1 Tialima, Samsongo te Lehi hanu tagalama, te Gasaba pai. Tama te Gasa bulude agai te penani we me deli sulama, tama aga te wego beba bidigi pali. 2 Tama bidi mebago te Gasa bidi dabebolo waliyu, te po wali, “Samson asalio.” Tama tialima, augwaligo te bulu bagua selama, tama augwaligo aga te hanu bulu badu soabo sunumide geme dualaluyu tonaluali. Augwaligo te hulide kilikili me wabeo. Tama augwaligo tama homu yali, “Te dago tonaludubadi, te be posoboba usu nama, tama dago aga ela muaibao.” Te homu yali. 3 Tiali goli, Samson te pibo sai betide pila mudu bididubadi, te be huli tomoba mu usu nani. Nosali aga hodaluama, tama te hanu buluba piduali, te sunumi nogogo tulama, tama agai te sunumi te dali, pos ni si me, te tigidali elaluali dąų wabo nai dabe tigidali gudali. Tama agai te sunumi doado bage dali te Hebron bulu pąde elaluali bulu duba ugwaba tolasa holalio.

4 Te sę elama nosali, Samsongo te odogo bulu Sorek we me deli godolo homu yai. Te wego nogi te Delaila dao. 5 Tama te a naga Filistia tobolu bidi te we Delailaba pelama, agabolo te po walali, “Nago aga homu bega sabo po olama, tama agai te elalubo bomo te menade sali po koneainu tiao, tama magi baso dago aga aiyaba elaluabo usu ebe. Tama tiyu, te dago aga nogo dunama, tama aga aiyaba elaluaibao. Te nago te tama tebaso da, teda da deli deligo te mone 1,100 mone silva nage mawaibao,” wali.

6 Tama tibaso, Delailago Samsonbolo te po walali, “Te magi baso nago te tiwai genuai bomo elalubowe? Te po enabolo walao. Tama bidi me deligo te nage nogo dunama, tama nage aiyaba elaluainu ebaso da, te agai mena tama tiwai sę yaibawe?” wali.

7 Tama Samsongo agabolo te tiwai po walali, “Te ena augwaligo te enesigi balibi dolobo bono keloa te a naga te me si te tamago te ena nogo dubaso da, teda te eno bomo sia saibao. Tama ena te tigidali gasa bidi tiwai naga yaibao,” wali.

8 Tama me sogo nosali te Filistia dabe tobolu bidigo te gesi enesigi balibi dolobo bono keloa te a naga me si tama selama, tama augwaligo te we Delailabolo magasali. Tama agai Samson te bono keloa dabe nogo dunama elaluali. 9 Tialima, agai te bidi mebabolo po walama, te augwali gasa be habu badu tonalua po wali. Tama agai i weyu, “Samson, dua dao! Te Filistia dabe megi da asobao!” Tiali goli, agai te kę yani bono keloa dabe toga sąyu, te ugwa hobolobo hobi te siago ulubo sogo te togobo tiwai yali. Tama augwaligo agai te bomo ebo po page te me konesiąwai dao.

10 Tama Delailago Samsonbolo po wali, “Odao! Nago enabolo te tibo po wabo sę naga eyu, te ena pomonani. Tiali goli, megi nago enaba po dolo weyu, te bidi dabego nage mena tama tilama te bono kę yabo po waibawe?” wali.

11 Tialima, Samsongo agabolo walali, “Te augwaligo ena te gesi baklain mugo, te augwaligo polobadu magi sę me isiąwaigo te ena kę ebaso da, teda eno bomo elalubo te sia selama, tama ena te olo gasa bidi dabe tiwai naga yaibao.” Te po wai.

12 Tama tibaso, Delailago te gesi bono baklain meba selama, tama aga kęnani. Tama agai i weyu, “Samson, dua dao!” wali. “Te Filistia dabe asobao!” Tama te bidi meba te gasa be habu badu ma tonaluali. Tiali goli, Samsongo te bono baklain dabe tologa sąwani, te olo hobi tiwai naga ilali.

13 Tialima, Delailago Samsonbolo te po walali, “Nago enaba te tibo po wabogo te ena ma poma palali. Megi da, te nago enabolo mu po dolo te nage te bidi dabego mena tama kę emainu yabo po waibawe?”

Tama agai te po wai, “Te e nago eno bobage tobolu nisi duani te haliga a naga olama, me si tiwai elalubo, te selama, tama nago bomonama te blanket ugwa nigibo masin bono string tomoba kęnama, tama bobage medabu selama, tama bomonama elibaso da, te tobolu nisi mu dąų ola saibao, te tama tebo si te eno bomo meniama, te ena te gasa olo bidi dabe tiwai naga pedelaibao,” wali.

14 Tialima, Delailago te Samson tibo po ola mayu, te aga godege mu pialio. Tama agai te Samsongo tobolude te bobage tobolu nisi haliga tiwai elalubo nisi a naga me si te tama selama, tama te masinde bomonama kęnama, tama te medabugo bomonama kęnani. Tialima megi da, Delailago i wali, “Samson, dua dao! Te Filistia dabe asobao!” Tiali goli, aga hodaluama, te tobolu nisi kega sąnama, te dąų walali medabu toga sąnama, te masin me tigidali nai dabe alua peyu toga palio.

15 Tama Delailago agabolo te po wai, “Magi baso nago te po weyu nago ena godolo ebo po obawe? Nago pedauwalidu olo gani bole ebo po naga obao. Nago ena dali te deli homu me ebeo. Megi da, sela sogo nago enabolo te tibo po wabo pogo te ena pomonobo sę elama, tama nago enabolo te nago bomo mena tama pedalubo po te enabolo me wabeo.” Te wego te po wali. 16 Te tigidali sogo te wego po hauwa weyu, tama agaba hanalubo sę yali. Tama tiyu, Samson te pode hagela dwai mu yalio.

17 Te megi da, Samsongo Delailabolo po dolo walali. Agai tama tiwai po wali, “Augwaligo te eno tobolu nisi me togobeo. Te idago ena ame nani sogo, ena te God aga mu dolo bidi pedelali. Te augwaligo eno tobolu nisi togobaso da, teda eno bomo silama, tama ena te gasa bidi dabe tiwai gilama te bomo meni yaibao,” te po wali.

18 Te sogo Delailago koneani, te Samsongo mu po wabo homu yali, tialima megi da agai te Filistia dabe tobolu bidiba po ola tolu, tama augwalibolo te tama po wai, “Dage ma asiąo. Megi da, agai enabolo mu po walio.” Tama augwaligo mone dali sela asu asali. 19 Tama Delailago te Samson ili po ola menama, tama aga telede pila mubadi, tama agai bidi me deli i olama asobo si tama te Samsongo bobage tobolu nisi te a naga olama, me si elaluali te tobolu nisi togali. Tama Delailago aga hodolobo sę iduali. Tiali goli megi da, te agai bomo elaluali te tigidali pela silalio. 20 Tama te wego i wali, “Samson, dua dao! Te Filistia dabe asobao!” wai.

Tama Samson hodaluama te homu yai, “Te ena hodaluama peyu, tama ena te polobadu hasia te eno nogo kęduali sogo yali sę tiwai eyu, te nai dabe tologa paibao,” te homu elama pali. Tiali goli, te Genuai Bidigo agaba mani bomo te taga pali te agai me konebeo. 21 Tialima, te Filistia dabego aga pageabi elama, tama agai gedu si guda sąwani. Tama augwaligo aga te Gasaba sela pelama, tama augwaligo aga te brasgo nigai sengo gebelali. Tama augwaligo aga te sia me wit te nai sę ebo be te kalabus be tomode agaga pabo sę emainu ilali. 22 Tiali goli nosali te Samsongo tobolu nisi te bobage ma holobo gagalali.

23 Nosali te Filistia dabe tigidali polalubo bidi te sisinagasai. Augwaligo te wiegi yai homu pemene elama, tama augwa tibo godiba ofa ilali, Dagon. Tama augwaligo te po wali, “Te dena godigo da tau selama, dago te dena boi bidi Samson te aiyaba elaluali!” te po wali. 24-25 Nosali augwali te ąį tuai gęǫ eyu, tama augwaligo te po wali, “Te Samson odasa asama, tama dago agaba te hagoma ilibo sę yaibao!” Tialima, augwali te kalabus beba pelama, tama aga selasa asali. Tama te we bidi augwaligo aga subo sogo, augwaligo te augwa tibo god nogi ugwaba siyu, tama augwaligo te po wali, “Te dena godigo da tau selama, te dago dena boi bidi Samson aiyaba elaluali,” po wali. “Agai te dago tǫ mu dolama, tama dago bidi dabe hauwa ela muani!” Tama augwaligo aga te be genuai masigi pos elalubo tomoba dodolama dolalubadi, tama augwaligo agaba te dwai hagoma sę yali.

26 Tama Samsongo aga te nogo tolasa biliyu, tama aga pabo dolasa pomainu ebo te dwasianu ogwabolo po walali, “Nago ena sela pelama, eno te be genuai masigigo nigai pos te eno nogo tola sigi paibao. Ena te masigigo nigali posde te eno tigi tede tialumainu homu yai.” Te po wai. 27 Te be te we bidigo mu pągąna sai elaluali. Tama te tigidali Filistia dabe polalubo bidi a naga te augwali dali bidali. Tama te bidi sese umabo te pąde te we bidi 3,000 te be ugwadu daide bidalu, tama augwaligo te Samsonba aba tononalu, tama augwaligo agaba gagali ebo po wabo sę yali. 28 Tama Samsongo te Genuai Bidiba gedu haluasa po weyu, te e tama po wali, “God Genuai Bidi Yawe, nago ena megi homu kone palao. God, nago te megi e sogo deli naga enaba te genuai bomo ma mao,” wai. “Tama eno te Filistia dabeba te eno gedu si dolali te wei ponaibao,” wai. 29 Tialima, Samsongo te be tomode dąų olalubo te genuai masigi pos si nogogo tuali. Agai te pos si nogogo tulalu, tama aga tigi te pos siba tinigi palio. 30 Agai i wali, “Ena te Filistia dabe dali isainogo ebao!” Tialima, agai bomogo te pos si pogolali. Tama te be aluama, te degeyu, te polalubo bidi dabeba dali, te be tomode bidali gasa we bidi dabeba dali, te be degalio. Te aga dali isiyu te ela muani bidi dabego nambago, te aga bidibadi te elali bidi dabego namba te aiyaba elaluai dao.

31 Tama aga ama dede dabe me aga hani sibi tigidali dulama, tama aga tigi sagasali. Tama augwaligo aga te bulu si Sora me Estaol tomode pubulali, te aga aya Manoa muani gų pagede muai. Aga te Israel dabego polalubo bidi bidibadi te kibu be bidi sese deli bidai dao.