Genuai Bidi te Saion bulu dude bidiyu, te tigidali we bidi hani tonaluaibao
24
(Dąį 24–27)
Genuai Bidigo tǫ dolama, tama aga digi te we bidi tonaluaibao
Genuai Bidigo tǫ mu dolama, tama tǫ olo mu
elaluaibao.
Agai te tǫ agalama, tama tǫ bebegelama,
tama te tǫ gasagi yai mu pedalaibao.
Tama agai te we bidi dabe subigila
wi tedela pomainu yaibao.
Tagala, augwali mena tiwai we bidi yaibaso me,
augwali deli sę tiwai naga suaibao.
Te pris bidi dabe dali, me te olo we bidi dabe me,
tama me te tonalubo bidi dabe me,
olo sę bidi me, olo sę we dabe me.
Tama me te bisnis bidi dabe,
me te augwalide nai dabe abelebo bidi dabe me,
tama me te nai negeli sabo bidi dabe dali,
te nai negeli mabo bidi dabe dali me.
Tama me te moni bidi dabe dali,
me nai meni yai bidi dabe dali me.
Augwali tigidali sese tama te dwai dene saibao.
Tǫ tigidali mu dolama,
tama te tǫ olo mu elaluaibao.
Genuai Bidigo te sę dabe yabo po polo walio.
Tǫ wa pelama, tama agai bomo polo sia salio.
Tama aga hobedai gela obao.
Tama te genuai nogi elalubo we bidi
augwaligo bomo me sia salio.
Te tǫ te we bidigo dwai meda yai
kolesagago meda ilalio.
Augwaligo te Godigo bomai habu selali
poba tudi ola menama,
tama agai po sela sąnama,
tama augwaligo God aga dali
dąų walali po toga sąyu yai dao.
Teda te aga dali tigidali sogo bidiabo
dąų wali po augwaligo sela sąwai dao.
Tama tibaso, Godigo pode
te dwai sogo mu te tǫde pedalama,
te we bidi hauwa mu
dwai kolesagadu wali pao olama, i ola mawai dao.
Tama dwasianu we bidi hani naga bidaibao.
Agai tama tiali. Magi baso meni.
Te we bidi dabe augwa dwai kolesagago
augwa sęgę tolaibao.
Te gesi ni wain du me walisiąbadi,
te ni wain me sasia mobia pai dao.
Tama te we bidi te wain wę tubo bage
augwali megi da homu sęgę mu yali.
Augwali wiegi yai homu elama,
tama augwa te bagwa pai
wiegi yai musik po wabo te temborin me elebeo.
Tama augwaligo haniani gitago
wabo dabe sese mu tama sia sali.
Augwaligo te wain wę tubo sogo
augwaligo te tęąbi po me wabeo.
Augwa sęgęgo yali sęde augwaligo
te wain augwaligo tubode
augwaligo pedauwalide pusu me ebeo, te ha ebao.
10 Te genuai hanude nai dabe sese mu dola silalio.
Tama tigidali be sunumi dabe palialua pali.
Te bidi me tomoba me pabo usu ebeo.
11 Tama te we bidi dabego
te tuabo wain wę menia salio.
Tama augwali te hanu sunumi dabede
dolalua peyu,
augwaligo te wain gogono bilibao.
Te we bidi dabego wiegi yai
homu elama, gana pali dabe mu sia sali.
Tama homu sese elama, hobede
ela pabo sę naga te tigidali tǫde ebao.
12 Genuai hanu sese mu tama dolali,
tama agai genuai obo sunumi tulaluama, tama
pebeda pali.
13 Te tobage dwai sę naga te tigidali
tǫde we bidide pedalaibao.
Tama dwasianu we bidi hani mu naga bidaibao.
Te ni oliv du te bidigo sela silaide
te deli deli walalua pabo tiwai elaluaibao.
Me te ni wain du te bidigo siyu,
deli deli tagalai te elalubo tiwai yaibao.
14 Tiali goli, te me bidibo dwasianu
we bidi hani augwali wiegi yai
homu elama, tęąbi po waibao.
Te tamu wę sesegede bidalubo we bidi augwaligo
te Genuai Bidigo bomode me genuai
nogide augwaligo wiegi yai
homu elama gana paibao.
15 Tama tialima, dage tigidali tǫ
habu badu bidalubo we bidi dabe,
te giliga asobo badu,
me te tamu ąį sesegede elalua pabo
bulude bidalubo bage,
dage tigidaligo te Genuai Bidigo nogi ugwanu sao,
te Israel dabego Godiba genuai nogi maiąo.
16 Te we bidi te tǫ sesegede digibulu
bidibo bage augwali wiegi yai
homu elama, tama augwaligo
wiegi yai homu ebo tęąbi po wabo.
Tama augwaligo te tęąbi po da e tama dao,
“Genuai Bidigo nogi ugwaba sao.
Agai tigidali sogo wiegi yai kolesaga mu ebo dao.”
Tiali goli, eno e tama po wali,
“Hobede mu dao.
Ena wiegi yai homu mu egobeo.
Eno haligade moni sęgę mu elama,
eno olo dali mu sia sabo homu ebo.
Magi baso meni. Te eno suali,
te dwai sę eyu, ili po weyu tama
ebo bidi dabego gasa bidi dabe ili po ola mani,
augwali dali dwai sę yali, eno te po wali.
17 Te tǫde we bidi, dage hobede mu dao.
Te dwai sogo me, tǫ dedage me,
sųgų sabo wa tamago dage
tonalubao, dage tola sainu.
18 Tama bidigo te dwai sogo te asobao
wabo po odama, wi pobaso da,
aga te tǫ dedageba tulaluaibao.
Tama aga te tǫ dedagede
ma hola aselama, ma wi painu yali da, teda aga
te sųgų sabo wade ma tola saibao.
Te dagalude sunumi dabe dala pelama,
tama te wę e tǫba gealuaibao.
Tama tǫ pagede mali yaibao.
19 Te tǫ mali genuai mu elama,
tama te tǫ tomode peda pelama,
tama te tǫ dedage olo dala pai elaluaibao.
20 Aga te polobo bidi ugwaba edaba ebo tiwai eyu,
me te dwasianu be te bomai wali ebo
sogo uba edaba ebo tiwai yaibao.
Te tǫde we bidi dabe augwa dwai sęgęgo
yaligo te tǫgo tolobo usu egobeo.
Tama tibaso, te tǫ tulaluama, tama te tǫ ma hodalobo
usu me egobeo,” eno te po wali.
21 Polobadu digi Genuai Bidi aga digi
po bodolu muai dao.
Agai te dagalude bidibo bomo elalubo bage dene mayu,
me te tǫde tuni bidi dabe dali dene mawaibao.
22 Genuai Bidigo augwali sisinama,
augwali kalabus ilaibao,
te bidi dabego te kalabus bage
tǫ dedage deliba tagalobo tiwai mu yaibao.
Tama agai augwali kalabuside
bobobage sogo tonaluaibao.
Tama nosali augwaliba agai homugo
yainu yali sę augwaliba yaibao.
23 Tama te giliga ula de polua ula si,
te olo nai tiwai yaibao.
Magi baso meni. Tigidali Bomo Elalubo
Genuai Bidi aga bomo dali,
me aga bomai ula dali, asaibao.
Tama aga te bulu du Saionde we bidi tonaluaibao.
Tama te we bidi dabe augwa genuai
bidi dabego aga suaibao.