8
Wę asali kekasa pali
Te Godigo Noa dali, te bulu uni hasa dabe dali me, te be pąde bidalubo hasa dabe me aga dali te sip tomode bidalubo, te Godigo homugo koneani. Tama tiyu, Godigo te wali te tǫ daide ugwadu bilimainu ilama, tama wę aiyaba kekasa dulubo gagalali. Tama tǫ dologode elaluali tigidali węgo sunumi, me te dagalude dedage elaluali, tigidali te palia sali. Tulubage te dagalude ma tulusiąbadi, tama wę aiyaba kekasa dulali. Te aiyaba dulubo sę idubadi, te tama polua nogo a naga, te 150 sogo teba usu nani. Tama te polua a naga me badu si wali, te polua dei nogo si olama, a naga, me badu si, te 17, tede te moni geba sip te bulu du me deliba dąų wagi pali, te bulu du dabe nogi Ararat dao. Tama te wę aiyaba duludubadi, tama te nogo si polua, dei deli wabode, te gasa pąde elalubo bulu du tobolu dabe pedali gulalio.
Nosali te bidi sese si wabo side silai madi, tama Noago te sip pola sali dwasianu sunumi dalama, tama sisi yai ba me nogi kotkot, te ba tądi tiwai ba me deli tagala palali. Te ba pelama, bola bilidubadi, te tǫ wę sula sabo sogo usu nigi pai. Tama nosali Noago ba hi me deli tagala palai, te wę aiyaba kekasa dulaliwe naga konemai hagede tialio. Tiali goli, ąįgo te tǫ halualudubadi gebaso, tama te ba hi aga dualama, toma nabo madi meni baso, te aga ma geasa aselama, tama Noago nogo buluba dinama, tama aga sip tomoba ma sali. 10 Tialima, Noa te me sela, me sela, me deli, te tama sogo bidama, tama agai te ba hi ma tagala palai. 11 Tama te be pio mu ebode te ba higo Noa bidibo madi ma aselama, tama aga penanide te gesi ni oliv yabe me deli selasa asali. Tama tibaso, Noago koneani, te wę aiyaba kekasa dulali dao, wali. 12 Tama aga te a naga me si, te tama sogo tonaluama, tama te ba hi ma tagala palai. Tama te ba hi munu me asobeo.
13 Noago kibu be 601 elama, tama te polua deli wabo, dei deli ebode te tǫ daide elaluali wę tigidali sula sali. Tama Noago te sip haluali nai dagala sąnama, tama tonono bilali. Tama agai te tǫ wa pabo suai. 14 Tama bidama, tama te polua si, te dei 27, te sogode te tǫ tigidali mu wa palio. 15 Tama Godigo Noabolo te po wai, 16 “Nago te geba sip tagalama, tama nage naga we dali, me naga ogwa dabe, augwa we dabe dali, dage tǫba aiyaba dulao” po wai. 17 “Tama tigidali hasa sibi dage dali aiyaba sela dulao, te ba dabe me, te be pąde bidalubo hasa dabe me, te genuai bulu hasa dabe me, dwasianu hasa dabe me, te tigidali te tǫba dulao. Te augwali bilaluyu, tama wai dabe ame nenama, umabo pedaliyu, tama tigidali tǫ pedai usu ilimainao,” Godigo te po wai. 18 Tialima, Noago te sip tagalama, te aga we dali, te aga ogomani dali, te augwa we dabe me, augwali hodobo te tǫba dula silali. 19 Tama te tigidali uni hasa sibi me, te be pąde bidibo hasa sibi me, te ba dabe me, te dwasianu hasa sibi dabe, augwali te deli deliba naga hodobo sisina silama, tama te sip tagalama, tama tǫba dula silali.
Noago ofa Godibolo mani
20 Tama Noago te Yawebolo nai olo momainogo eyu, tama te ofa maiabo alta sai nigali. Tama agai te tigidali haniani hasa sibi tigidaligo te ofa maiabo usu yai hasa deli deli, me te ba dabe me sobadi elama, tama agai augwali elama, ofa yalio. Tama agai te alta sai ilali madi daide ulali. 21 Yawego te gasa sawi yai pusu yai ofa ulubo denami odobaso, tama agai aga homude te po wai, “Eno te we bidi dabego dwai kolesaga wei ponoyu, te tǫ dolabo po munu ma wagobeo. Eno koneani, te bidi dabe ogwa bidi bidibo sogo gagalama, tama peyu, sesemane sogo te bidi dabego homu kolesaga dwai elaluduai. Eno te bidibo ula elalubo nai tigidali te munu me ma dologobeo, te eno megi yali tiwai me egobeo. 22 Tama tiyu, te nai bulabo sogo me, te nai sabo sogo me elaluaibao. Tama te giliga nanobo sogo me, te tulubage sogo me elaluaibao. Te giliga me te be hulibo tama elaluaibao. Te e tǫ elalua pobadi, tama te tigidali nai me sia sogobeo,” Yawego te po wai.