16
1 Da te Moap we bidi da,
te Idom dabe genuai hanu nogi Selade
bidibo bage, dago te kibu sipsip gǫų
te Juda dabego tuni bidi pageba
Jerusalemba tolinao.
Te sipsip kibu te agabolo te takis ma mawainu gagaliyu,
ola mabo tiwai eyu, te bidi dabego te sipsip kibu
sela pomainao.
Augwali te wa pai buludu pelama,
tama te Saion bulu duba saboligi paibao.
2 Tama augwaligo tuni bidibolo elama, po omainu yao,
“Tuni bidi, te boi bidi dabego da dena
hanu dabede, me dena bulu dabede pobeasa bilibaso,
tama da wi pelama, te wę Arnon
sesegeba bidigi pali.
Tama da dodola mu bidibao.
Da te bulude te ba gǫų aga bede tulaluama,
tama subigila bilibo tiwai, da subigila bilibao,
te ba buside bilibo tiwai ebao.
Te da gela dali biliyu, tama tibao.
3 Tama tibaso, dago homugo dagego
homu dago po osola sulama, tama da tau sao.
Tama da dagego buluba pelama,
tama te bidi dabego te posolai giligade te tįwai digi
duala sigi pabo tiwai,
nago buluba duala sagasaio.
Te boi bidi dabego da dena buludu pobeasa bilama,
tama da te adalalubo bidi bidibao.
Tama tibaso, nago augwaligo da
ma dolagasomainu me tagalamuo.
4 Da nago tǫba bidagasomainu sula tagalao.
Nago da tonaluama, tama te boi bidi dabego da
dolagasogobeo,” te Moap bage augwaligo te po obao.
Dago koneani, te sęgę dabe daba pedalali,
te sęgę dabe sia selama,
tama boi bidi dabego dago bulu tagalama,
tama da dali dwai sę me isąma ebaso da,
5 teda te sogo te Devitgo hani me deli
me tuni bidi pedalaibao.
Tama agai aga we bidi godolo mu elama,
tama agai aga we bidi te doloba pai
kolesagago naga tonaluaibao.
Agai aga we bidigo homu sęgę elalubo
po odama, tama agai polo dodolaibao.
Tama agai wiegi yai kolesaga ebo bomo mu yaibao.
6 Te Juda dabe augwaligo
te Moap dabego po odobo si da,
augwaligo augwa hasi tomode po weyu, e tama po wali,
“Dago te Moap dabego dwai kolesaga
ebo po dago polo odai dao.
Augwaligo haniani po olama, augwaligo augwa nogi
ugwaba sabo dao.
Augwaligo homugo augwali wiegi yai
mu dao homu elama,
tama augwaligo gasa we bidi aiyaba
elalubo po olama,
tama gasa we bidi posobo po wabo dao.
Tiali goli, te Moap dabe augwali ili po wabo bage dao.
Te augwaligo po mu dao homu igimio,”
Juda dabego te po wali.
7 Te Moap we bidi dabego augwali te dene sali dali,
te sęgę sali dali side gela obao.
Polobadu augwali Kirheres hanude
bidiyu, augwaligo te wain augwaligo olai te wain du
tuyu, yai dao.
Tama megi augwaligo te wiegi yai nai homu kone palali.
Tama augwali augwa ma hobede mu
elama, augwali gela obao.
Magi baso meni. Augwaligo wiegi yai
nai dabe sese dola silai dao.
8 Augwaligo wain gi me,
te hanu Hesbonde elaluali wiegi yai wain gi me,
te hanu Sipmade elaluali
wiegi yai wain gi me, kone palali.
Tama augwali hobede genuai mu ebao.
Te polobadu te gasa bulu tuni bidi dabego
te gide wain dabe tubo godolo mu yai dao.
Tama te wain tulama, augwali poloyu yai dao.
Tiali goli, megi da, te gi dabe sese mu dola silai dao.
Augwaligo wain gi hauwa mu elaluai dao.
Te hanu Hesbondu me Sipmadu gagalama,
tama hanu Jaserba usu nigi pelama,
tama te not usu nigi pelama,
me te wa pai bulu te giliga asoboba usu nigi pai
elaluai dao, te wę Detsiba saboligi pelama,
tama giliga paboba usu nigi pai dao.
9 Ena te hanu Jaser de Sipma si wain
gi hagede gela obao.
Tama me eno gela ųga te hanu Hesbon
me Eleale buluba tulalubao.
Magi baso meni, dage sese dola silalio.
Tama dagego we bidi augwa wain giba pelama,
tama augwali te wain du tau yali
sainu wiegi yai homu elama,
hai dali iba, eda egobeo.
10 Te wain gi dabe augwaligo
wain du dabe hauwa mu walai dao.
Tama te we bidi dabe augwaligo sabo sogo da,
augwali wiegi yai homu elama gana pai dao.
Tiali goli, megi te wiegi yai homu elama,
hai wabo kolesaga sia sali dao.
Tama te we bidi dabego te wiegi yai
homu ebo tęąbi me wabeo.
Tama me te bidi dabego te wain nigibo
madide te wain du te sągągo me agagobeo.
Genuai Bidigo tama augwaligo penane paninama,
tama augwaligo hai wabo silalio.
11 Tama tibaso, ena te Moap dabe
me hanu Kirheres we bidide
haliga dene genuai mu ebao.
Ena hobede e tama tibo, te bidigo hobede
ebaso, gita eliyu, te hobedai balia wabo tiwai ebao.
12 Te Moap we bidi augwali te tibo
god dabeba te bulu duba holama,
lotu po wagi pabo dao.
Tama augwaligo te tibo godiba aga lotu
bede gedu haluasa po odu gebo dao.
Augwaligo te bage augwaligo te sę dabe
yabo bomo dabe silai dao.
Tiali goli, augwa te kolesagago augwali
tau me sai menio.
13 Te Moap dolaibao wabo po te Genuai Bidigo polobadu digi wai dao. 14 Tiali goli, megi Genuai Bidigo po genina ma weyu, e tama obao, “Kibu be sela digi mu elalubao, te Moap dabe augwa wiegi yai nai dabe dali dolabo. Eno te sela kibu bego deli deli bubuga me polua bugagia mu nedebao. Tama te kibu be selago dei dolo mu tama eno te yaibao wali sę eno yaibao. Te we bidi hauwa mu megi te Moapde bidibao. Tiali goli, te bulu dolobo side, te bidi hani dwasianu naga te bulude bidaibao, tama augwali bomo mu meni yaibao,” wali.