, te wiegi yai homu kolesaga elalusiąbo bidi
te aga pogo digi aga dolaibao.
13 Te tobage bidigo po gagalama wabo sogo,
agai wabo po geda mueibao.
Te agai po silainu ebo sogo, te po dwai mu pedelali,
te kolesaga umuna sai bidi mugo wabo po tiwai yaibao.
14 Te wiegi yai homu kolesaga elalusiąbo bidigo po
oda pidu gebo dao.
Te magi sę nosali pedelabo dago konebeo.
Te da isai madigi, magi sę e tǫde pedelabo dago
konebe dao.
15 Te wiegi yai homu kolesaga mu elalusiąbo bidigo
agai te aga beba pabo sunumi gegebaso,
usu meni yaibao,
te tobage bidigo odolali sę dene eyu,
te aga bomo sia sabo dao.
16 Hobede yao! Te tǫ kantri pedai king me deli
te ogomani homu tiwai elalubadi,
tama te kantrigo polalubo bidi dabego
te kigamu digi hodolama,
te nai da naga tueinogo ebaso da,
teda genuai sęgę te tǫ pedai kantriba pedelali.
17 Me ma, te gasa tǫ pedai kantri king
me deli te genuai bidigo ogwa yaibaso,
tama te tǫ kantri polalubo
bidi dabego te genuai nai da tuyu,
te ąį tuyu yali te sogo,
te tigi naga dąų walobo sę naga eyu,
te gęǫ page isąbaso da,
teda te tǫ kantri bugagia mu bidai dao.
18 Te bidigo aga sę ebo hagela eyu da,
te aga be walawala ni dabe gaga paibao.
Awe, aga olo naga bidibaso da,
teda te be pedu tologa pelama,
te tulubage be tomoba pelama, te be dolobo dao.
19 Naigo te bidi pemene ilibo sę ebao,
te wain ąįgo te bidi bugai haliga ilibo dao.
Tiali goli, mone da, te wiegi yai nai te tobage sę
tigidali ebo dao.
20 Te naga pibo be habu badu
geme dualalu pila muani,
te tagalao, nago te dwai posobo po te kingbolo
ma te mone elalubo bidibolo me olamuo.
Tama me, nago augwaliba dwai homu me igio.
Tiyu, te ba me deligo nago te wabo po selama,
te augwaliba wagi pidali weyu.