1 Te Efraim hani bidi dabego te Gideonbolo te tiwai po wali, “Te nago te Midian dabe dali hwįani sogo te nago da i wabe, te magi baso yaliwe? Magi baso nago dabolo te tiwai sę yaliwe?” Tama augwaligo agabolo dwai homu mu elama, wado po wai.

2 Tiali goli, Gideongo te po augwalibolo wai, “Te dagego yali sę te genuai sę mu yalio. Te eno yali sę te olo sę tama yali. Te dwasianu sę dage Efraim dabego yali sęgo te dago yali sę tigidali te aiyaba elalualio. 3 Godigo dagebolo te Midian dabego tobolu bidi si mani, te Orep me Sep. Te eno yabo usu isąbo sę te dagego yali.” Gideongo te po obaso, tama te Efraim hani dabego te wado po ma wabeo.

4 Gideon dali, te aga ami 300 bidi dabe dali, aga te Jordan pabo ąįba sabolama, tama augwali te ąį ugaba nogali. Augwali bomonama bilali, tigi bomo kimi isiyu, tama nasi yali, tiali goli augwaligo te boi bidi dabe pobeasa bilidubadi gebo sę yalio. 5 Tama Gideongo te Sukot hanude bidalubo bidi dabebolo hanalu te tiwai po wai, “Te eno ami bidi dabebolo te dagego bret meba maiąo. Augwali te bomo kimi isiyu, tama nasi ebao. Tama eno te Midian dabego king bidi si te Seba me Salmuna te augwali si pobeasa bilibo sę idubadi gebao,” Gideongo te po wai.

6 Tiali goli, te Sukot hanude bidali genuai bidi dabego te po wai, “Magi baso te dago nago ami bidi dabe nai momainogowe? Dagego te tuni bidi si Seba me Salmuna te bidi me pageabi elama nogo tubeo.”

7 Tama tibaso, Gideongo te po weyu, “Wiegi yai da!” wali. “Te Genuai Bidigo te Salmuna me Seba te ena nogoba mabo si da, te eno dagego tigi walide te masigi kemi tǫ wa pai bulude te sesani yai elalubo bonogo te dage tigi tologa pomainu elaibao,” wai.

8 Tialima, Gideon mu pelama, tama te bulu Penuelba sabolama, tama agai te bulu bidi dabebolo me te nai meba mao wabo po hanalu wali. Tiali goli, te Penuel bidi dabego po wei ponoyu, te Sukot bidi dabego wali po tiwai naga walio. 9 Tama Gideongo augwalibolo te po wali, “Te ena ma bega asiyu da, tama eno te dagego te boi bidi asobo tonaluabo bobobage be taua te pepedama dolaibao!” po wali.

10 Tama te Seba me, Salmuna me, te augwali sigo ami bidi dabe dali, augwali te bulu Karkorde bidaluali. Te bidi sese hauwa me badu te pąde 15,000 ami bidi dabe naga bidali, magi baso meni, te Israel dabe augwaligo te bidi sese hauwa umabo te 120,000 ami bidi dabe te elali. 11 Tama Gideon te masigi kemi tǫ wa pai bulu sesege badu sunumi wali pali. Te sunumi te giliga pedalubo badu te Noba me Jokbeha te tǫ pedai si badu elaluali. Tama polo tama mu Gideon teba sabolama, te wąbi hwįbo hodolali, tama te Midian dabego ami bidi dabe te dwai noma mu selama, midigi sai. 12 Tama te Midian king bidi si, Seba me Salmuna, augwali si wi pai. Tiali goli, Gideongo augwali si pobeasa pelama, tama augwali si pageabi elama, nogo tuai. Agai te augwali sigo ami bidi tigidali dwai noma selibaso, tama augwali wi mu pai.

13 Tialima, Gideon aga te hwįani pesage tagalama, tama te sunumidu wali peyu, te Heres buluba ugwa holali. 14 Te aga pobadi, te sogo agai te Sukot hanude bidibo gesi ogwa bidi me deli asobo sulama, tama aga nogo tolasa, tama agabolo hanalu te Sukot hanude bidibo tobolu bidi te de dawe wali. Tialima, te ogwa bidigo te bidi te 77 tobolu bidi dabe nogi asęnama, te Gideonbolo mani. 15 Nosali Gideon te Sukot hanu bidi dabe bidibo madiba sabolama, te tama po wali, “Dagego te sogo homu kone palu, tama dagego ena gisugu mayu, tama dagego te po wali, dagego te eno ami bidi dabe te bomo kimi meni eyu nasi ebadi, te dagego augwaligo nai me magobe po wali, magi baso ebe, eno te king bidi si te Seba me Salmuna te bidi si nogo tulama sisąbaso te tama tiali. Tiali goli, megi da, suiąo. Te augwali si e bidibao!” Gideongo tama po wali. 16 Tialima, agai te masigi kemi tǫ bulude elalubo te sesane elalubo bono selama, tama agai te sesane yai bonogo te Sukot hanude bidali tobolu bidi te elibo umabo sę mu yali. 17 Tama agai te Penuelde elaluali bobobage be taua aluama, dolama, tama te hanude bidali bidi dabe ela muai.

18 Nosali Gideongo te Seba de Salmuna sibolo te tiwai po hanalu wali, “Te Tabor bulude, te dage sigo ela muani bidi dabe, te augwaligo gesabidi te mena tiwai yaliwe?”

Tama augwali sigo te tiwai po wei ponai, “Te augwaligo gesabidi te nago gesabidi naga tiwai. Augwali tigidali te king bidi deligo wai dabe tiwai dao,” wali.

19 Tama Gideongo te po wali, “Augwali te eno ama dede mu dao. Augwali te eno idago wai dabe mu dao. Te dagalu bidigo nogide mu po tama obao, te dagego augwali me ela mugi menigi sogo da, teda eno dage megi dage me eligi menigi dao.” 20 Tialima, te Gideongo aga gomunai ogwa, te Jeterbolo, wali, “Ae, te nago augwali si ela muao,” wali. Tiali goli, te ogwa agai te bainat hwą sisąwani, te magi baso ebe, aga te genuai bidi nigisiąbadi, tama tibaso aga wi yali. 21 Tiali goli, Seba de Salmuna sigo te po wai, “Tagalao! Naga digi nago da si ela muao,” wai. “Nage bidi mu da wida, teda nago tama tiao,” wali. Tialima, Gideongo te Seba de Salmuna si ela munama, tama agai te augwali sigo kamel magede au elaluali doado bage dabe sali.

22 Tama te Israel bidi dabego Gideonbolo te tama po wai, “Dago homugo te nage dago tobolu bidi bidimainu homu ebao. Tama nago wai dabe me, te nago waigo wai dabe te nago wąį dabe me, te nosali augwali dago tobolu bidi dabe bidimainu yaibao, magi baso meni, nago da tau selama, tama da te Midian dabego nogode bidali te ma dobola salio,” augwaligo te po wali.

23 Tiali goli, Gideongo te po wali, “Ena te dagego tobolu bidi me bidigobeo. Tama eno wai dabe me te dagego tobolu bidi me bidigobeo. Genuai Bidi naga te dagego tobolu bidi bidaibao,” wali. 24 Tiali goli, Gideongo po wadolama weyu, te tiwai po wai, “Eno dagebolo te nai me deli po hanalu obao. Dage tigidali deli deligo te dagego hwįyu, te boi bidi dabego olode mubo nai ring te sali enabolo maiąo,” wali. Te Midian dabe augwali te Ismaelgo hani tama tiyu, augwaligo te ring gol te augwa olode munama walai.

25 Tama augwaligo te tama po wali, “Te usu da, te dago nage mawaibao.” Tama augwaligo te ugwa pedai me deli te tǫba munama, tama tigidali deli deli bidi dabego te augwaligo sali ring te muani ugwa daiba mugi peyu yalio. 26 Te augwaligo te sisinani te ring gol dabego sęgę te 25 kilogram tama. Te sęgę te ring gol dabego sęgę naga tama. Te gasa au dobage dabego sęgę, te beli me te Midian king dabego muani te mama gudubo ugwa me, te kamel dabego magede au ilali au dobage dabe, te doado bage te ring dali taluama me nedebeo. 27 Tialima, Gideongo te tibo god me deli te golgo nigilama, tama agai te aga hanu Ofra teba muani. Tama tigidali Israel dabego te God tagalama, tama augwali te hanu Ofraba pelama, te nigali tibo godiba lotu wagi pali. Te tibo god te Gideongo nigali, te naigo te Gideon dali, te aga hani sibi we wai dabe dali, te mu kone tua pali. 28 Te Israel dabego te Midian dabe aiyaba elaluama, tama te Midian dabego magi sę me deli yabo bomo meni yani. Tama te Gideon bidali sogo te tǫde wąbi munu me hwįsiąbadi, te kibu be bidi sese si 40 yia bidai dao.

29 Megi da, Gideon te aga beba pelama bidigi pali. 30 Agai ogwa dabe te bidi sese sela olama, te gasa nogo si te 70 tama elaluali, magi baso meni, te agai we hauwa elaluai. 31 Gideongo we me deli te bulu Sekemde bidali. Tama te wego te ogwa me deli ame nani, tama Gideongo te ogwa nogi Abimelek poali. 32 Tama Gideon te monu dabe mu pedelama, tama isali. Tama augwaligo aga te aga aya Joasgo gų pagede pubulali, te bulu Ofrade, te Abiesergo hani dabego hanude dao.

33 Gideon isai madigi tama te Israel dabego Godiba lotu munu ma wabeo. Augwaligo te tibo god Balba naga lotu wali. Tama augwaligo te Balberit te augwa god elaluali. 34 Augwaligo te God, te augwa Genuai Bidi, te homu kone munu ma palubeo, te augwali boi bidi dabego bagua selama tomode bidibadi te augwali tau selama, te boi bidi dabe aiyaba elaluali, te homu augwaligo ma kone palubeo. 35 Tama augwaligo te Gideon hani sibiba te buba hwį po me wabeo, te tigidali wiegi yai sę te Gideongo augwali tau selama yai.