41
Genuai Bidigo te Israel dabe ma saibao po wali
1 Godigo te po wali, “Dage we bidi dabe,
te pąde elalubo tǫ kantri dabe,
me te digibulu elalubo tǫ kantri dabe me,
dage tigidali pedauwali pania selama, eno po odiąo.
Dagego po bugagia sisila dodola selama asiyu,
te duga po te po tų eboba pusagasao.
Te da deliba sisinama, te po dagalama sueibao,
te dego po mu po yabowe naga konebo dao.
2 Dego mu te giliga pedalubo badu king
hodolama, *Te po page e tiwai dao. Te ves 2 tede e tiwai po wali, “Te giliga pedalubo badu bidali king,” wali. Te king Sairus te tǫ kantri Persiade bidai dao. Te Dąį 44:28, Dąį 45:1; Dąį 46:11, te dąįde te po elalubao. te aga pabo usu nama,
tigidali habu badu te hwįbode
aga ugwanu igulumainu yaliwe?
Tama dego te bulu tǫ kantri aga nogoba munama,
te agai te gasa king dabe aiyaba elalumainu ilaliwe?
Te agai bainatgo me enesigi ene sesemonego te augwali
mu silama,
te augwali tǫ hogomu tiwai pedelali,
te pobele bage waligo sela pabo tiwai yai dao.
3 Aga te deli sogo naga polo tama augwaliba pedelama,
te augwali doliyu yali,
tama augwaligo agaba magi sę yabo te usu meni
yai.
Te waligo digi aga sela pabo tiwai eyu,
agai te tǫ me dwasianu diąbeo.
4 Dego mu te sę dabe pedalumainu ilaliwe?
Te Genuai Bidi, eno naga dao.
Te eno tǫ gagalama pedalumainu yali sogo,
sesemane sogo eno tigidali nai te tǫde
pedalumainu dodoludalio.
Ena Genuai Bidi ena hasia polasa mu bidali.
Te ena nosali badu sogo me bidaibao.”
5 “Te tigidali tǫ kantri we bidi dabego
te eno yali sę dabe sulama,
te augwali wi elama, noma sali.
Te augwali deliba sisinagaselama,
6 te augwade digi haliga dąų walabo po dabe minama,
7 tama augwa te tibo godigo piksa nigalio.
Te nigo piksa dulubo bidi dabego te golgo nai nigibo
bidi dabeba te po wali,
‘Dagego te wiegi yai sę mu ebao.’
Te gol haluama dodolobo bidi dabego te aingo nai
nigibo bidi dabeba te po wali,
‘Iya, tegobao, dagego te nai bugagia mu dąų walobao.’
Te nosali augwaligo te piksa dabe bugagia enani,
tiyu te augwali tulaluidali weyu tiai dao.”
8 “Tialima, dage Israel, dage te Jekopgo hani da,
eno dage sa muyu, dąį ilama,
te dage eno sę bidi bidibao.
Dage te bulai wai eno abagi Abrahamgo hani dao.*2 Sto 20:7; Jer 2:23
9 Eno dage te digibulu bulude mu,
te tǫ sesege badu mu selama,
tama dage odasa asali.
Te eno te tiwai po dagebolo wali,
dage eno sę bidi bidibao wai.
Eno dage dąį iliyu, dage te ena dao wali,
te eno dage hagela eyu,
te dage tudiba me mubeo. Menio.
10 Dage wi igio, magi baso meni, ena duga God da,
ena dage dali bidibao.
Te eno dage boma pai pedalumainu ilama,
te dage eno tau saibao.
Te dage eno bugagia tonalu,
te eno genuai bomogo te eno dagego
boi bidi aiyaba elalueibao wali.
11 Te dagede haliga sębę elama,
te dage po tųba odasa pobaso da,
te dage augwaligo aiyaba elalusiąbaso,
te augwali hale dwai mu yaibao.
Te augwali olo nai tiwai mu pedelama,
te augwali mu hagawaibao.
12 Te dage dali hwįnama,
te dage dolainu homu yali hani dabe,
te augwali olo nai tiwai mu pedelama,
te augwali tǫde mu hagawaibao.
13 Ena Genuai Bidi, te duga God dao,
eno dage ugwaba sagualu tonalu,
te eno te tiwai po dageba obao, dage wi me igio.
Te eno dage tau saibao, te po wai dao.”
14 Genuai Bidigo te tama po wali,
“Te dage Israel te dwasianu hani da,
te dagego bomo meni da wagio,
ena dage ma sabo bidi,
te eno dage ugwaba sagualu tonalu, tau saibao.
Ena dage Israelgo God dao,
ena te Wiegi Yai Doloba Pai Kolesaga Mu Ebo God
dao,
eno te dage ma dobola saibao wali.
15 Te eno dage te wit agayabo te gesi ni nami tiwai
pedalumainu ilama,
te dageba sęgę mayu,
te dage sunumi palialuali boi bidi dabe te dagego
aiyaba elalueibao.
Te augwali te bulu du tiwai bidali goli,
dagego te bulu du dabe pepedama,
te wit bo yalala pai nai tiwai pedalubo bomo elalubo
tiwai yaibao.
16 Dagego te sęgę elalusiąyu,
te bidigo te bo dabe ugwaba sąnama,
te waligo tolasa pabo tiwai yaibao.
Tialima, dagego wiegi yai pemene te Genuai Bidi enaba
yaibao.
Te dagego ena nogi ugwaba saibao, te Israel God da,
ena te Wiegi Yai Doloba Pai Kolesaga Ebo God dao,”
wali.
17 “Te eno we bidi dabe te ąį mu sǫą pelama,
te augwali dogoni te ąį tuabo wa pali sogo,
te augwaligo ena i obaso, tialima ena, Genuai Bidi,
te eno augwaligo gedu haluasa po wabo odaibao.
Ena, te Israelgo God, te eno dage
homu kone me gegeda palogobeo.
18 Eno te wa pai bulu du dabede te ąį
pedalumainu ilaibao,
te ulu ąį te odogo malu tǫde pedelaibao.
Tama eno te sigi ąį te wa pai pesagede
pedalumainu ilaibao.
Tama te ąį meni yai pesagede,
te ąį hauwa elalueibao wali.
19 Tama eno te dwagi yai ni sida dabe,
me ni wuli dabe, me te bulu ni oliv dabe,
me te ni saipres dabe, te gasa tobage ni dabe,
te olo masigi kemi tǫde pedalumainu yaibao.
20 Tama te we bidi dabego sulama,
tama augwa te tiwai koneaibao,
ena God, te Israelgo Genuai Bidi,
ena te Wiegi Yai Doloba Pai Kolesaga Ebo God dao,
ena digi eno te sę pedalumainu ebo dao,” te po wali.
Te tibo god dabe te augwali mu god menio
21 Genuai Bidi, te Israelgo king dao,
agai te tama po wai,
“Dage te gasa bulu tǫ kantri god dabe,
dage te po tų eboba asiąo,
te po tų ebode dagego po odomainu yaibao.
Te dagego pusabo po bugagia dodolao,
tama te po tų eboba asao.
22 Te po tųde dagego te polobadu pedelali sę po weyu,
te yali sę dabego po page dabolo pusao,
te dago hania koneaibao.
Tama dagego te nosali badu pedelabo nai po me wao.
23 Tama te nai dabe pedalubo sogo, te dago koneyu,
te dage god mu da te homu yaibao.
Dagego te da wi yabo sę me deli iyąo
te wiegi yai nai, ma dwai nai, te sę yao.
Tama tialima, te dago dagego bomo sueibao.
24 Tiali goli, menio. Iya, tegoba!
Dagego magi sę me deli yabo usu isąwai,
magi baso meni, dage tibo god dabe
te olo dwai nai naga dao.
Tama te dagebolo lotu po wabo we bidi,
augwali me eno gedude te dwai nai mu pedela silai
dao.”
25 “Eno te giliga pedalubo badu bidi me deli hodolali.
Te bidigo enaba genuai nogi mobao,
tama megi eno te not badu sela aselama,
tama agai te king dabe aiyaba elaluama, agayu,
te tǫgo sospen sene nigibo bidigo te tǫ agalama,
te sospen nigibo tiwai ebao.
26 Dage te gasa bulu tǫ kantri god dabe,
te dage tomode dego te nai pedelaibao po waliwe?
Te dage tomode me deligo te tobage po wali wida,
teda dago te po weyu,
agai mu po wali da po waibao.
Tiali goli, dage me deligo te nai pedelaibao po me
wabeo.
Tama dage me deligo te po wabo bidigo me odobeo.
27 Ena, Genuai Bidigo naga eno te bulu du Saionba
weyu,
te nai pedelaibao wai.
Tama megi da, suiąo, te nai dabe pedelalio.
Te megi me, eno te bidi me deli tagala palama,
te Jerusalemba wiegi yai po sela pomainu yai dao.”
28 “Eno te tibo god dabe gegali sogo, te eno suali,
augwaligo te po deli me wasiąwai.
Augwaligo homude te wiegi yai homu kolesaga elalubo
po pusabo homu meni yai.
Te me deligo eno hanalubo po wei me ponabo usugobeo.
29 Suao. Augwaligo te mena sę me deli ebaso usugobeo,
magi baso meni, augwa digi te olo nai naga dao.
Te tibo god dabe te olo piksa dabe naga elalubao.
Augwaligo te magi sę me deli yabo bomo me elalubeo,”
te po wai dao.
*41:2: Te po page e tiwai dao. Te ves 2 tede e tiwai po wali, “Te giliga pedalubo badu bidali king,” wali. Te king Sairus te tǫ kantri Persiade bidai dao. Te Dąį 44:28, Dąį 45:1; Dąį 46:11, te dąįde te po elalubao.