18
Jetro aselama, Moses suagasai
Jetro aga te Midian dabego pris bidi, tama Mosesgo wąį, aga we aga aya. Tama agai Godigo tigidali sę Moses dali, me te Israel dabe dali me yali po odai. Tama me agai te Genuai Bidigo aga we bidi Israel dabe te Isipde bidibadi dobolama, odasa soainogo yali kolesaga, te po me odai. 2-3 Tama Jetro aselama, Moses suagasai. Polobadu Mosesgo we Sipora te aga aya pageba ma osogo tagala palai. Tama megi da, Jetrogo te Moses we Sipora dali, aga ogwa si badi, augwali odasa aselama, aga bidibo digi pedelai. Te wai sigo nogi e tiwai, Gersom, me Elieser. Polobadu Mosesgo te po wai dao, “Ena gasa badu bidi, tama ena gasa tǫde bidibao.” Tama agai gomunai ogwa nogi e tiwai nogi yai, Gersom dao. * Te Hibru pogo te wai nogi Gersom wabo dogoni te “Gasa tǫde bidibo,” po wabo dogoni tiwai si pąde dao. * Sai 2:21-22; Tpi 7:29 Tama nosali agai te po wai, “Eno ayago God agai ena tau selama, tama Isip tuni bidigo ena ela mubeo.” Tama tiyu, agai tomo ogwa nogi Elieser po wai. Te Hibru pogo te wai nogi Elieser te page elalubao, te “Eno God aga ena tau sabo bidi dao.”
Tama Jetro te Mosesgo we dali, te aga ogwa si me, augwali aselama, te masigi kemi bulu te Godigo bulu du pąba sabolali, te Mosesgo pesage nigilama bidibo digi dao. Tama Jetrogo po Mosesbolo ola toloyu, te po wai, “Ena Jetro, te naga wąį dali, te naga we me, te naga ogwa si me, da asobao.”
Tama Mosesgo te po odama, tama agai Jetro tiąba tųdu pai. Tama Mosesgo mage basi gulama, tama nosali agai aga sebedi usai. Tama augwa si bidabo po dabe olama, tama nosali augwali Mosesgo ugwa be tomoba pai. Tama Mosesgo Jetro dali te Genuai Bidigo Isip tuni bidi dali yali sę po tigidali wali, me te Isip we bidi dabe dali me, te Israel dabe tau selama tiai. Tama agai Jetro dali me te dwai sogo te sęgę te tųde augwaliba pedelali po wali, tama Genuai Bidigo augwali tau selama bugagia bidai.
Tama Jetrogo te wiegi yai sę Genuai Bidigo te Israel dabe augwali te Isip dabego nogode ma sainogo yali po odolama, tama aga wiegi yai homu mu yai. 10 Tama agai te po wai, “Genuai Bidi Yawego nogi ugwaba sao. Agai dage te tuni bidigo nogode me, te Isip we bidi dabe augwaligo nogode me, te dage ma sai. Agai aga we bidi dage tau selama, tama dage te dwai kalabus sęde bidali tagalai dao. 11 Tama megi eno koneani, Genuai Bidigo te gasa god dabe tigidali aiyaba elaluali, magi basowe, te Isip dabe augwaligo hagoma homu eyu, tama augwaligo dwai sę dagebolo yai baso, tama Genuai Bidi agai dage augwaligo nogode ma dobola sali.” Te po wai. 12 Tama Jetrogo ofa yabo nai me deli sela asali, te siaba tigidali ulama, tama Godibolo mawai. Tama agai meba gasa ofa me te Godibolo yai. Tama Aron dali, te tigidali Israel genuai bidi dabe me aselama, tama Moses aga wąį dali te Godigo gedude nai tuai.
Augwaligo po dodolobo bidi meba sa muani
(Bom 1:9-18)
13 Te nai tula silama, tama te sogo nosali Moses dualama, te Israel we bidi augwaligo po tų odai. Tama we bidi hauwa Moses bidibo digi kigamu aselama, tama bidada pidubadi, pio mu igi pai. 14 Jetrogo Mosesgo te sę dabe eyu, te we bidi dabe augwali tau sabo sulama, tama agai Mosesbolo te tiwai po wai, “Tegoba. Nago te we bidi tau sabo sę hauwa mu ebao. Magi baso nagaduba deligo naga nago te po tų odobo sę dabe ebo dawe? Suao, tigidali we bidi kigamu nage dali po wainogo asali, tama augwali dolayu, tonalubadi, be pio ebao. Magi baso nago tama tibawe?” wali.
15 Tama Mosesgo agabolo te po wai, “Te we bidi dabe augwaligo te mena sę te Godigo augwaligo emainogo ebo sę te koneainogo tiwai. Tama tiyu, augwali ena bidibo digi asobo dao. 16 Tama me sogo bidi me aga si magi nai me delide wado ebo sogo, te bidi si ena bidiboba aselama, tama eno augwali sigo po dagalama, tama te po isilaibao. Tama augwaligo wado ebo page tede eno augwalibolo te Godigo bomai po ola mabo dao,” wali.
17 Tama Jetrogo agabolo te po wai, “Moses, nago te sę ebo te wiegi yai tų wali pabeo. 18 Te sę genuai mu dao. Nagaduba deligo naga ebo usugobeo. Nago naga te sę eyu da, teda nago tigi hagela mu eyu, tama te we bidi augwali me hagela yaibao. 19 Eno po megi odao. Eno wiegi yai tų me deli te nago sę yabo po nagebolo eno te po waibao. Nago te po odoyu da, te God nage dali bidaibao. Tama nage te we bidi augwaligo polalubo bidi te Godigo gedude te augwaligo hwįabo po weyu, wado po wabo dabe, te po nago agaba sela pabo bidi bidiyu da, teda usu yaibao. 20 Tama nago augwalibolo te Godigo bomai po tigidali ola mayu, tama augwaligo wali pabo tų me, te sesemane sogo te sę yabo kolesaga, te po augwalibolo wao. 21 Tiali goli, me nago te po page koneai bidi meba sa munama, tama augwaligo te we bidi tonaluabo bidi bidimainao. Tama mebago te we bidi bidi sese hauwa 1,000 mu tonaluyu, tama meba bidigo te bidi sese a naga 100 we bidi tonaluyu, tama mebago te 50 we bidi tonaluyu, tama mebago te nogo si we bidi naga tonalumainao. Nago te God dologode bidibo bidi dabe augwali sa munama, tama te tiwai bidi dago homu augwaliba dąų olama, tama meba bidi dabego dwai sę yali te monego augwali abelainogo ebo usugobeo. 22 Tama te bidi dabe augwali te we bidigo po dodolobo bidi pedelemainao. Augwa digi te dwasianu po dabe te po tųde dodolomainao. Tiali goli, augwaligo genuai sę yali po tų te nageba sela aselama, te nago te po dodolomainogo yaibao. Tama augwaligo nage tau siyu, tama te sęgę ebo sę toloyu, tama nago sę dene kuna egobeo. 23 Te sę dabe eno nagebolo yao olama po wali, te Godigo digi te sę nago emainogo homu yai. Tama nago eno po wali peyu da, teda te sęgę nage tigi hagela iligobeo. Tama dagego te we bidigo yali sę, me te we bidigo po dodolama, tama augwali homu dua nagame elama, tama augwa buluba ma pelawaibao,” Moses aga wąįgo te po wai.
24 Tialima Mosesgo te wiegi yai po Jetrogo wabo po odolama, tama tiwai. 25 Tama agai te Israel dabe augwali tomode te po page koneai bidi dabe augwali sa munama, tama augwaligo te bidi sese hauwa 1,000 we bidi, me te we bidi 100, we te 50, we te 10 we bidi meba tama tonaluabo bidi nigilai. 26 Tama sesemane sogo augwaligo te po tų odobo sę tonaluai. Augwa digi te dwasianu sę yali sęgę dabe dodolali, tiali goli augwaligo genuai sęgę yai sę yali te Moses pageba pelama, tama aga digi te sęgę dabe dodolai.
27 Te po dabe dodolobo sę tama dodolama, tama nosali Mosesgo aga wąį nogo menama, tama Jetro aga bulu tǫ pedaiba ma pai.

*18:2-3: Te Hibru pogo te wai nogi Gersom wabo dogoni te “Gasa tǫde bidibo,” po wabo dogoni tiwai si pąde dao.

*18:2-3: Sai 2:21-22; Tpi 7:29

18:4: Te Hibru pogo te wai nogi Elieser te page elalubao, te “Eno God aga ena tau sabo bidi dao.”