1 Tama te sogo Juda te aga ama dede taga peyu, tama te Hira dali bidigi pali, te Adulam bidi me deli da. 2 Tama Judago te we me deli suali, te aga bidi me deli Kenan bidi Suago wegi dao. Agai te we selama, tama aga dali pagela piali. 3 Tama te we tabi elama, tama ogwa me deli ame nani. Tama Judago aga nogi Er poai. 4 Nosali te wego tabi ma elama, tama gasa ogwa me ame nani, tama agai aga nogi Onan poai. 5 Tialima, nosali te wego ogwa me deli ma ame nenama, tama aga nogi Sela poai. Juda te Kesipde bidibadi, tama aga wego te Sela ame nani.

6 Nosali Judago te aga gomunai ogwa Ergo we me deli gegali. Aga nogi te Tamar dao. 7 Tama Ergo kolesaga te Yawe gedude dwai ebaso, tama Yawego aga isilali. 8 Tialima, Judago Onanbolo te po wai, “Nago te naga amago we dali piao. Te nago ama isali, tama agai wai meni. Te dago kolesaga te tiwai nago te naga amago we selama, tama aga nogide te wai ame nao. Tama te naga amago wai hani elaluaibao,” wali.

9 Tiali goli, Onango koneani, te wai dabe te agai wai dabe meni, te homu yali. Tama aga te we dali piali sogo, agai wę te tǫba olo madi gelali. Tama aga amago hani wai dabe me elalubeo. 10 Te kolesaga Onango te Yawe gedude dwai ebaso, tama Yawego aga me isilali.

11 Tama nosali Judago te aga wąį we Tamarbolo te po wai, “Nago bidi isalio. Tama nage te nago ayago beba ma pelama, tama nage wilawe we bidigi pelama, te eno ogwa Sela genuai ebo teba usu naibao.” Aga wi elama, tama po wali. Tiyu, te Sela me te aga ama si isali tiwai gilama idalio. Tialima, Tamar te aga ayago beba ma pelama, tama bididuali.

12 Tama me sogo nosali te Judago we isali, te aga Suago wegi da, aga me te isali. Judago te homu dene ebo sogo silama, tama aga te Timna buluba peyu te bidi dabego aga sipsip nisi togobo pesageba pali. Te aga abagi Hira te Adulam bulu bidi aga dali pali. 13 Te bidi me deligo te we Tamarbolo wali, “Te nago bidigo aya, nago wąį, te Timna buluba peyu, te sipsip nisi togogi soyu, soali,” te po wai. 14 Tialima, Tamargo te aga bidi isali te konemainu te muani ugwa te peda sąnama, te gasa ugwa hasegelama muani. Tama agai gesabidi te sesela selama, te dwasianu ugwa name munama, tama te Enaim hanu soabo sunumi tunu si age tede dulaluali, te Timna sunumi teba pabo pesage elaluali. Agai koneai, te Sela te genuai yali, tiali goli augwaligo te Selago te Tamar sabo po te dodolisiąwai.

15 Judago te sipsip nisi togobo sę sula silama, tama beba ma pobadi, agai te we sulama, tama agai homugo te penani ebo we da, te homu yali, magi baso meni, te wego gesabidi te dwasianu ugwa namego halua sai elaluali. 16 Aga te we te sunumi sesegede bidibo madi pelama, tama agabolo te po wali, “Ae, polo tama, ena nage dali piabo homu ebao.” Tiali goli, Judago te aga wąį we da, te homu isiąyu, tama agai me konebe. Tama te wego te po wali, “Te nago magi nai hasia te enabolo mawaibawe?”

17 Judago te po wali, “Eno te meme elalubo, tama te ogwa bidi me deli eno te nageba tolaibao.”

Wego te po wali, “Te usu da, tiali goli nago te meme enaba tolabo te po dąų walobo dąį ilibo nai me deli te enabolo mao,” te po wai.

18 Tialima, Judago te po wali, “Te eno magi nai te po dąų waliyu, eno nagebolo magawe?”

Tama wego te po wali, “Te naga te nogi asębo nai me, aga naga dogonide walobo bono me, te megi nago tolalubo te tolasa bilibo au yai dono me, te enabolo mao,” wai. Tialima, Judago te nai dabe te webolo mani. Te augwa si te sogo pagela pilama, tama nosali te we tabi yali. 19 Tialima, Tamar hogodama, tama palio. Tama agai te aga gesabidi halualuali te dwasianu ugwa name peda sąnama, tama te aga bidi isai da olama, te bidigo konemainu mubo ugwa te ma muani.

20 Judago te ogwa bidi meme te aga abagi Adulambolo menama, tama aga tagala palama, agai te webolo mani doado bage te ma sigi pelama, sesemainu yali. Tiali goli, agai te we gegali, te me subeo. 21 Tama agai te bulu bidi dabebolo hanalu wali, “Te Enaim te sunumi tųnu age side te penani we bidali, te menade bidibawe?” Tama augwaligo te po wali, “Te penani we me deli te badu me bidibo menio.” 22 Aga te Juda bidibo madi ma geasa pelama, te po wai, “Eno te we me gegebeo. Tama te bulu bidi dabego te po wali, ‘Te penani we deli te badu me bidibo menio,’ te po wali.”

23 Tialima, Judago te po wai, “Tagalao. Te nai aga tolasa bilimainao. Nago te ma gegelamuo. Tiyu, te bidi dabego da si gisugu mayabuo. Eno te meme ogwa bidi te weba tolali. Tama nago gegali, tiali goli te nago me subeo,” wali.

24 Tama te polua sela bidai digi, tama augwaligo Judabolo te po wali, “Te nago wąį Tamar te penani wego ebo sę elama, tama megi te aga tabi elalubao,” wai.

Tama Judago te tiwai po bomo yali, “Te aga buluba sela solama, tama aga te siaba ulama, te aga isimainao,” wali. 25 Te augwaligo aga sela pabo sogo, agai te aga wąį wali ayabolo po ola tolai. “Ena te tobage doado bage tolalubo bidide te ena tabi yali. Te e nai dabe te bugagia osolama yao, te dąį ilibo nai, me te bono, me te tolasa bilibo au yai dono, te tama nai elalubao. Te tama doado bage te dego dawe?”

26 Judago te nai dabe sulama, koneyu, tama agai te po wai, “Eno tama te dwai sę yali. Te wego dwai sę meni yani. Aga te eno ogwa Selago saiba wai. Tiali goli, eno te augwali si sabo po dodolisiąwai.” Tama tibaso, Juda te aga dali me pibeo.

27 Tama nosali te Tamargo wai ame nainogo ebo sogo, augwaligo koneani, te aga tabide wai si elaluali. 28 Te ame nabo sogo, te wai me deligo nogo te polasa teda soali. Tama te tonalubo wego te nogo tola selama, tama te mama ugwa pedai dwasianu te nogode kęnani. Tama agai te po wali, “Te wai bolo hasia pedelai dao,” wali. 29 Tiali goli, te waigo nogo te ugwaba ma kega selama, tama aga ama me bolo te hasia ame nani. Tialima, te tonaluali wego te po wai, “Magi yaliwe? Nago te hani si pedelama, tama bomonama, nage bolo te hasia ame nani dawe?” Tama tibaso, augwaligo aga nogi te Peres poai. * Te Hibru pogo te nogi Peres te page elalubao, te “bomonama buluba asali,” tama wabo. 30 Nosali te aga ama te mama ugwa pedai nogode kęnani, te me ame nani. Tama augwaligo aga nogi te Sera poali. † Te Hibru pogo te nogi Sera te page elalubao, te “mama yai nai elalubo,” tama wabo.