10
Genuai Bidi aga king dao, te gasa god dabe da, te olo nai tiwai naga dao
1 Dage Israel, te Genuai Bidigo poba olo bugagia muao. 2 Agai te tiwai po obao,
“Dagego te gasa tǫ pedai kantride bidibo hani dabego
kolesaga wali pigimio.
Augwaligo te gasagi yai nai te dagalude pedalubo
sulama, te augwa wi mu yaibao.
Tialima, dage da, wi me elamuo. Menio.
3 Suao. Te hani dabego mu kolesaga me ebeo.
Augwaligo ebo kolesagago augwali tau sabo usu egobeo.
Augwa te ni me deli buside gelama,
tama te ni piksa dulubo konebo bidi dabego te ni
selama,
tama tego tibo god dulama, nigali.
4 Te bidi dabego te gol me silva selama,
te piksa au ilaibao.
Te nosali, augwa te hama selama,
te god me badu me te nide enaibao,
te aga tulaluidali weyu tebo dao.
5 Te god dabe te olo nai dao,
te bidi dabe piksa noma tiwai,
te gi page bidigo te ba dabe wi iliyu,
te gide muaibao.
Te god dabego po me wagobeo.
Te augwali bilibaso usu egobeo,
tiyu te bidigo augwali tolaibao.
Dage augwalide wi igio, magi baso meni,
augwaligo dwai sę me deli yabo usu egobeo.
Te augwa wiegi yai kolesaga me yabo usu egobeo,”
te po wai dao.
6 Genuai Bidi, te nage tiwai gasa me menio.
Nago genuai bomo, me genuai nogi elalubao.
Te nago naga bomo waseliyu,
te tobage sę dabe ebo dao.
7 Nage te tigidali hani we bidigo king bidibao,
tiyu tigidaligo nagede wi elama,
te nage dologode bidibaso usu yaibao.
Te nago koneani wiegi yai homu kolesagago
te king dabego koneani homu kolesaga,
me te po page konea pai bidi dabego
homu kolesaga, me
te tigidali hani we bidigo kolesaga me,
te aiyaba mu elaluai dao. *Ped 15:4
8 Te bidi dabego homu kolesaga te geda muyu,
te augwali umuna pai mu elalubao.
Magi baso meni, augwali te nigo nigali naiba naga
pelama, te kolesaga sabo dao.
9 Te bidi dabego te silva te tǫ kantri Spende siyu,
me gol te tǫ kantri Ufasde sobadi elama,
tama te gol me silva sę ebo bidi dabeba menama,
te augwa god dabe augwaligo mesegelimainu tebao.
Te wiegi yai nami ugwa nigibo bidi dabego,
augwa te sisi ugwa me mama yai nigilama,
te god dabe au ilainu tiaibao.
10 Tialima, Genuai Bidi, nage God mu dao.
Nage sesemane bidibo God,
te nage sesemane sogo king bidaibao.
Te nago haliga sębę ebo sogo da, te tǫ mali eyu,
te we bidi hani bugagia me bidigobeo.
11 Dage Israel, dagego te Genuai Bidigo po odisąbo
bidi hani augwaliba te tiwai po wao,
“Te dagego godigo te tǫ me dagalu nigibeo,
tama te god dabe dolobaso da,
te munu ma tǫde me dagalu dologode me
bidigobeo,” te po wao.
Genuai Bidi aga polasa mu polalubao
(Jer 51:15-19)
12 Te God da, aga bomogo digi te tǫ nigai dao.
Awe, aga wiegi yai koneani homu kolesagade agai
te tǫ dodolama muai dao.
Aga homu kolesagade agai te dagalu nigiyu elama,
diniga palali.
13 Agai po obaso, te dagalu pǫ dabego te be kulu
bomonama obao,
te pǫ hauwa umabo hogodama,
te gasa gasa badu asu, te deliba sisinibao.
Agai te dagalude be sele emainu elama,
te tulubage tulubao.
Agai te wali hodolama,
te aga bidibo pesage tagalama, asobo dao.
14 Bidi dabe te tiwai ebeo.
Tigidali te umuna pelama,
te koneani homu me elalubeo.
Te tibo god golgo nigibo bidi dabe dao,
te augwali hale yaibao,
te augwa nigali nai dabede.
Te god dabe te mu nai menio.
Augwa te bidibo ula me elalubeo.
15 Augwali te olo nai mu tiwai elalubao,
te bidi dabego posobo po augwaliba waibao.
Te god dabe da dolama, te mu sia saibao.
16 Tialima, Jekopgo God te tama me tegobeo.
Aga te tedali gasagi yai mu dao.
Agaduba deligo naga te tigidali nai nigali.
Tama agai te Israel dabe dąį elama, sa muani,
te aga hani tiwai da wali.
Aga nogi te e dao,
Tigidali Bomo Elalubo Genuai Bidi dao.
Genuai Bidigo te Juda dabe sela sąwaibao
17 Dage Juda, te boi bidi dabego Jerusalem bagua salio.
Tialima, dagego duga doado bage sisinama, tolasa piąo.
18 Magi baso meni. Genuai Bidigo te tiwai po wali,
“Te sogo eno dage Juda tǫ we bidi gasaba sela sąwaibao,
bidigo te masigi du te kukulu tede belama,
te hogolama, tama sąbo tiwai yaibao.
Te eno genuai sęgę dageba menama,
te dage dene mu ebaso, gę mu naibao.”
19 Tama te Juda dabego te tama po waibao,
“Hobede mu ebao, da dolalio.
Te dago sęgę genuai mu elalubao,
te genuai keni pedela sisąbo tiwai ebao.
Tiali goli, tagalao, te sęgę daba pedelama,
te dago tolobo dao,” te po wali.
20 Jerusalem dolama, te olo mu elalubao,
te ugwa be me deli pisila pelama,
te degasa dulali tiwai elalubao.
Tama te ugwa be ma sę yabo bidi me deli meni yaibao,
magi baso meni, tigidali we bidigo
te Jerusalem tagalama, pela silai dao.
21 Te tǫ kantri tonalubo tobolu bidi dabego wiegi yai
homu kolesaga elalusiąyu,
augwa te Genuai Bidiba hanaluama,
te augwa homu kolesaga dodolomainu te homu
me ebeo.
Tiyu, augwaligo te wiegi yai sę me isiąbaso,
te boi bidi dabe aselama,
te we bidi dabe tedela pali,
te uni yowigo te sipsip tonalubo bidigo
te sipsip bugagia tonalusąbaso,
te tedela palobo tiwai yali dao.
22 Odao. Augwaligo te po sela asalio.
Te genuai po dągą u wabo te not badu pedelalio,
te boi bidi dabe augwa pesage tagalama,
te Judago taunba hwįagasu asobao.
Te taun dabe te mu dolama,
te uni yowigo pesage naga pedelaibao.
Jeremaiago Godiba hanaluama, te we bidi tau somainu yai
23 Genuai Bidi, eno koneani,
te bidi dago dena bilibo tonalubo usu isąyu,
te dena godolo homu ebo sunumi dabe wali painu
ebaso, usu egobe dao.
24 Genuai Bidi, nago da dodolao,
tiali goli, nago da selebo sę igio.
Tiyu, nago da dali haliga sębę eyu, nago da mu dolidalio.
25 Te nageba lotu wasiąyu,
te gedu haluasa po wasiąbo we bidi hani dabeba
dene mao.
Te hani dabego te dago we bidi dabe te Jekopgo hani
ela muai.
Augwaligo da mu silama, te dago tǫ me be mu dolai
dao.