19
Esekielgo hobede ebo balia yali
1 Godigo po enabolo walali, te Israel king side homu dene ebo e balia po wao po wali.
2 “Nago ida te wiegi yai hasa laion sou mu da.
Aga te hasa laion omai dabe tomode bidu,
tama agai aga wai dabe negelama,
te augwali genuai pedelalio.
3 Aga ogwa me deli te wiegi yai
ogwa bidi laion pedelali.
Idago agabolo te hasa gegebo kolesaga ola mani,
tama nosali aga te bidi ela tubo hasa laion pedelalio.
4 Te tǫ kantri bidi dabe hauwago
te hasa laiongo ebo kolesaga po odali.
Augwaligo te tǫ dedage dogagaselama,
tama laion te tǫ dedageba tulaluali.
Augwaligo agai penane dilide
te gąų yai nai huk munama,
tama aga te tǫ kantri Isipba kekasa palio.”
5 “Te aga idago aga ma asobo tonaluali sesabi mu yali,
tiali goli te wai ma begasa me
asisąbaso, aga homu sęgę yali.
Tialima, agai gasa ogwa me dąį ilali,
tama aga me te wiegi yai boma pai
hasa laion tiwai pedelali.
6 Aga genuai pedelama
te aga gasa hasa laion dabe dali uda wali,
tama idago agabolo te hasa gegebo
kolesaga ola mani,
tama nosali aga te bidi ela tubo hasa
laion pedelai dao.
7 Agai augwaligo te bomai be dabe koneama,
tama aga pelama, te boi bidi dabego
taun dabe dolali.
Agai i hae umagia bomonama mu obaso,
te tigidali we bidi wi yai dao.
8 Te tigidali pąde elaluali tǫ kantri pedai
bidi dabego te hasa laion dali boi hwįagasali.
Augwaligo te ba bono mubo wa munama, aga tola salio.
9 Augwaligo agai penane dilide te gąų yai
huk munama, te aga kekasa pali.
Augwaligo aga te halobage me delide kalabus elama,
tama augwaligo aga te Babilon kingba odasa pali.
Augwaligo aga te bomai kalabusiba muani,
te aga te Israel bulu du dabeba wi ma
painu ebo usu egobeo.
Tama te we bidi dabe augwaligo
agai i wabo ma odogobeo.”
10 “Dage si, duga ida aga te wain ni tiwai
augwaligo te ąį sesege pąde bulali.
Tama te ni genuai pedelama,
tama nologo hauwa elama, te nai du hauwa walali.
11 Te ni nologo dabe boma pelama,
tama augwaligo te nologogo
te kingo tolasa bilibo dono nigibaso, usu yaibao.
Te ni bobage mu holama,
te pąde dagalu diągulainu yali.
Tigidali we bidigo suali, aga bobage mu holali,
te nologo me yabe hauwa elaluai dao.
12 Tiali goli, te bidi dabego wado po weyu,
aga maga gudulama, te aga tǫba degelai.
Te giliga asobo badu te posolai wali aselama,
te agai wai dabe tigidali boga pai.
Te bidi dabego te ni nologo tigidali tologolama,
tama te ni nologo dabe sasia pali
te augwaligo isiba ulai dao.
13 Tama augwaligo te ni te wa pai buluba
mu sela pelama,
tama augwaligo te ąį meni yai tǫde bulalio.
14 Isi te ni pedelama, te ni nologo tigidali
dobadi, te ni wai du dabe me dalio.
Tama te bomai nologo me elalusiąwai,
te kingo tolasa bilibo dono tiwai
pedelabo ni nologo tiwai me pedalubeo.
E po da, te homu dene ebo balia po da. Te balia po
augwaligo hauwa sogo odu geaibao,” wali.