29
Godigo te po wali, kantri Isip dolaibao po wali
1 Te da kalabus bulude bidibadi te kibu be nogo si, te 10 wabode, te polua nogo si, te 12 deide, Genuai Bidigo enabolo te po wali, 2 “Tǫde bidi, nago Isip king bidiba ugwaba tonao, tama te po wao, ena God eno aga dali, aga Isip we bidi dabe dali sese dolaibao po wao. 3 Nago te God Genuai Bidi eno po agabolo pusuyu, te po walao,
‘Isip king bidi, ena nago boi bidi pedalobao.
Nage te pukpuk me genuai deli
te Isip dabego wę dabede pila mubo tiwai dao.
Nago te po wabo dao.
Nago naga digi naga ma geselai dao olama,
tama te ąį Nail te naga ąį dao wabo dao.
4 Tama tialima, eno huk nago penanede munama,
tama te sųgų dabe nago abolode
dagana somainu yaibao.
Tama eno nage kegelama,
tama te sųgų dabe dali dage ąį tagalama,
dage buluba soaibao.
5 Tama eno nage te sųgų dabe dali dage selama,
te wa pai bulu besela sąwaibao.
Tama nago tigi te tǫde pila mubadi,
tama nago tigi pubulabo bidi meni yaibao.
Tama eno te bulu hasa dabe,
me ba dabego nago tigi tumainogo sula tagalaibao.
6 Tama tialima, dage Isip dabego koneagameo,
ena deli naga ena God Genuai Bidi dao
homu yagameo.’
Te po te Isip king bidibolo wao,” wali.
“Te po me agabolo pusao, ‘Te Israel dabego homugo tiai da, dage Isip dabego augwali tau sogowe homu yai da, te boi hwįbode. Tiali goli, dagego augwali me tau sai menio. King, te Israel dabe augwaligo homugo tiali, nage te nogo tolasa pabo bomai dono tiwai dao homu yali. Tiali goli, menio. *Ais 36:6 7 Te augwaligo nage nogo tola selama, bilainogo ebode da, nage te sigi dili tiwai bomo togwa pelama, bidigo punali badu enebo tiwai yali. Augwaligo nage dąų olama touwali, tiali goli nage togwa pali, tama augwali tula munama, augwaligo tudi dolali. Tiyu, nago augwali tau sabeo. 8 Tama tibaso, ena God Genuai Bidi eno te po obao. Te eno boi bidi dabego dage Isip dabe dali boi hwįagasomainu odasa asaibao. Tama augwaligo te we bidi eleyu, me hasa dabe eleyu yaibao. 9 Tama te kantri Isip dolama, tama te kantri te olo tǫ bulu mu elaluaibao. Tialima, dagego bugagia mu e tama koneaibao, ena deli naga ena Genuai Bidi dao homu yaibao,’ te po agabolo wao,” wali.
“ ‘King, nago te po wai dao, naga digi te wę Nail nigilai dao po wai dao. Tama nago te po wali, te naga ąį dao, wali. 10 Te po te dwai mu dao. Tama tialima, ena nago boi bidi me te ąį Nailgo boi bidi pedalibao. Tama eno tigidali Isip bulu badu olo tǫ mu pedalomainu ilaibao. Te taun Mikdol not badu gagalama, tama pelama, taun Aswan te saut badu usu nigi paibao, te Sudan tǫ dąį pąba usu nigi paibao. 11 Tama te kibu be 40, bidi sese si kibu bede, te nai dabe me deli te kantri Isip tomode me elalugobeo. Tama tede bidi ma hasa dabe tede me biligobeo. 12 Tama eno e kantri Isip geninama mu dolaibao. Te Isip taun dabe, me te tǫ sese dali, mu dwai dolai elalueibao, te gasa dolali tǫ dali taun dabe dali aiyaba elalueibao. Tama eno te Isip dabego taun dabe mu dolama tagalama, tama augwali kibu te bidi sese si kibu be mu tiwai tama me bidaibao. Tama eno te Isip dabe augwali augwa kantride sela sąwaibao, tama augwali gasa hani we bidi tomode bida bida paibao,’ agabolo te po wao,” wali.
13 “ ‘Ena God Genuai Bidi, eno te po wali dao. Tama te 40 kibu be silibo si, teda eno te Isip dabe augwali eno sela sąnama pali te kantride ma oda saibao, tama augwali augwa bulu tǫ muba ma odasa asaibao. 14 Te augwali asela silama da, teda augwali u badu te saut badu te Isip dabego tǫde bidaibao. Tama Isip bulu te polobadu bomai kantri bidali tiwai ma bidigobeo. 15 Te eno augwali olo nai tiwai ilama, tama augwaligo polobadu te tobolu gagea pelama, meba kantri dabe tonaluali yali gilama me egobeo. Augwaligo te gasa tǫ pedai kantri tonaluabo bomo me elalugobeo. 16 Tama te Israel dabe augwaligo te sę te Isip dabede pedelali sę suaibao, tama augwaligo koneaibao, augwaligo te Isip dabego augwali tau sao walide augwaligo sęgę sali koneaibao. Tama te Israel dabe augwaligo te kolesaga ma egobeo. Tama te Israel dabe augwaligo e tama bugagia koneaibao, ena deli naga ena God Genuai Bidi da homu yaibao.’ Esekiel, nago te po te Isip king bidibolo wao,” Genuai Bidigo te po wai.
King Nebukatnesargo Isip bulu aiyaba elaluaibao
17 Te deli wabo polua, te deli wabo dei te da kalabuside bidibadi kibu be 27 wabode, Genuai Bidigo enabolo e tama po walali. 18 “Tǫde bidi, odao. King Nebukatnesar aga ami bidi dabe dali, augwaligo te taun Tair dali boi hwįbo sę te yali. Kingo aga ami bidi dabebolo sęgai hwįbo nai dabe tolomainu ilama, tama te tialigo augwali tobolu wane ilama, tama augwaligo nage wali dagala palio. Tiali goli, king aga ami dali augwali olodali bomai sę yali. Augwaligo te hwįbode augwaligo wiegi yai nai me siyu ebeo. 19 Tama tialima, megi da, God Genuai Bidi eno te po obao. Eno te Isip dabego tǫ te king Nebukatnesarbolo mawaibao. Agai dolama, tama Isip dabego mone dali, doado bage dali sese sela paibao, te aga ami bidi dabego bomai sę yali pe tiwai saibao. 20 Te eno Isip agabolo, me aga ami dabe, augwalibolo mawaibao. Te augwa bomai sę yali te pe tiwai saibao. Magi baso meni, te boi augwaligo hwįanide te eno sę dao. Te da God Genuai Bidi eno po dao,” wali.
21 “Tama te sę pedalobo sogo da, teda eno Israel dabego bomo ma pedalumainu ilaibao. Tama tǫde bidi, ena nago Israel tomode po bomonama omainu ilaibao. Tama augwaligo bugagia koneaibao, ena deli naga te Genuai Bidi dao homu yaibao,” te po wali.