2
Genuai Bidigo we bidi hani bugagia bidibo kolesaga mawaibao
(Mai 4:1-3)
Te Aisaiago nade ebadi tiwai, Genuai Bidigo agai po Aisaiabolo mani, te Emosgo ogwabolo, te agai te Juda de Jerusalem we bidi dabebolo pusa momainu. Te po e tama dao.
 
Te me sogo nosali, te Genuai Bidigo
be dolalubo te bulu du,
te genuai ugwanu ma dolaluyu,
tama gasa bulu du dabe aiyaba elaluai elaluaibao.
Tama tigidali we bidi hani teba sisinagasaibao.
Te tigidali bulu badu we bidi hanigo te po waibao,
“Asiąo. Da bulu du Saionba pinao,
Genuai Bidigo bulu duba.
Te Israel dabego Godigo beba pinao.
Te agai dabolo dago emaina homu ebo
te kolesaga ola momainu.
Tama da aga digi sa muani sunumidu pogo o.”
Augwaligo te tama po waibao. Magi baso meni,
Genuai Bidigo bomai po te bulu du Saionde gagalasa,
tama tigidali buluba paibao.
Awe, Jerusalem te Genuai Bidi agai bulu elaluama,
tama agai po we bidibolo ola mabo digi elaluaibao.
 
Genuai Bidigo tigidali hani we bidigo po tų dodolama,
tama augwali bugagia deliba bidaibao.
Tama augwali hwįbo bainat
te gi tǫ elebo ain tiwai gagawaibao.
Tama augwa hwą gagawai sesemone te hamago elama,
gi sę yabo hwą tiwai pedalaibao.
Tama tigidali we bidi hanigo me hwįgobeo.
Tama augwaligo te boi hwįbo kolesaga
munu ma konea sagobeo. * Jol 3:10
Asao, Jekopgo wąį dabe dage,
da Genuai Bidigo da mani uladu pinao.
God aga genuai nogi haninaibao
Genuai Bidi, nago naga we bidi
tudi ola mawai dao.
Nago augwali Jekopgo wąį dabe tagalali.
Magi baso meni. Augwaligo tǫ haniani
pobigo pągąna pali, te Filistia bagego tǫ
tiwai yali gilama.
Augwaligo te dwai kolesaga dabe
sia asobo badu sai dao.
Megi da, nago we bidi hanigo gasa
we bidi hanigo kolesaga wali pabo.
Te Israel dabego tǫ te silva, me gol, me hos, me karis
dabego mu pągąna pali.
Tama bidigo nedebo usu egobeo.
Tama me ma, augwaligo tǫ tibo
god dabego piksago pągąna pali.
Tama augwaligo augwa te nogogo
nigali nai dabeba lotu po wabo dao.
Tama tibaso, Genuai Bidi,
nago tigidali we bidi aiyaba elaluama,
tama tigidali we bidi hale dwai mu yaibao.
Genuai Bidi, nago augwaligo sęgę sela sągio.
10 Te we bidi dabe, dage wi pelama,
masigi dudulaweba dabe duala sigi piąo.
Dage tǫde dedage nigilama, duala siąo.
Tiyu, dage Genuai Bidi aga ula me bomo dali asobaso,
dage wi elama, dolabuo, Genuai Bidi asobode.
11 Te Genuai Bidi sabalobo sogode da,
agai te dene mabo kolesaga elama,
augwa nogi ugwa sabo bidi dabe
aiyaba elaluaibao. * 2 Te 1:9; Ped 6:15
Tama augwali hale mu yaibao.
Tama te sogo Genuai Bidi deli naga genuai nogi saibao.
12 Genuai Bidi Tigidali Bomo Elalubo
Bidigo bodolu elalubo,
te augwa nogi ugwa sabo bidi dabe
aiyaba elaluabo sogo.
Tama te sogo agai te bidi dabego genuai
nai dabe me augwaligo godolo
elama, gawebo nai dabe dolaibao.
13 Te agai te Lebanon bulude elalubo
dwagi yai bobobage ni bǫ dolaibao.
Me, te Basande bomai ni dabe me.
14 Te agai genuai bulu du dabe me agai dolaibao.
15 Me, te bobobage taua dabe, me te
tigidali hanugo bomai obo dabe me.
16 Te agai te genuai dwagi yai
sawi sip dabe me dolaibao.
17-18 Te Genuai Bidi sabalobo sogo da,
agai te dene mabo kolesaga elama,
augwa nogi ugwa sabo bidi dabego
nogi aiyaba elaluaibao.
Tama augwali hale mu yaibao.
Tama me te tibo god dabe mu sia saibao.
Tama te sogo Genuai Bidi aga deli naga
te sogo genuai nogi saibao.
19 Tama te sogo Genuai Bidigo te tǫ mali iliyu,
tama e tǫde nai dabe wi mu ilaibao.
Tama te we bidi dabe me wi mu elama,
tama masigi dudulaweba me, tǫ dudulaweba me,
wi duala sigi paibao.
Te augwaligo Genuai Bidi aga bomo dali,
genuai ula dali, asobo augwaligo suidali weyu.
20 Tama te sogo te we bidi dabego te tibo god dabe
augwa lotu wabo god dabe saibao,
te augwaligo silva de gol sigo nigali nai dabe.
Tama augwaligo te bologo buluba me
bogwą bidibo buluba dabe tama sąwaibao.
21 Tama te sogo da, Genuai Bidigo te tǫ mali iliyu,
tama tǫde wi mu yabo sę dabe yaibao.
Tama te we bidi dabe me wi mu elama,
te masigi ola beba me,
bulu du dologode elalubo masigi dedageba dabe
wi duala sigi paibao.
Te augwaligo te Genuai Bidi aga ula dali,
bomo dali, asobo augwaligo suidali weyu.
22 Dagego homugo bidi mego da
tau saiba homu elamuo. Mu menio.
Da bidi da olo nai mu dao. Magi baso meni.
Da pęwądage sogo bididama, tama da isaibao.

*2:4: Jol 3:10

*2:11: 2 Te 1:9; Ped 6:15