18
Judasgo Jisas boi bidi nogoba muai
(Mat 26:47-56; Mak 14:43-50; Luk 22:47-53)
Te Jisasgo te po olama, tama Jisas aga bidi dabe dali augwaligo te bulu tagalama, tama peyu, Kidron ąį odogo nogogi pai. Te ni oliv sili, te ąį u badu elaluai. Tama Jisas aga wali pabo bidi dabe dali augwali te oliv ni sili bulu tomoba pai. Hauwa sogo Jisas aga wali pabo bidi dabe dali augwali te oliv ni siliba sisinama bidiyu yai, polobadu. Tama tibaso, Judas, Jisas te boi bidi nogoba muabo bidi, agai me te ni sili koneai. Tama tibaso, Judasgo ami bidi hani dali, tama meba pris tuni bidigo enesigi bidi dabe dali, te Farisi bagego enesigi bidi badi, tama selama, augwali te ni sili giba dolo asai. Tama augwaligo lam dali sole dali tolasa asiyu, tama augwaligo hwįabo nai dabe dali sela asai. Tama Jisasgo agade pedalabo sę tigidali koneyu, tama aga te ni sili gi buluba pelama, tama augwali tiąba pai. Tama agai augwali dali te po wai, “Dagego de gegagasai dawe?”
Te augwaligo Jisas aga dali po wei ponoyu, te po wai, “Dago te Nasaret bulu bidi Jisas gegagasai dao,” te po wai.
Jisasgo augwali dali te po wai, “Te bidi ena tama dao.”
Tama Judas, Jisas te boi bidi nogoba muabo bidi me augwali dali dolaluai.
Jisasgo augwali dali “Te bidi ena tama da” obaso, tama augwali meba gegemani siyu, tudi bulu peyu elama tama tǫba degasa pai. Tama Jisas agai augwali dali ma hanalu wai, “Dagego de gegagasai dawe?” Tama augwaligo te po wai, “Te Nasaret bidi Jisas gegebao,” te po wai.
Jisasgo po wei ponoyu, te po wai, “Eno dage dali wai dao, te bidi ena tama dao. Dagego ena naga gegeba wida, e bidi dabe olo pomainao,” Jisasgo te po wai. Tamadi agai te po God dali wai, “Nago ena mani bidi dabe augwali eno me tagalobeo,” wali. Tama Jisas agai te tamadi wali po usu numainogo, agai ‘Augwali olo pomainao’ po megi wali.
10 Te Saimon Pita agai moni kago hwą munaluai, te kago hwą bulubo bede. Tama agai te kago hwą kega siyu, tama agai bidi mego dolo nogo badu olo te kago hwągo togwa sąwai. Tama te bidi nogi Malkus, aga te pris tuni bidigo sę ebo bidi da. 11 Tialima Jisasgo Pita dali te po wai, “Nago te kago hwą aga bulubo beba ma bulama muao. Eno Aya agai enabolo bodolu mani, te ena tigide dene saibao. Te augwaligo ena dali yabo sę nago te bodolu didigili painogo ebawe?” Jisasgo Pita dali te po wai.
Augwaligo Jisas te Anas bidibo digi odasa pai
12 Te ami bidi hani dali, te augwa polalubo bidi dali, tama te Juda dabego enesigi bidi dabe dali, augwaligo Jisas nogo tulama, tama augwaligo bonogo agai nogo si tudi badu munama, kęai. 13 Tama kęnama, tama augwaligo Jisas te bidi nogi Anas bidibo digi hasia teba sela pai. Te bidi Anas te bidi Kaiafas aga wąį dao. Tama te kibu bede te bidi Kaiafas agai te pris tuni bidi bidai. 14 Tama te bidi Kaiafas agai te Juda bage dali te po mobo mabo po polobadu wai dao. Agai te po wai dao, “Dago hani tigidali dolidali weyu, bidi me deli isilama, tama aga isibogo te we bidi tau siyu da, te usu yaibao,” te po wali bidi Kaiafas aga dao. Tama augwaligo Jisas te Kaiafas aga wąį Anas te bidi bidibo digiba sela pai.
Pitago “Jisas eno konebeo,” te po wai
(Mat 26:69-70; Mak 14:66-68; Luk 22:55-57)
15 Te augwaligo Jisas sela pobaso, te Saimon Pita dali, te Jisasgo sę bidi me dali augwali si Jisas wali pai. Tama te pris tuni bidi agai te gasa bidi konebaso, te gasa bidi te obo tomoba Jisas dali peyu, te be mesaloba sabolali, te pris hani tuni bidigo bede. 16 Tialima Pita te tų sesege pąde dolaluai, bulu badu. Tama te gasa bidi, Jisas wali pabo bidi, aga te pris tuni bidigo abagi yaibaso, te bidi aga pelama, agai te tų tonalubo webolo po olama, tama agai Pita tomoba odasa asai. 17 Te tų tonalubo wego Pita dali te po wai, “Nage me te bidi Jisas wali pabo bidi dawe?” te wego Pitabolo hanaluyu, te po wai. Tama Pitago te po wai, “Woo, ena te bidi wali pabo bidi menio,” wai.
18 Te bede sę ebo bage dali, te Jisas odasa asali enesigi bidi dabe dali, augwaligo te be mesalo tomode sia nogai. Te kedau ebaso, tama augwali dolaluyu, te siade kedau tuyu, tigi posolo iliyu yai. Tama Pita me augwali dali dolaluyu, sia kedau tuai.
Te pris tuni bidi agai Jisas dali po hanalu wai
(Mat 26:59-66; Mak 14:55-64; Luk 22:66-71)
19 Te be tomode, te pris tuni bidi agai Jisas aga wali pabo bidi dabede po hanalu wai. Tama agai Jisasgo te we bidi dali ola mani pode me hanalu wai. 20 Jisasgo aga dali po wei ponoyu, tama po wai, “Eno we bidibolo mani te po eno bulu ulade hania wai dao. Eno te we bidibolo po ola mabo sę eyu, tama te bomo yai po ola mabo be tomode te sę eno yali, ma te Moni Lotu Be tempel, tede me eno te sę yai dao. Te be dabede te Juda bage sisinibo bulude eno augwalibolo eno po hania ola mawai dao. Tama eno po geme dualama bulu tomode me wabeo. 21 Tama tibaso, magi baso nago ena dali hanalu obawe? Nago eno te po odali we bidi dali hanalu wao. Eno wali po augwaligo koneai dao,” Jisasgo te po te pris tuni bidi dali wai. 22 Tama Jisas agai te po tama obadi yaide, enesigi bidi me deli Jisas pąde dolaluali bidi, te enesigi bidi agai Jisas nogo sawaligo Jisas nabo gede eleyu, te po wai, “Nago te tobage po te pris tuni bidi dali wei ponoyu obawe? Te dwali,” te po wai. 23 Jisasgo te enesigi bidi dali po wei ponoyu, te po wai, “Eno dwai po wagi sogo da, nago te dwai po hania wagi da. Tialima, eno po dolo naga obadi da, teda magi baso nago ena elaliwe?” Jisasgo te enesigi bidi dali te po wai. 24 Tama Jisas te aga nogo si bonogo kęani tama elalubadi yaide, tama te bidi Anasgo Jisas aga te pris tuni bidi Kaiafas bidibo digi tagala palai.
Pitago te po ma weyu, te po wai, “Jisas eno konebeo,” wai
(Mat 26:71-75; Mak 14:69-72; Luk 22:58-62)
25 Te Saimon Pita dolaluyu, sia kedau tudai. Tama augwaligo aga dali te po wai, “Nage me te bidi wali pabo bidi dawe?” Tama Pita agai hogwa siyu, “Ena menio,” te po wai. 26 Tama te pris hani tuni bidigo sę ebo bidi me deli tede bidai, te Pitago hwągo olo togwali bidi aga deli hani bidi dao. Tama te bidi agai te po wai, “Eno homu eno nage suali, te nage te bidi Jisas dali te ni sili gide bidibo eno suali. Te mu dawe?” te po hanalu wai. 27 Tama Pitago po ma weyu, hogwa siyu, te po wai, “Ena menio.” Tama Pitago te po obadi yaide, megi tama ba kakaruk po wai.
Augwaligo Jisas te gavman bidi Pailat bidibo digi sela pai
(Mat 27:1-2, 11-14; Mak 15:1-5; Luk 23:1-5)
28 Te be tama posobadi, tama augwaligo Jisas ma selama, te bidi Kaiafas agai be tagalama, tama augwaligo Jisas te gavman tuni bidigo beba sela pai. Tama te beba sabolama, tama te Juda bage augwali digi te gavman tuni bidigo be tomoba pabeo. Te gavman bidi te Juda hani isąwai bidi bidibaso, te Juda dabe aga be tomoba pabeo. Te habu selali bolidali weyu, tama augwali te be bulu badu bidali. Augwaligo te homu yai, te habu selali bolisiąbadi, dago te Pasova nai tueibao, te homu yai. 29 Tama tibaso, te Rom gavman tuni bidi nogi Pailat aga te be tomode bidilama, bulu badu augwali bidibo digi asai. Agai augwali dali te po wai, “Dagego te bidi magi pode tų ela mawainogo ebawe?” te gavman tuni bidigo augwali dali te po wai. 30 Tama augwaligo aga dali po wei ponoyu, te po wai, “Te bidi dwai kolesaga isąwai bidi tigi sogo da, te dago nage bidibo digi sela asigi menio,” augwali Juda bidigo te gavman tuni bidi dali te po wai. 31 Tama Pailatgo augwalibolo te po wai, “Duga digi Jisas aga selama, tama duga bomo yai po usu gilama, tama duga digi aga po tų ela mao,” te Pailatgo Juda bidi dabe dali te po wai. Tama Juda bagego Pailatbolo te po wai, “Woo, dage Rom gavman bidi dabego te bomo yai po dabolo mawai, te po wai, ‘Dage Juda bagego po tų eyu da, te dwai sę yali bidi dagego elegio. Da Rom dabego naga te dwai sę yali bidi ela mubo sę ebo dao,’ dagego da Juda bagebolo te po wai dao. Tama tibaso, dago e bidi nage pageba sisali, te aga isimainogo yali,” augwaligo te po wai. 32 Polobadu Jisasgo aga isabo sogode po me weyu, te po wai, “Juda hani isąwai bagego ena nide walama, tama ena isaibao.” Tama te po nai gilama walomainogo, megi te Juda bage augwaligo Jisas te Pailat pageba odasa aselama, tama te po wai.
33 Te bidi Pailat aga te gavman be tomoba ma pai. Tama agai Jisas i weyu, asao wai, tama agabolo hanalu wai, “Nage te Juda we bidigo tuni bidi dawe?” Jisas dali Pailatgo te po wai. 34 Jisasgo po wei ponoyu, te po wai, “Naga digi te po homugo koneama obawe? Ma gasa bidigo nagebolo te po weyu, ena dali te po wao te po waliwe?” Jisasgo te po wai. 35 Pailatgo Jisasgo po wei ponoyu te wai, “Ena da Juda bidi dawe? Mu menio. Naga hani dali, te pris tuni bidi dabe dali, augwaligo nage ena bidibo digi sela asai dao. Tama nago magi sę yaliwe?” te Pailatgo Jisas dali te po wai.
36 Te Jisasgo po wei ponoyu, te po wai, “Eno te we bidi tonalubo sę te e tǫde yabo menio. Tama eno te we bidi tonalubo sę te e tǫde elalugi sogo da, teda eno sę bidi augwaligo ena megi tau somainogo hwįgi dao. Tama tiyu, ena niwai bidi mego agai ena te Juda dabego nogoba mugi menio. Tiali goli, eno te we bidi tonalubo sę te e tǫde menio,” Jisasgo te po wai. 37 Tama tibaso, Pailatgo Jisas dali te po wai, “Nage te tuni bidi me deli dawe?” Jisasgo agai po wei ponoyu, te po wai, “Naga digi te po weyu, ena tuni bidi dao, te po wali. Te mu po page mu hania pedalomainogo, te ena te idago ena ame neyu, te ena e tǫba asai dao. Tama tibaso, te mu po naga wali pabo we bidi augwaligo eno po odobo dao,” Jisasgo te gavman tuni bidi dali te po wai. 38 Pailatgo Jisas dali te po hanalu wai, “Mu po te magide dawe?”
Te Pailatgo Jisas dali te po olama, tama aga te Juda bage bidibo digi buluba ma pelama, tama agai augwali dali te po wai, “Eno Jisas agade magi dwai sę yali sęgę me subeo. 39 Tialima dagego kolesaga tama telalubo dao, te dagebolo eno te bo disąwai nai tuabo side, te si nogi Pasova, te side te kalabus bidi me deli eno dageba olo tagala palobo dao. Tama tiyu, eno dagebolo te Juda bidi dabego tuni bidi dageba tagala palagawe?” te Pailatgo Juda bidi dabe dali te po hanalu wai. 40 Tama te bidi dabe augwaligo i hae me po dagą me genuai mu olama, te po wai, “Te bidi Jisas menio, nago te bidi Barabas daba olo tagala palao,” te po olama i wai. Te bidi Barabas agai da te bidi eleyu mena nai anoma elama sabo bidi bidai.