12
1 Godigo da tigidali nigali.
Tibaso, dage gesi ogwa bidi
bidibadi digi dagego aga homu kone palao.
Tiyu, dagego aga homu kone gegeda paligio,
tama nosali dage monu dabe pedalubo side
te dwai sęgęgo dage gegebaso,
te dage deli deligo te tiwai po waibao,
“Eno ena bidabo ulade wiegi yai
homu pemene ebeo,” po waidali weyu.
2 Te sogo dagego gedu dwai elalubaso,
dagego te tiwai homu yaibao,
giliga, me polua, me te hǫ dabe,
te bugagia ula isiąyu, tama te haowa tulubage
sesemane sogo elalubao po waibao.
3 Te sogo dagego nogo bomo
munu ma isiąma, te midigi saibao.
Te dagego sągą bomo menisąma, gagea paibao.
Te dagego kele me deli deli naga elalueibao,
tama dagego te dila pai nai me tugobeo.
Te dagego gedude me dwai elama,
te dagego nai dabe bugagia
tonono bilibo usu egobe dao.
4 Tama dagego olo te palia selama,
tama te be bulu badu kilikili wabo odisiąyu,
te masigigo wit pęgębo tiwai eyu,
tama te musik haniani u wabo tiwai yali.
Tialima, te dage godege piai digi yaibaso da,
teda te ba po wabogo naga dage hodolaibao.
5 Te bulu dabe daide ugwadu dage bidalu,
tama dage te sunumidu bilabo wi yaibao.
Dagego tobolu nisi te tedela yai pedelama,
tama dage te sunumidu bilibo sę dene yaibao.
Tama te nai dabego dage haliga
hogodolabo sę me iligobeo.
Te dage isilama, tama duga sesemane sogo bidada peyu,
bidada pabo buluba bidigi paibao.
Te duga taunde bidibo we bidi dabego,
te augwaligo gela weyu,
hobede ebo balia po waibao.
6 Dage isisąbadi, dagego Godiba homu kone paliąo.
Dage isibo sogo, te wiegi yai lam sole ula sia sabo
tiwai yaibao,
te silvago nigai sen toga peyu,
ma te golgo nigai pou dis alua pabo tiwai yaibao.
Tama te ulu ąį dedagede ugaba kekebo
dwasianu nai winis toga peyu,
tama te ąį tuali tǫgo nigali sospen
tulaluama, alua pabo tiwai ebo dao.
7 Tama dagego tigi te tǫ ma pedelaibao,
tama Godigo dagebolo te mani
homu ogwa wai mobo bidi, te God agaba ma paibao.
8 Kolesaga mu koneani bidigo te tama po walio,
“Tigidali nai te olo nai tiwai naga elalu,
tama aga page mu meni yai elalubao,” wali.
E bukugo silagasu wabo po
9 E buku asęani bidigo koneani kolesaga wiegi yai mu elalubaso, tama agai te we bidi dabe augwali ola manio. Agai te tobage wiegi yai po dabe me begelama pusubo po bugagia dagalama wali, tama agai homugo te po dabe mu po da homu ebaso da, teda agai te po dabe e buku asęai dao. 10 Agai te bidi dabego ologo odolama, pusu yabo po dabe gegebo sę dene elama, tama agai te mu po dabe naga bugagia gegelama, asęai dao. 11 Te kolesaga mu konea pali bidi dabego po te poa pali dono dabe tiwai elalueibao, te sipsip kibu dabe gasaba bogeasa soyu ebaso, ela palu, ela soabo dono te sipsip tonalubo bidi dabego sabilaibao. Te kolesaga konea pali bidigo te buku me delide wiegi yai po elalubo subaso da, teda te po sesabi elama, sesemane sogo elalueibao, te nili dabe te ni namede dąų elalubo tiwai yaibao. God, da tigidali tonalubo bidigo, te po dabe dabolo mawai dao.
12 Eno waio, eno po me deli mu ma nagebolo wabo homu ebao. Te buku asębo bidi dabego te buku hauwa mu asębo dao, tama te tobage sę silabo me elalubeo. Te nago te buku sesemane sogo nedebo sę ebaso da, teda nago tigi hagela yaibao. Tibaso, nage te kolesaga ebode dua dao.
13 Te tigidali po siminagasu, eno te tiwai po obao,
te da bidigo bidibo ulade polalubo sę
te tiwai elalubao.
Dago God naga dologode bidiyu,
tama agai bomai po dabe wali pao.
14 Godigo dago ebo kolesaga tigidalide da po tų ilaibao,
te wiegi yai kolesaga dabe me,
dwai kolesaga dabe me, te geme dualama
ebo kolesaga dabede me, da po tų ilaibao.